Recydyvistu, bajeviku ŁNR udałosia ŭciačy ad biełaruskich śpiecsłužbaŭ FOTA
Uradženiec Mastoŭskaha rajona z pazyŭnym Mantana paśla viartańnia ŭ Biełaruś chvaliŭsia adnaviascoŭcam, što ŭłasnaručna zabiŭ 20 ukraincaŭ! Raniej za svaje 22 hady biełarus mieŭ až 5 sudzimaściaŭ za kradziažy. Na radzimie Mantana vierbavaŭ adnakłaśnika, jakomu abiacaŭ štomiesiačny zarobak u pamiery 300 dalaraŭ, a taksama mahčymaść zajmacca maradziorstvam i zabirać rečy zahinułych.
U chodzie apytańnia milicyjaj jon pryznaŭ, što vajavaŭ na baku ŁNR. Paśla apytańnia jon schavaŭsia, pryznaje milicyja.
U «Sovietskoj Biełoruśsii» byŭ nadrukavany vialiki artykuł «Hastarbajtary vajny», u jakim na hruncie infarmacyi, sabranaj milicyjaj, idzie havorka pra hramadzian Biełarusi, jakija pajechali vajavać na ŭschod Ukrainy.
Aŭtaram publikacyi vystupiŭ hałoŭny redaktar časopisa «Śpiecnaz» Andrej Dziemianćjeŭski, jaki raniej pisaŭ u niehatyŭnym śviatle pra futbolnych fanataŭ.
Častka, jakaja pryśviečanaja biełarusam, što vajujuć na baku Ukrainy, małacikavaja. Novaha ŭ joj mała. Jana hruntujecca na publikacyjach u niezaležnych ŚMI, u tym liku «Našaj Nivie».
Naprykład, pra biełaruskich instruktaraŭ u bataljonie «Azoŭ», a taksama pra daŭbanutaha Daniłu Lešuka (pazyŭny Madžachied, bataljon «Tarnada»), jakoha ŭkrainskija ŭłady aryštavali i buduć sudzić za ździeki z cyvilnaha nasielnictva.
Zatoje Dziemianćjeŭski publikuje šmat novaj infarmacyi pra biełarusaŭ, jakija vajujuć u šerahach bajevikoŭ «ŁNR» i «DNR». Vidać, što tut biełaruskaja milicyja nakapała pra ich niamała faktury.
Raskazana historyja čałavieka z pazyŭnym Puškin z Mahiloŭščyny. Pavodle publikacyi, Puškin byŭ zatrymany biełaruskimi siłavikami, dapytany adnosna ŭdziełu ŭ vajnie. Puškin navat pryznaŭsia, što atrymlivaŭ jakija-nijakija hrošy. Adnak, miarkujučy pa staroncy bajevika ŭ sacyjalnaj sietcy «Adnakłaśniki», Puškin ciapier iznoŭ na voli i paziruje na fotazdymkach sa zbrojaj.
Jašče adzin bajavik — 38-hadovy ŭradženiec Vaŭkavyska z pazyŭnym Harynyč. Jon maje piać sudzimaściaŭ, u tym liku za zabojstva. «SB» paviedamlaje, što hety čałaviek, chutčej za ŭsio, narkaman. U bajavych dziejańniach jon braŭ udzieł u składzie raźviedki «ŁNR». «SB» abviarhaje dačynieńnie Harynyča da biełaruskaj milicyi, pra jakoje pisali niekatoryja ŚMI, davieryŭšysia nienadziejnaj krynicy ŭ JUTubie.
Razam z Harynyčam vajuje jašče adzin biełarus z kryminalnaj spravaj za plačyma.
Cikava, što bajcoŭ tak zvanaj «Navarosii» navat abvinavačvajuć u nieanacyźmie. Heta tyčycca nacboła z Salihorska Ihara Ščuki, jaki ŭ svoj čas byŭ u šerahach RNIE.
«Miarkujučy pa materyjałach, sabranych MUS na ŭdzielnikaŭ danbaskich bajoŭ, biełarusaŭ, jakija vajujuć na baku «DNR» i «ŁNR», u niekalki razoŭ bolš, čym ich ziemlakoŭ z ukrainskich dobraachvotnickich bataljonaŭ. Da taho ž biełaruskija prychilniki sieparatystaŭ i ŭzrostam starejšyja, i vajskovaja padrychtoŭka, bajavy vopyt na paradak vyšejšy», — piša «Sovietskaja Biełoruśsija».
Adnak paśla takich pryznańniaŭ idzie zusim niełahičnaja vysnova: «Asablivuju pahrozu nacyjanalnaj biaśpiecy pradstaŭlajuć biełaruskija hramadzianie, jakija vajujuć u składzie padraździaleńniaŭ ATA. U bolšaści svajoj heta pradstaŭniki… maładziožnaha asiarodździa… Jany prapaviedujuć ideałohiju ahresiŭnych kalafutbolnych ruchaŭ i hvałtoŭnuju formu źviaržeńnia dziaržaŭnaj ułady, adkryta supraćpastaŭlajuć siabie pravaachoŭnaj sistemie»,— adznačajuć u MUS.
Siarod biełarusaŭ na baku «DNR» i «ŁNR» jość i zabojcy, i narkamany, i kateharyčnyja nienaviśniki biełaruskaj dziaržaŭnaści, ale strach u MUS vyklikajuć usio adno palityčnyja praciŭniki. Pamyłka analizu ci žadańnie nie razdražnić Rasiju, jakaja ŭzbrojvaje i finansuje bajevikoŭ?
«Ciapier naša meta abiasškodzić, zaklikać da adkazu bajevikoŭ, jakija viartajucca z Ukrainy. Jany nie pavinny ŭžyć svaje navyki ŭ intaresach ekstremistaŭ i kryminalitetu, — padsumoŭvaje surazmoŭca «Sovietskoj Biełoruśsii» ź Ministerstva ŭnutranych spraŭ. — Prablemu nielha niedaaceńvać. Bo havorka idzie pra biaśpieku i prestyžy našaj krainy, jakaja zavajavała tryvałuju reputacyju niejtralnaj, miralubnaj dziaržavy, stabilnaj placoŭki dla pieramoŭ pa ŭrehulavańni łakalnaha kanfliktu. Usiu hetuju hrymučuju sumieś z raznamasnych destruktyŭnych elemientaŭ treba paśpieć pahasić», — kaža supracoŭnik MUS.
«SB» paviedamlaje, što ŭžo 8 biełarusaŭ zahinuła va Ukrainie.
Publična viadoma pra 4 vypadki. Za Ukrainu zahinuŭ bieraściejec Aleś Čarkašyn, jašče troje biełarusaŭ zahinuli, vajujučy na baku bajevikoŭ. Chto astatnija 4 čałavieki, nie paviedamlajecca. Možna mierkavać, što heta taksama bajeviki DNR i ŁNR.
Čamu amierykancy tak irvucca na Miesiac, što tam buduć zdabyvać? I što da taho biełarusam? Tłumačyć biełaruski astrafizik8
Kamientary