Tannyja mikradrony-zabojcy sa štučnym intelektam usio čaściej vykarystoŭvajucca ŭ vajennych kanfliktach. U čym ich niebiaśpieka?

U žniŭni Brytanija abviaściła ab adpraŭcy ŭ Kijeŭ 850 mikradronaŭ Black Hornet. Jany mohuć dać ukrainskim vojskam vyrašalnuju pieravahu ŭ žorstkich haradskich bajach. 

Black Hornets padobnyja da dziciačaj cacki. Pamieram krychu bolšyja za 15 sm i vahoj krychu mienšyja za ślivu, jany mohuć prabiracca navat u vokny. Z-za minimalnaha šumu padčas ruchu jany mohuć padbiracca niepasredna da praciŭnika, zalatać prosta ŭhłyb rasijskich abarončych pazicyj i pieradavać kadry z vysokim razroźnieńniem sa śpiecyjalnych kamier. Hornet kirujecca praź nievialiki płanšet i ručny kantroler.

Vajna va Ukrainie pryviała da revalucyi ŭ raspracoŭcy bieśpiłotnikaŭ: kamiercyjnyja i bytavyja madeli madyfikujucca dla vajennych celaŭ. Niebiaśpieka dronaŭ nie tolki pramaja, ale i ŭskosnaja. Ich vykarystańnie (navat samych prostych i prymityŭnych madelaŭ) padryvaje maralny duch praciŭnikaŭ, adznačaje The Telegraph.

Jakija mohuć być niebiaśpieki ad takich pryład?

Maralna-etyčnyja pytańni

Niahledziačy na vidavočna pazityŭny prykład vykarystańnia dronaŭ ukraincami dla abarony svajoj krainy, vykarystańnie mini-robataŭ-zabojcaŭ vyklikaje zaniepakojenaść. Užo chutka stanie mahčymym stvareńnie nievialikaha i niedarahoha bieśpiłotnika, jaki budzie vykarystoŭvać funkcyju raspaznavańnia tvaraŭ dla zabojstva kankretnaha čałavieka.

Navukoŭcy śćviardžajuć, što technałohii, nieabchodnyja dla śmiarotnaha mikradrona takoha typu, užo isnujuć. Ich prosta treba ŭ niekatorych śfierach palepšyć, skaracić vydatki i intehravać.

Pavialičyć

Tym bolš, što ŭ budučyni mahčymyja pryłady, jakija pracujuć jak častka «roju» i palujuć adrazu na hrupu ludziej.

Miery biaśpieki bolš nie dziejničajuć

Aŭtanomny śmiarotny bieśpiłotnik tureckaj vytvorčaści Kargu-2 vykarystoŭvaŭsia ŭ 2020 hodzie ŭ bajach u Livii. Letaś paviedamlałasia, što armija Izraila vykarystała hrupu bieśpiłotnikaŭ dla vyznačeńnia miescaznachodžańnia, identyfikacyi i napadu na bajevikoŭ CHAMAS.

Moža ŭźniknuć łahičnaje pytańnie: i što nam ad hetaha?

Hałoŭnaja niebiaśpieka ad mikradronaŭ u tym, što ich vielmi prosta maštabavać. Kali vypuścić z samalota tysiačy mikradronaŭ nad umoŭnym horadam praciŭnika, to faktyčna jany stanuć zbrojaj masavaha źniščeńnia.

Dy i sami drony robiacca ŭsio bolš dastupnymi. Naprykład, Black Hornet za niekalki hadoŭ patańnieŭ ažno ŭ 8 razoŭ.

Vielmi składana stvaryć ułasnuju jadziernuju zbroju ci navat kupić jaje. A voś tannyja drony mohuć stać pryvabnaj alternatyvaj dla niekatorych aŭtarytarnych dziaržaŭ i terarystyčnych hrupovak.

Prahramavańnie bieśpiłotnikaŭ dla napadu na ludziej sa zbrojaj u vajskovaj formie — technałahična vielmi prostaja zadača. Ale možna jašče aŭtamatyčna adsočvać vykarystańnie mabilnych telefonaŭ i zabivać cyvilnych asob, jakija, naprykład, raźmiaščajuć niepažadany kantent u Twitter ci Instagram.

Ciapier śpiecyjalisty śćviardžajuć, što na stvareńnie surjoznaj zbroi z vykarystańniem roju dronaŭ-zabojcaŭ moža spatrebicca ŭsiaho 18 miesiacaŭ. Źjaŭlajecca vializnaja etyčnaja prablema, kali mašyny buduć vyrašać, kaho zabivać.

• 16
• 0
• 0
• 1
• 21
• 5
• 6
• 0