Беларусы змогуць атрымліваць паведамленні пра штрафы праз мабільныя праграмы банкаў
У Беларусі грамадзяне змогуць атрымліваць дзяржаўныя паведамленні праз мабільныя праграмы банкаў. Для гэтага Нацыянальны цэнтр электронных паслуг развівае падсістэму «Е-Вестка», якую інтэгруюць з банкаўскімі інфармацыйнымі сістэмамі. Пра гэта 21 кастрычніка паведаміў начальнік упраўлення інфармацыйных тэхналогій цэнтра Ягор Воранаў, піша агенцтва «Мінск-Навіны».
Праз новы сэрвіс можна будзе атрымліваць паведамленні пра розныя падзеі, якія патрабуюць увагі. Сярод іх — штрафы за парушэнне правіл дарожнага руху, заканчэнне тэрміну дзеяння дакументаў, што пацвярджаюць асобу, а таксама неабходнасць замены пасведчання кіроўцы. Разглядаецца і магчымасць паведамляць такім чынам пра маёмасны падатак.
Цяпер Нацыянальны цэнтр электронных паслуг разам з банкаўскай супольнасцю і пад эгідай Нацыянальнага банка Беларусі працуе над інтэграцыяй «Е-Весткі» з банкаўскімі сістэмамі і мабільнымі праграмамі.
Карыстальнікам не давядзецца самастойна заходзіць у розныя асабістыя кабінеты, каб правяраць, ці ёсць у іх дзяржаўныя паведамленні. Push-апавяшчэнне ў банкаўскай праграме паведаміць пра наяўнасць новага паведамлення ў «Е-Вестцы».
Калі чалавек раней не актываваў асабісты кабінет у гэтым сэрвісе, ён зможа зрабіць гэта праз мабільную праграму банка. Пасля гэтага карыстальнік атрымае доступ да спісу сваіх паведамленняў і зможа адразу перайсці да іх аплаты, калі яна прадугледжаная.
Акрамя таго, у межах развіцця «Е-Весткі» плануюць падключыць дзесяць праактыўных сэрвісаў, якія будуць самастойна інфармаваць грамадзян пра важныя падзеі, напрыклад пра заканчэнне тэрміну дзеяння дакументаў або неабходнасць замены пасведчання кіроўцы.
Цяпер чытаюць
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары