Štat EPAM u Biełarusi letaś skaraciŭsia napałovu. A litoŭskaja kamanda vyrasła ŭ 4,5 raza
EPAM apublikavaŭ źviestki ab kolkaści supracoŭnikaŭ u roznych łakacyjach. Štat vytvorčych śpiecyjalistaŭ u Biełarusi za apošni hod skaraciŭsia bolš čym na 50%. Pa kolkaści supracoŭnikaŭ biełaruski ofis prajhraje ŭžo nie tolki ofisu va Ukrainie, ale taksama ŭ Polščy i Indyi, piša Dev.by.
Pa danych EPAM, kali na kaniec 2021 hoda ŭ ofisach kampanii ŭ Biełarusi pracavała 9,4 tysiačy vytvorčych śpiecyjalistaŭ, to na kaniec 2022 hoda ŭ dva razy mienš — usiaho 4,5 tysiačy čałaviek.
U lik vytvorčych śpiecyjalistaŭ EPAM uklučaje nie tolki inžynieraŭ, heta i inšyja pazicyi na IT-prajektach.
Pavodle infarmacyi Dev.by, usiaho ŭ biełaruskim EPAM na kaniec 2022 hoda — z ulikam usich śpiecyjalistaŭ — zastałosia kala 6 tysiač čałaviek z 10+ tysiač.
Apošni raz mienš za 5 tysiač vytvorčych supracoŭnikaŭ u štacie było 8 hadoŭ tamu — u 2014 hodzie.
U pieršuju chvalu rełakacyi (paśla vybaraŭ — u 2020-2021 hadach) štat biełaruskaha ofisa EPAM nie mocna paciarpieŭ. Kampanija znajšła zamienu śpiecyjalistam, jakija źjechali ci zvolnilisia.
Druhaja chvala rełakacyi — paśla pačatku poŭnamaštabnaha ŭvarvańnia Rasii va Ukrainu — akazałasia bolš maštabnaj. EPAM pryjšłosia pieravozić supracoŭnikaŭ u inšyja łakacyi, tamu što častka zakazčykaŭ admoviłasia pracavać z ajcišnikami ŭ Biełarusi. Niekatoryja zakazčyki syšli z krainy z-za ryzyk i sankcyj i prypynili prajekty.
Adtok śpiecyjalistaŭ taksama spravakavali aściarohi nakont mahčymaj mabilizacyi.
Akramia taho, u minułym hodzie praciahvalisia zatrymańni ajcišnikaŭ, u tym liku z EPAM, pa palityčnych matyvach.
Z-za rezkaha adtoku śpiecyjalistaŭ biełaruski ofis EPAM vypaŭ z top-3 samych bujnych łakacyj u kampanii.
Samy bujny ofis EPAM pa-raniejšamu va Ukrainie. Na kaniec minułaha hoda tam pracavała 10,5 tysiačy vytvorčych śpiecyjalistaŭ. Pryčym praz vajnu ŭkrainskaja kamanda skaraciłasia nie tak mocna, jak biełaruskaja — usiaho na 15%.
Sumarna ŭ Biełarusi i Ukrainie na kaniec minułaha hoda pracavała 15 tysiač vytvorčych śpiecyjalistaŭ — 28,4% ad hłabalnaha štatu EPAM. Za hod biełaruska-ŭkrainskaja kamanda skaraciłasia amal na 7 tysiač śpiecyjalistaŭ.
Heta zapłanavanaje skaračeńnie, a vynikovaja ličba supadaje z raźlikami Dev.by, zroblenymi raniej z ulikam płanaŭ EPAM.
U traŭni Arkadź Dobkin zajaviŭ, što da kanca 2022 hoda kampanija źbirajecca skaracić kamandu vytvorčaha štatu ŭ rehijonie prykładna da 30% ad hłabalnaha.
U spravazdačnaści EPAM nie zhadvajecca Rasija, jakaja ŭvachodziła da lutaha 2022-ha ŭ top-3 samych bujnych łakacyj. Paśla pačatku vajny EPAM zajaviŭ pra sychod z rasijskaha rynku. Na kaniec druhoha kvartała z 9+ tysiač supracoŭnikaŭ tam zastavalisia pracavać kala tysiačy.
Zatoje ŭ top-3 niečakana akazaŭsia ofis u Indyi. Za minuły hod kamanda vytvorčych śpiecyjalistaŭ tam vyrasła na 35% da 5,9 tysiačy čałaviek.
Intensiŭna letaś rasła kamanda EPAM u Polščy. Kali na kaniec 2021 u štacie pracavała 3+ tysiačy vytvorčych śpiecyjalistaŭ, to na kaniec minułaha hoda na 85% bolš — amal 5,7 tysiačy. A ahulny štat EPAM u Polščy z ulikam usich śpiecyjalistaŭ na siońnia pieravyšaje 7 tysiač čałaviek (u kancy 2021 było 4+ tysiačy).
U 4,5 razu vyrasła za minuły hod kamanda EPAM u Litvie. Ciapier u štacie 1,5+ tysiačy zarehistravanych śpiecyjalistaŭ. Akramia taho, EPAM Sistemos upieršyniu stała najbujniejšym IT-biznesam Litvy pa sumie vypłačanych padatkaŭ. Za 2022 hod dačka EPAM vypłaciła ŭ litoŭski biudžet 10,4 miljona jeŭra padatkaŭ — u 6,5 razu bolš, čym u 2021 hodzie.
Ciapier čytajuć
Jak vyhladaje pomnik na mahile Ramana Bandarenki FOTAFAKT6
Kamientary