Arhanizatary Dnia Voli zaklučyli ź milicyjaj damovy na absłuhoŭvańnie akcyi bolš jak na 20 młn rubloŭ

Zajaŭniki akcyi z nahody Dnia Voli, jakaja projdzie ŭ Minsku 25 sakavika, siońnia abmierkavali ŭ HUUS Minharvykankama pytańni arhanizacyi biaśpieki na mierapryjemstvie. Pra heta paviedamiŭ adzin z zajaŭnikaŭ akcyi staršynia Partyi BNF Alaksiej Janukievič. 

Palityk zaznačyŭ, što ź im, a taksama ź jašče tryma zajaŭnikami — staršynioj arhkamiteta pa stvareńni abjadnańnia «Maładyja chryścijanskija demakraty» Marynaj Chomič, pradstaŭnikami Abjadnanaj hramadzianskaj partyi Mikałajem Kazłovym i ruchu «Za Svabodu» Mikitam Siemianienkam — byli zaklučanyja damovy z HUUS na absłuhoŭvańnie mierapryjemstva, ahulnaja suma jakich skłała bolš za 20 młn rubloŭ. 

Na sustrečy kiraŭniki adździeła hramadskaj biaśpieki HUUS papiaredzili zajaŭnikaŭ akcyi, kab tyja prytrymlivalisia paznačanaha ŭ zajaŭcy rehłamientu i kab udzielniki mierapryjemstva nie zakryvali tvary. 

Sa svajho boku zajaŭniki akcyi źviarnuli ŭvahu milicyi na mahčymyja pravakacyi z boku roznych prarasijskich hrup, takich jak «Antymajdan» i inšyja, jakija ŭ sacyjalnych sietkach vykazvali niezadavalnieńnie ad praviadzieńnia akcyi. «My prasili kiraŭnictva milicyi być hatovymi da pravakacyj i pieraškadžać im. Nam skazali, što na miescy praviadzieńnia akcyi budzie kiraŭnictva haradskoj milicyi, što situacyja budzie adsočvacca», — skazaŭ Janukievič. 

Adznačym, što prychilniki hetych hrup inicyjavali zvarot u Minharvykankam z prośbaj zabaranić praviadzieńnie akcyi z nahody Dnia Voli. U adkazie za podpisam načalnika ideałahičnaha adździeła Minharvykankama Paŭła Skałabana paviedamlałasia, što rašeńnie ab praviadzieńni masavaha mierapryjemstva moža być abskardžanaje ŭ sudzie. Taksama ŭ vykankamie paraili źviartacca ŭ pravaachoŭnyja orhany ŭ vypadku ŭčynieńnia ŭdzielnikami akcyi supraćpraŭnych dziejańniaŭ. 

Janukievič padkreśliŭ, što arhkamitet nieadnarazova zaklikaŭ udzielnikaŭ akcyi prychodzić z transparantami i łozunhami, źmiest jakich adpaviadaje temie śviatkavańnia Dnia Voli, a mienavita: abaronie niezaležnaści i salidarnaści z Ukrainaj. 

«Kali buduć transparanty, jakija nie datyčacca temy mierapryjemstva, jakija zaklikajuć da nasilla, zrazumieła, my budziem patrabavać prybrać ich. U siońniašniaj situacyi, kali była inśpiravanaja chvala listoŭ pratestu suprać praviadzieńnia akcyi, nie treba davać lišnich padstaŭ dziaržaŭnaj prapahandzie i prarasijskim hrupam abvinavačvać nacyjanalnyja siły ŭ ekstremiźmie ci padtrymcy radykalnych idej», — skazaŭ Janukievič. 

Akramia taho, zajaŭniki akcyi prasili milicyju nie pieraškadžać u dastaŭcy hukaŭzmacnialnaj aparatury na miesca praviadzieńnia mitynhu. 

Nahadajem, Minharvykankam dazvoliŭ praviadzieńnie akcyi ŭ nastupnym farmacie: zbor udzielnikaŭ z 15.00 da 16.00 kala kinateatra «Kastryčnik», šeście da płoščy Banhałor z 16.00 da 17.00, mitynh u parku Družby Narodaŭ da 18.00.

• 0
• 0
• 0
• 0
• 0
• 0
• 0
• 0