Biełarusy, jakich rasijskija śpiecsłužby zapisali ŭ «bruselskija śmiarotniki», abvierhli svaju datyčnaść da teraktaŭ
Nam udałosia źviazacca z dvuma bratami, jakich krynica ŭ rasijskich śpiecsłužbach abvinavaciła ŭ datyčnaści da siońniašnich bruselskich teraktaŭ.
Adnaho z karystalnikaŭ sacsietki zavuć Sulejman Doŭbaš, druhoha — Chalid Doŭbaš. Pieršaha raniej zvali Ivan, druhoha — Alaksiej. Jany rodam z Homiela, u Bielhiju pierajechali ŭ 2007-m. Usie siabry na staroncy Chalida Ukantakcie — z Homiela.
Abodva braty abvierhli infarmacyju pra svaju datyčnaść da siońniašnich teraktaŭ u Bruseli. Usim ŚMI jany dasłali identyčnyja adkazy. Na dadatkovyja pytańni, dasłanyja «Našaj Nivaj», jany nie adkazali.
Sulejman Doŭbaš adpisaŭ: «Hetyja artykuły — čarhovaja žoŭtaja presa i biazdumnyja sproby ŭbohich žurnalistaŭ atrymać čarhovuju «zoračku». Pieršy artykuł vyjšaŭ 14 sakavika. Nas tam zapisali ŭ śmiarotniki, pry hetym nas nie šukała palicyja, nam nichto navat nie telefanavaŭ. Nie ličycie dziŭnym? Dla supracoŭnikaŭ palicyi nie składzie ciažkaści pravieryć, vyjazdžali my ŭ Siryju ci nie.
Na dadzieny momant my źviarnulisia ŭ [bielhijskija] śpiecsłužby pa tłumačeńnie situacyi. Tam nam adkazali, što ničoha padobnaha im nie viadoma i suprać nas jany ničoha nie majuć.
I samaje hałoŭnaje, kali my śmiarotniki — čamu my žyvyja ciapier? Kali my terarysty — čamu nas nie zaaryštavali?»
Chalid Doŭbaš u adkaz na pytańnie pra jahonuju suviaź ź Junusavym dadaŭ: «Ja nie budu apraŭdvacca pierad vašymi zdahadkami. Kali ŭ vas jość dokazy, što ja niejkim čynam ź im źviazany, abo ŭvachodziŭ ź im u kantakt, ci stajaŭ ź im na adnoj vulicy, i vy jaho pradstavicie mnie, tady ja budu ličyć darečnym vam adkazać… A pakolki ŭ vas takoj infarmacyi niama i nikoli jaje ŭ vas nie budzie, ja nie stanu apuskacca na ŭzrovień abviaržeńnia vašych vydumak».
Takim čynam, abodva zajavili, što žyvuć u Bielhii i nikoli nie mieli prablemaŭ ź miascovymi śpiecsłužbami.
Varta adznačyć, što chłopcy pakul nijak nie patłumačyli, čamu pamianiali biełaruskija imiony na arabskija. Staronka Ukantakcie Sulejmana Doŭbyša maje nazvu «hagraa».
Rasiejskija ŚMI 14 sakavika napisali pra dvuch biełarusaŭ-bratoŭ, jakija nibyta rychtujuć terakty ŭ Bielhii.
Pres-sakratar KDB Dźmitryj Pabiaržyn paćvierdziŭ, što braty Alaksiej i Ivan Doŭbašy, jakich padazrajuć u arhanizacyi teraktaŭ u Bruseli, sapraŭdy pachodziać ź Biełarusi.
«Tak, jany ŭradžency Biełarusi. KDB viadoma pra ich isnavańnie, u dačynieńni hetych asob viadziecca pravierka», — skazaŭ sp.Pabiaržyn.
Adnosna ich datyčnaści da teraktaŭ KDB infarmacyi nie kamientuje.
«Kajłas, ja idu». Što za biełaruska źnikła ŭ žudasnym sieli ŭ Niepale6
Kamientary