Piatro Mikłaševič: stan prakuratury katastrafičny
Hienprakuror Piatro Mikłaševič padaŭ prezydentu słužbovuju zapisku ab katastrafičnym stanoviščy, što skłałasia ŭ systemie prakuratury. Pavodle Mikłaševiča, 60% prakuroraŭ Biełarusi majuć staž, mienšy za try hady, a biahučka kadraŭ, «vyklikanaja ciažkim materyjalnym stanoviščam, pryvodzić da strašennaha nieprafesijanalizmu supracoŭnikaŭ, jakija hublajuć i zabyvajuć na miescy złačynstva ŭliki, pakryvajuć zakazčykaŭ i vykanaŭcaŭ złačynstvaŭ, u tym liku i zabojstvaŭ». Hienprakuror prosić Łukašenku viarnuć u prakuraturu kadry, jakich V.Šejman źvioŭ paśla sychodu ŭ Administracyju prezydenta.
Samsonaŭ — samy sumlenny hulec
Biełaruski majstar «małoha» tenisu Ŭładzimier Samsonaŭ uznaharodžany pryzam Mižnarodnaha alimpijskaha kamitetu Fair play («Sumlennaja hulnia»). Padstava — učynak u finale lutaŭskaha turniru «Top-12» u Francyi, dzie Ŭładzimier zhulaŭ z rasiejcam Alaksiejem Śmirnovym. Arbitar nie prysudziŭ dastatkova sprečnaha bału rasiejcu, ale Samsonaŭ paśla hetaha admysłova dvojčy zhulaŭ u sietku, u vyniku prajhraŭšy matč — 13:15. Svoj učynak Uładzimier patłumačyŭ nastupnym čynam: «nie zachacieŭ hulać u taki tenis».
1 listapada mienavita Ŭładzimier prynios biełarusam pieramohu ŭ matčy adboračnaha turniru nad zbornaj Rasiei. Biełarusy vyjhrali mienski matč ź likam 3:2.
Jak pražyć na 70 dalaraŭ?
Urad na padstavie cenaŭ vieraśnia zaćvierdziŭ novy biudžet pražytačnaha minimumu — biełaruskuju rysu biednaści. Jahony siaredni pamier — 150 tys. rubloŭ (kala $70). Dla pracazdolnaha nasielnictva BMP składaje 165 tys. rub., dla pensijaneraŭ — 133 tys. rub., dla dziaciej u vieku 3—16 hadoŭ — 176 tys. Pavodle źviestak Minstatu, 16% nasielnictva krainy žyvuć za rysaj biednaści.
Marynič u špitali
Stan zdaroŭja palitviaźnia Michaiła Maryniča čarhovy raz pahoršyŭsia, i jaho pieraviali ŭ turemny špital. Pavodle słovaŭ žonki palityka Taciany Marynič, jaje muža dabivaje nizkaja temperatura ŭ kamery. «Paśla insultu ŭ jaho trymajecca aniamieńnie pravaj pałovy tułava», — kaža spn.Marynič.
AR; afn.by, svaboda.org
Ciapier čytajuć
Čamu amierykancy tak irvucca na Miesiac, što tam buduć zdabyvać? I što da taho biełarusam? Tłumačyć biełaruski astrafizik3
Kamientary