Biełaruś nie moža biez supracoŭnictva ź Jeŭropaj «dalej raźvivać ekanomiku», zajaviŭ Alaksandr Łukašenka padčas sustrečy z eŭrakamisaram Benitaj Ferera‑Valdner.
Biełaruś nie moža biez supracoŭnictva ź Jeŭropaj «dalej raźvivać ekanomiku», zajaviŭ Alaksandr Łukašenka padčas sustrečy z eŭrakamisaram Benitaj Ferera‑Valdner.
Kiraŭnik Biełarusi Alaksandar Łukašenka vykazaŭ hatoŭnaść adkazać na «niazručnyja pytańni» padčas sustrečy z kamisaram Eŭraźviazu pa zamiežnych suviaziach i palitycy susiedztva Benitaj Ferera‑Valdner.
A.Łukašenka vykazaŭ spadziavańnie, što spadarynia Valdner «nie paškaduje, što pryjechała ŭ Biełaruś», i vykazaŭsia za «absalutna česnuju i ščyruju razmovu».
«Jość palityki, jakija ličać što Łukašenka viadzie niejkuju hulniu z Eŭropaj, što jon taki‑siaki i jon ničoha nie źbirajecca mianiać u krainie i ŭ stasunkach z Eŭropaj. Za ŭsie hady prezydenctva ja nikoli nie dazvoliŭ sabie pavodzicca niačesna. Moža, ja nie padobny da dyplamata ŭ biełaj saročcy, ale liču, što palityka pavinna mieć ščyry charaktar. Navat kali tabie siońnia niazručna, to lepš skazać praŭdu, bo praz peŭny čas usio roŭna vyjavicca chłuśnia, i z sytuacyi budzie vychodzić vielmi składana», — adznačyŭ A.Łukašenka. — «Čaho my chočam ad Eŭropy? My chočam, kab vy razumieli, što Biełaruś — nia tolki hieahrafičny centar hetaha kantynentu, što tut žyvuć vielmi prystojnyja, česnyja, pracavityja ludzi, što tut isnuje suverennaja niezaležnaja dziaržava. Heta vialikaja kaštoŭnaść luboha narodu, i rabić zamach na suverenitet i niezaležnaść, jak by heta niekamu ni chaciełasia, my dazvolić nia možam. My chacieli b narmalnych stasunkaŭ z eŭrapiejskim kantynentam».
Pavodle A.Łukašenki, Biełaruś nia moža biez supracoŭnictva z Eŭropaj «dalej raźvivać ekanomiku». Aproč taho, «finansavyja resursy, kredytavańnie, finansavańnie — taksama dla nas najvažniejšy faktar».
Benita Ferera‑Valdner zajaviła, što heta pieršy vizyt eŭrakamisara ŭ Biełaruś. Na heta A.Łukašenka skazaŭ: «Daj Boh, nie apošni».
Pavodle spadaryni Valdner, hety vizyt symbalizuje najaŭnaść patencyjału, jakija isnuje ŭ stasunkach EZ ź Biełaruśsiu.
«My znachodzimsia na skryžavańni daroh u Eŭropie. Naša ŭzajemadziejańnie pavinna iści vulicaju z dvuchbakovym rucham. Kali taki ruch budzie z vašaha boku, to patencyjał, jaki isnuje ŭ našych stasunkach, budzie realizavany. Krainy‑siabry EZ raniej źviarnulisia da Biełarusi z zaklikam pra vykanańnie šerahu prośbaŭ. Niekatoryja ź ich byli vykanany, i hetyja kroki dazvolili eŭrapiejcam pieraasensavać svaje padychody da vašaj krainy.
My taksama vymušany kanstatavać, što niekatoryja pažadańni ŭsio jašče nia vykanany.Ja chacieła b padkreślić, što kali budzie žadańnie z vašaha boku, to budzie i hatoŭnaść z našaha boku naładžvać naša supracoŭnictva», — zajaviła B.Ferera‑Valdner.
Padčas sustrečy ź ministram zamiežnych spraŭ Biełarusi Siarhiejem Martynavym spadarynia Valdner adznačyła, što aceńvaje svoj vizyt «jak vielmi važny i symbaličny krok. Heta pieršy ŭ historyi vizyt eŭrakamisara ŭ Biełaruś».
S.Martynaŭ zajaviŭ pra hatoŭnaść abmierkavać usie kirunki supracoŭnictva z EZ.
Padčas vizytu baki majuć namier abmierkavać najpierš udzieł Biełarusi ŭ prahramie «Ŭschodniaje partnerstva». Čakajecca, što padčas vizytu ŭ Miensk spadarynia Valdner abvieścić pra vydzialeńnie Biełarusi 10 miljonaŭ eŭra na prahramu pavyšeńnia jakaści praduktaŭ charčavańnia.
Kamientary