Što pahladzieć. «Usio paŭsiul i adrazu» — talenavitaja i viasiołaja fantastyka
Nazva novaj amierykanskaj stužki «Usio paŭsiul i adrazu» (Everything Everywhere All at Once), jakuju vam siońnia prapanujem, moža hučać zabłytana, ale svaja dola praŭdy ŭ joj jość. Hety film — sapraŭdy ŭsio paŭsiul i adrazu: jon nadzvyčajna ambicyjny i pry hetym aryhinalny, a časam i ŭvohule hałavakružny, z notkami fantastyki, kamiedyi i dramy.
Naša hałoŭnaja hierainia — Evielin Van, amierykanka kitajskaha pachodžańnia. Heta žančyna siarednich hadoŭ, jana trymaje pralniu, žyvie žyćciom, jakoje padajecca banalnym i davoli chaatyčnym. My znajomimsia z Evielin u idealna vykananym pačatkovym epizodzie karciny, jakaść jakoha daje pieršaje ŭjaŭleńnie pra virtuoznuju režysuru stvaralnikaŭ stužki Dena Kvana i Denieła Šajnierta.
Na našych vačach Van sprabuje dać rady, zdajecca, usim mahčymym biedam adrazu: u jaje chvareje baćka, dačka-padletak jaje nie lubić, z mužam u jaje taksama prablemy, i tut jašče padatkovaja pravierka, piša RadioTimes.
Hety pieršy etap stužki vielmi važny z punktu hledžańnia siužeta. Astatniaja, fantastyčnaja, častka filma ŭpłyvaje na hledača tolki praz toje, jak dobra byli pradumanyja ŭ pačatku adnosiny i pavodziny piersanažaŭ, i tamu nam jość pra kaho chvalavacca ŭ filmie, kali padziei robiacca krychu varjackimi.
I heta nie žart. Pierad sustrečaj z padatkovym inśpiektaram da Evielin padychodzić mužčyna, jaki vyhladaje vielmi padobnym da jaje muža, voś tolki pavodzić siabie našmat surjoźniej. Hety tajamničy nieznajomiec — Alfa Vejmand, viersija jaje muža z paralelnaha suśvietu, jaki prybyŭ u suśviet Evielin, kab zavierbavać jaje dla vykanańnia važnaj zadačy.
I voś my ŭžo traplajem u inšy śviet — ci, chutčej, u mnostva vielmi roznych suśvietaŭ. Kancepcyja paralelnych suśvietaŭ adkryvaje dla nas biaźmiežnyja mahčymaści, i «Usio paŭsiul i adrazu» ŭpraŭlajecca ź imi našmat cikaviej, čym, naprykład, bolš viadomaja saha pra doktara Strendža, jakaja vyhladaje ŭ paraŭnańni z hetaj stužkaj dziŭna prostaj. Što važna, u historyju z paralelnymi suśvietami režysiory ŭplatajuć jak cudoŭna pastaŭlenyja sceny pajadynkaŭ, tak i humar u svaim unikalnym styli.
Hety humar časta biessaromna absurdny. I chacia časam žarty ŭ stužcy hučać zanadta pa-dziciačamu, u filmie jość bolš čym dastatkova pryčyn ščyra śmiajacca ŭhołas. Niekatoryja z takich momantaŭ pradstaŭlenyja jak spasyłki na inšyja filmy, u tym liku na «Ratatuj» i «2001: Kaśmičnuju adysieju».
«Usio paŭsiul i adrazu» — heta dakładna film nie dla kožnaha, bo kamuści jon moža padacca zanadta infantylnym. Ale kali vy prosta prymiecie heta i davieryciesia siužetu, vy znojdziecie ŭ karcinie šmat taho, što moža prynieści vam zadavalnieńnie, u tym liku i dobruju žyćciaśćviardžalnuju vysnovu. «Usio paŭsiul i adrazu» — viasioły i cikavy sposab daśledavać siamiejnyja adnosiny i ekzistencyjalnyja temy.
Rejtynhi na vialikich suśvietnych resursach:
IMDB — 8,3 / 10
Rotten Tomatoes — 95%
«Budzie baleć» — ščyry i emacyjny sieryjał pra miedycynu. Vielmi dobry
Netflix aficyjna praanansavaŭ druhi siezon sieryjała «Hulnia ŭ kalmara». Chto z hierojaŭ viartajecca?
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary