Zaraz budaŭničaja technika raźbiraje kanstrukcyju. Pralot, jaki abvaliŭsia ŭnačy, užo adłučyli ad puciepravoda, jaki taksama budzie demantavany, paviedamlajuć haradskija słužby.
Most abvaliŭsia prykładna a treciaj nočy, kali ruch transpartu i ludziej tam minimalny. Paciarpiełych niama.
Ratavalniki ŭ metach biaśpieki časova zakryli prachod pa leśvicy, što viadzie z boku płoščy Svabody da vulicy Niamiha. Taksama zakryty vychad sa stancyi mietro z boku Vierchniaha horada ŭ napramku pralota.
Źmienieny ruch transpartu (jak mienavita budzie chadzić transpart, čytajcie pa spasyłcy), aŭtobusnyja maršruty puścili ŭ abychod, a tralejbusy nie dachodziać da praśpiekta Pieramožcaŭ. Naprykład, tyja što iduć z boku Malinaŭki i Paŭdniovaha Zachadu, jeduć tolki da płoščy Bahuševiča.
Surjozna paškodžany adzin sa śviatłaforaŭ. U najbližejšyja chviliny bietonnyja kanstrukcyi pačnuć razrazać ratavalniki bienzarezam.
Na miesca zdareńnia pryjechaŭ staršynia Minharvykankama Uładzimir Kucharaŭ. Paviedamlajecca, što jon asabista biare ŭdzieł u pracy apieratyŭnaha štaba pa vyśviatleńni pryčyn zdareńnia.
Raniej staličnyja ŭłady nazvali papiaredniuju viersiju: da abvalvańnia pryviała stomlenaść kanstrukcyj (u suviazi z pracaj mietro i pavyšanaj nahruzkaj z-za vahańnia tempieratur).
«Pracy na puciepravodzie cieraz vulicu Niamiha buduć vieścisia kruhłasutačna. Naša zadača na praciahu dnia zaviaršyć demantaž kanstrukcyj, što abvalilisia. Za tydzień — razabrać uvieś puciepravod. Budaŭnictva novaha pačniecca apieratyŭna, ale pracy zojmuć niekalki miesiacaŭ. Jany buduć vieścisia kruhłasutkava», — zajaviŭ namieśnik staršyni Minharvykankama Alaksandr Darachovič.
Most cieraź Niamihu — častka važnaj transpartnaj arteryi, što viadzie z paŭnočnaha zachadu na paŭdniovy ŭschod horada. A Niamiha pad im złučaje praśpiekt Dziaržynskaha i vulicu Bahdanoviča. Źniknieńnie mosta pryviadzie da pierahruzki alternatyŭnych maršrutaŭ. Minčukoŭ čakajuć niekalki miesiacaŭ zatoraŭ u centry horada.
Kamientary