Try ź piaci rudaŭpraŭleńniaŭ u Salihorsku spynilisia, «Biełaruśkalij» upieršyniu biare kredyty na zarobki
Jak stała viadoma «Našaj Nivie», try ź piaci rudaŭpraŭleńniaŭ na salihorskim «Biełkalii» faktyčna nie kapajuć i nie adhružajuć soli. Heta źviazana z katastrofaj u łahistycy ŭ vyniku sankcyj Jeŭrasajuza i ZŠA.
«Kalektyvu ŭsio tłumačać ramontnymi rabotami i abiacajuć, što ŭsio naładzicca», — kaža surazmoŭca «Našaj Nivy».
Pavodle znajomych ź situacyjaj, nievialikija adhruzki na ekspart z «Biełkalija» praciahvajucca, jakija «pa drobiazi sprabujuć raśpichać praz Rasiju, bo matematyka kaliju ciapier dazvalaje zarabić navat takim čynam», dla hetaha chapaje mocy dvuch rudnikoŭ.
Dniami ŭ intervju ministr finansaŭ Juryj Sielivierstaŭ pryznaŭ, što jość prablemy z pastupleńniami płaciažoŭ ad siektaraŭ ekanomiki, jakija trapili pad sankcyi i pakul nie pierastroilisia, — ekspart kalijnych uhnajeńniaŭ i naftapraduktaŭ.
«Čakany termin hatoŭnaści terminała pad Sankt-Piecierburham, praź jaki možna było b vazić kalij moram paśla błakavańnia ŭ Litvie — tolki kaniec 2023 hoda, i heta aptymistyčnyja acenki, jakija zakładvalisia jašče da vajny», — dadajuć znajomyja ź situacyjaj.
Bolš za toje, terminał moža akazacca nieprydatnym, kali jeŭrapiejskija krainy zabaroniać uvachod rasijskich sudnaŭ u svaje porty. Takaja opcyja lažyć na stale ŭ jeŭrapiejskich stalicach u kompleksie z handlovaj błakadaj Rasii. Na taki krok Jeŭropa pojdzie, kali Rasija nie spynić vajny va Ukrainie — vajny, dla jakoj Alaksandr Łukašenka dazvoliŭ vykarystać Biełaruś u jakaści ŭdarnaha płacdarma.
Vialiki łahistyčny ŭdar «Biełkalij» atrymaŭ i paśla aryštu Ukrainaj va ŭmovach vajennaha stanovišča piaci tysiač vahonaŭ biełaruskaj čyhunki, jakija ciapier krytyčna nieabchodnyja, kab vazić u Rasiju. Cana kožnaha ź ich kala 80 tysiač dołaraŭ. Jašče da ich aryštu isnavali płany zamović na «Urałvahonzavodzie» jašče dadatkovyja try tysiačy, ale ciapier treba vosiem.
«Biełaruśkalij» upieršyniu źviarnuŭsia da adnaho ź dziaržaŭnych bankaŭ dla finansavańnia vypłaty zarobkaŭ rabotnikam», — kaža surazmoŭca «Našaj Nivy».
Nahadajem, siońnia Łukašenka pryznačyŭ kiraŭnikom «Biełaruskaj kalijnaj kampanii» — trejdara biełaruskaha kaliju — śpiecyjalista pa handli zbrojaj Alaksieja Skrahu. Da taho jon uznačalvaŭ «Biełśpiecźnieštechniku» — eksparciora ŭzbrajeńniaŭ. «Zaraz praca na kalijnym rynku budzie padobnaja da handlu zbrojaj», — zajaviŭ Alaksandr Łukašenka padčas pryznačeńnia.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna23
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1414
Kamientary