Skandał u Francyi moža źmianić raskład siłaŭ na prezidenckich vybarach. Satyryčnaja hazieta «Kanar anšene» apublikavała rasśledavańnie pra žonku kandydata ŭ prezidenty Francyi ad pravicy Fransua Fijona.
Hazieta piša, što jana tolki ličyłasia pamočnicaj spačatku Fijona, a paśla deputata, jaki zaniaŭ jaho miesca.
Ničoha nie rabiła, ale pry hetym atrymlivała da 7900 jeŭra za miesiac zarobku.
Zakon u Francyi nie zabaraniaje deputatam najmać pamočnikami svajakoŭ, ale pry ŭmovie što jany realna pracujuć. Usiaho kožny deputat maje prava płacić pamočnikam da 9561 jeŭra brudnymi. Fijon i jahony pierajemnik ilvinuju dolu hetaj sumy płacili Pienełopie Fijon.
U Fijonaŭ piaciora dziaciej, i Pienełopa pieravažna zajmałasia chataj i ich hadavańniem.
Choć jana maje dypłom advakata, jana nikoli nidzie nie pracavała jak advakatka i ŭ palityčnaj ci administratyŭnaj dziejnaści niezaŭvažanaja.
Fijon apraŭdvajecca tym, što žonka dapamahała jamu «niezaŭvažna», biez šumichi i publičnaści. Žurnalistaŭ jon abvinavaciŭ u «palivańni hrazioj» i «žančynanienaviśnictvie».
Adnak žurnalisty vyciahnuli i jašče adnu spravu.
U 2012 i 2013 hadach Pienełopa Fijon atrymała 100 tysiač jeŭra hanararu ad vydaŭca Marka Ladre de Lašarjera za pasłuhi «litkansultantki» ŭ časopisie Revue des deux mondes, choć tam vykanała ŭsiaho try małaznačnyja recenzii.
Pieniełopa Fijon naradziłasia va Uelsie. Ź Fijonam jany paznajomilisia, kali jana vučyła movu Maljera ŭ francuzskim univiersitecie.
«Kanar anšene» — paśpiachovy i sučasny anałah biełaruskaha «Vožyka». Heta satyryčnaja hazieta levaha kirunku.
Pravacentryst Fijon byŭ abrany kandydatam ad pravicy. Ličyłasia, što jon maje najbolšyja šancy vyjści ŭ druhi tur vybaraŭ razam z nacyjanalistkaj Marynaj Lo Pen. Akramia ich, za pasadu buduć zmahacca centryst, blizki da finansavych kołaŭ, Emaniuel Makron i kandydat ad Sacyjalistyčnaj partyi, jaki vyznačycca na pieradvybarach nieŭzabavie.
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam2
Kamientary