«Kab my viedali, što heta zaciahniecca nadoŭha». Užo hod, jak baćka i syn Kuźniečyki žyvuć u šviedskaj ambasadzie ŭ Minsku
«Kali b my viedali, što ŭsio heta tak zaciahniecca nadoŭha, viadoma, razhladali b inšy varyjant, ale nie fakt, što jon byŭ by lepšy», — kaža Uładzisłaŭ Kuźniečyk.
6 vieraśnia 2020 hoda ŭ Viciebsku milicyja žorstka zatrymlivała ŭdzielnikaŭ mirnych pratestaŭ. Vitala Kuźniečyka tady źbili, a Uładzisłaŭ razam ź inšymi ŭdzielnikami akcyi zastupiŭsia za baćku i adabraŭ jaho ŭ milicyjantaŭ.
Kadry razhonu mitynhoŭcaŭ rastyražavali ŚMI. Paśla akcyi na Kuźniečykaŭ zaviali kryminalnuju spravu pavodle artykuła 364 KK RB (Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ).
«Viarnuŭšysia na hod tamu, u situacyi z baćkam, kali jaho źbivali, pastupić pa-inšamu mnie b nie dazvoliła sumleńnie, hetak ža jak i nie chadzić na pratesty», — upeŭnieny Uładzisłaŭ.
11 vieraśnia 2020 hoda mužčyny pryjechali ŭ dyppradstaŭnictva, kab paprasić palityčnaha prytułku, patelefanavali ŭ damafon, ale im adkazali, što ničym dapamahčy nie mohuć. Tady Kuźniečyki pieraleźli praz płot i admovilisia pakidać terytoryju ambasady.
MZS Šviecyi kaža, što zakony krainy nie praduhledžvajuć praceduru atrymańnia palityčnaha prytułku ŭ pasolstvie. Ale i vydać Kuźniečykaŭ biełaruskim uładam pasolstva nie moža.
Jašče ŭ vieraśni 2020 jany źviarnulisia ŭ Kamitet suprać katavańniaŭ sa skarhaj na Šviecyju. Jany zajavili, što, kali ŭ vyniku dziejańniaŭ abo biaździejnaści ŭładaŭ Šviecyi, jany buduć zatrymanyja ŭładami Biełarusi, to sutyknucca z realnaj ryzykaj katavańniaŭ. U listapadzie 2021 hoda Kamitet razhledzić prymalnaść skarhi na Šviecyju. Heta značyć, što Vital i Uładzisłaŭ zmohuć znachodzicca na terytoryi ambasady, jak minimum, da vyniasieńnia Kamitetam rašeńnia pa hetym pytańni, a ŭ vypadku, kali skarhu paličać prymalnaj, to i da jaje razhladu pa sutnaści.
Vital i Uładzisłaŭ raspaviali Deutsche Welle, jak jany žyvuć.
U pasolstvie Vitalu i Uładzisłavu vydzielili pakoj, dzie jość łožki, duš, tualet, pralnaja mašyna, multyvarka, chaładzilnik, posud. Dla zaniatku sportam — turnik, štanha, hiry. Raniej mužčynam prynosili hatovuju ježu, ciapier jany hatujuć sami.
«Heta vialiki plus, čas idzie chutčej, nieabchodnyja pradukty nam kuplajuć, — raspaviadaje Uładzisłaŭ. — Na śviežaje pavietra vychodzim u luby čas. Usie ŭmovy dla žyćcia jość. Adnosiny z supracoŭnikami ambasady dobryja. Praŭda, tut nie dazvoleny televizar i kampjutar, ale ŭ nas jość smartfon».
Raniej u ŚMI źjaŭlałasia infarmacyja, što mužčynam nieabchodna miedycynskaje abśledavańnie, u pryvatnaści, va Uładzisłava ŭ 2019 hodzie vyjavili złajakasny navatvor, taksama jość prablemy sa zrokam, pieryjadyčna jon pavinien naziracca ŭ lekaraŭ. Miedycynskaja dapamoha, sapraŭdy, patrebna, paćvierdziŭ Uładzisłaŭ, ale pytańnie zaraz vyrašajecca.
Kuźniečyki hod nie bačylisia z rodnymi — naviedvańni ŭ pasolstvie zabaronienyja, kamunikacyja tolki pa videasuviazi.
«Dumaješ i pieražyvaješ nie pra siabie, a pra ich, što b jany ni ŭ čym nie mieli patreby, ale dapamahčy nie možaš. Viadoma, siamji ciažka ŭ finansavym płanie, bo hrošy ja zarablaŭ. Za hod maci i žonka pierachvareli na karanavirus, ale, u cełym, trymajucca.
Dzieci sumujuć, kožnuju našu razmovu pytajucca, kali pryjedziem dadomu.
Idealny vychad dla nas — žyć u svajoj krainie, nie bajacca za budučyniu, ale heta stanie mahčymym, kali projduć novyja sumlennyja vybary i vierniecca zakon», — kaža Uładzisłaŭ Kuźniečyk.
Ciapier čytajuć
Muž hałoŭnaj hieraini prapahandysckaha filma BT skončyŭ žyćcio samahubstvam10
Kamientary