У дзень закліку Трампа змяніць яго Зяленскі перагаварыў з кіраўнікамі чатырох еўрапейскіх дзяржаў
Уладзімір Зяленскі правёў тэлефонныя размовы з прэзідэнтамі Фінляндыі і Францыі, а таксама з прэм’ер-міністрамі Нарвегіі і Вялікабрытаніі. Галоўнымі тэмамі сталі ўзмацненне супрацьпаветранай абароны Украіны, новыя расійскія атакі, санкцыі супраць Масквы і каардынацыя далейшых дзеянняў з партнёрамі.
Падчас размовы з прэзідэнтам Фінляндыі Аляксандрам Стубам Зяленскі падзякаваў за пакет дапамогі для абароны ўкраінскага неба. Паводле яго слоў, у найбліжэйшыя дні Украіна атрымае боепрыпасы для знішчальнікаў F-16. Менавіта яны цяпер дазваляюць збіваць рэактыўныя беспілотнікі тыпу «Шахед».
Зяленскі таксама паведаміў Стубу пра чарговыя расійскія ўдары. Суразмоўцы абмеркавалі дадатковыя даходы Расіі ад экспарту нафтапрадуктаў, якія могуць быць выкарыстаныя для фінансавання далейшай агрэсіі. Бакі рыхтуюць сустрэчы і ўзгадняюць магчымыя сумесныя крокі.
Падчас расійскай балістычнай атакі на Кіеў украінскі прэзідэнт размаўляў з прэзідэнтам Францыі Эмануэлем Макронам. Зяленскі падзякаваў Францыі за падтрымку і адзначыў відавочную патрэбу Украіны ў новых пакетах сродкаў супрацьпаветранай абароны. Па яго словах, у найбліжэйшыя дні захоўваецца асаблівая пагроза ракетных удараў, таму неабходна ўзмацняць ціск на Расію і ўзгадняць рашучыя сумесныя дзеянні.
Яшчэ адной тэмай стала змякчэнне санкцый у дачыненні да расійскіх нафтапрадуктаў. Зяленскі падкрэсліў, што Расія не павінна атрымліваць дадатковых магчымасцяў зацягваць вайну. Украінскі і французскі бакі працягваюць каардынаваць дзеянні і рыхтуюць новыя сустрэчы.
У размове з прэм’ер-міністрам Нарвегіі Ёнасам Гарам Сцёрэ Зяленскі падзякаваў ураду і нарвежцам за дапамогу. Ён паведаміў пра расійскія атакі, якія працягваліся на працягу ўсяго дня, і назваў іх асабліва вераломнымі. Украінскі прэзідэнт адзначыў, што цяпер неабходныя новыя крокі, каб Масква не лічыла, што можа працягваць вайну бясконца і заставацца без сур’ёзных наступстваў. Бакі дамовіліся працягваць каардынацыю і рыхтаваць сустрэчы ды сумесныя рашэнні.
Таксама Зяленскі правёў размову з прэм’ер-міністрам Вялікабрытаніі Эндзі Бёрнэмам. Ён падзякаваў за падтрымку і спачуванні людзям, якія страцілі блізкіх у выніку расійскіх удараў. Зяленскі адзначыў, што на працягу дня Расія атакавала розныя ўкраінскія гарады авіябомбамі, беспілотнікамі «Шахед» і балістычнымі ракетамі. Таму галоўным прыярытэтам застаецца супрацьпаветраная абарона.
Суразмоўцы таксама абмеркавалі неабходнасць канкрэтных рашэнняў для абароны жыцця ва Украіне і ўмацавання агульнай бяспекі Еўропы. Зяленскі адзначыў важнасць далейшага ўзмацнення брытанскіх санкцый супраць Расіі ў адказ на эскалацыю. Акрамя таго, бакі абмеркавалі магчымыя крокі, якія маглі б паспрыяць дыпламатычнаму ўрэгуляванню, і пачалі падрыхтоўку да сумеснай сустрэчы.
Ва Украіне адрэагавалі на «заявы з-за мяжы» аб неабходнасці замены Зяленскага
Трамп: Украіне прыйшоў час завесці новага прэзідэнта
Кая Калас: Цяпер не час аслабляць ціск на Маскву, у панядзелак будзе новы пакет санкцый
New York Times: Вашынгтон спакушаў Расію ў тым ліку вывадам беларускага калію з-пад санкцый
Малодшы сын Сахашчыка абвешчаны зніклым без вестак. Выглядае, ён ваяваў за Расію88
Каментары