Chadźba, badaj, stała samaj papularnaj fizičnaj aktyŭnaściu siońnia. Jana daje vydatnuju nahruzku na serca, treniruje lohkija, dapamahaje skinuć lišniuju vahu i maje jašče tuzin plusaŭ. Tym nie mienš usio bolš ludziej addajuć pieravahu nie chadźbie, a piešamu turyzmu, ci, paprostu, pachodam. Ci nasamreč chadźba i piešy turyzm tak mocna adroźnivajucca miž saboj? I hałoŭnaje — što ź ich bolš karysnaje dla vas, raźbirałasia CNN.
Chadźboj ludzi čaściej zajmajucca ŭ horadzie ci pryharadzie abo na biehavoj darožcy. A ŭ pachody vybirajucca na pryrodu.
Pry chadźbie my ruchajemsia pa bolš-mienš hładkaj pavierchni, a voś u pachodach nam treba to padymacca na ŭzvyšeńni, to spuskacca, iści pa kamianiach ci pieraskokvać jaminy.
Niekatoryja daktary ličać, što abodva hetyja vidy fizičnaj aktyŭnaści adnolkava karysnyja. Što z hetaha bolš pasuje vam — zaležyć ad vašych met.
Kali vašaja zadača — spalić kałoryi
Kab skinuć bolš kałoryj za karaciejšy čas, vam lepš iści ŭ pachod, a nie na špacyr.
Kolki vy zmožacie spalić kałoryj za pachod, zaležyć ad vašaj vahi, składanaści maršruta i ciažkaści placaka. Taksama istotna, u jakoje nadvorje vy vypraŭlajeciesia, kolki vam hod, mužčyna vy ci žančyna.
Prajšoŭšy kala 1,5 km na zvyčajnym špacyry, vy spalicie pryblizna 100 kałoryj, a ŭ pachodzie za takuju ž adlehłaść vy stracicie ŭ dva razy bolš. Kali ž vy voźmiecie jašče i ciažki placak i pojdziecie ŭ miascovaść z krutymi padjomami, za hadzinu vy zmožacie stracić i 500 kałoryj.
Kali ŭ vas nie tak šmat času na treniroŭku
Časta turystyčnyja ściežki, raspracavanyja dla piešaha turyzmu, znachodziacca daloka ad horada. Kali ŭ vas niama času dabiracca da takoj ściežki — idzicie ŭ haradski pachod, tolki nie zabudźcie načapić placak i vybrać rajončyk z uzhorkami. Kali ŭ vas jość pałki dla skandynaŭskaj chadźby i vy budziecie ruchacca chutka, vy spalicie jašče bolš dadatkovych kałoryj.
Kali vas cikavić bolš biudžetny varyjant trenirovak
Tady, viadoma, chadźba. Lohkaja vopratka, zručny abutak — i ŭsio, u pryncypie, što treba na špacyry.
Dla pachodaŭ ža treba parupicca pra šmat drobiaziaŭ dla zručnaści: butelečka dla vady, pierakus, mahčyma, pałki, abutak (lepš horny), vopratka, jakaja dychaje. I ŭsio heta hrošy. Kab dabracca da turystyčnaj ściežki, vy taksama zapłacicie za paliva.
Kali vas chvaluje biaśpieka
Chadźba, naturalna, biaśpiečniejšy varyjant. U horadzie na špacyry vy naŭrad ci sustreniecie dzikich žyvioł. Kali raptam łupanie doždž, vy zaŭždy zmožacie schavacca ŭ kaviarniu ci vyklikać taksi. Nu i zamarycca tak mocna, jak u pachodzie, vy nie zamoryciesia — a značyć, budziecie bolš pilnyja i enierhičnyja.
Kali treba źniać stres
U pryncypie, lubaja fizičnaja aktyŭnaść dobra zdymaje stres i tryvožnaść, a taksama pavyšaje ŭvahu i kancentracyju. Ale pachod jašče doryć adčuvańnie spakoju. Bo ŭ pachodzie vy sutykajeciesia z pryrodaj.
Navat karotkija špacyry pa parku ci prosta pa horadzie — heta našmat lepš, čym chadźba ŭ trenažornaj zali.
Kali ž vy majecie mahčymaść vyjechać u les — jedźcie.
Kamientary