Teołah prakamientavała prapanovu Kačanavaj arhanizoŭvać prytułki dla dziaciej pry manastyrach
Učora na naradzie staršynia Savieta Respubliki Natalla Kačanava prapanavała arhanizoŭvać prytułki dla dziaciej pry manastyrach. Teołah Natalla Vasilevič patłumačyła «Našaj Nivie», jakuju niebiaśpieku heta moža nieści i čamu raptam u Kačanavaj mahła ŭźniknuć takaja ideja.
Na naradzie ŭ Kačanavaj abmiarkoŭvałasia pytańnie ab mahčymaści arhanizacyi pry manastyrach prytułkaŭ dla dziaciej, čyje baćki pazbaŭlenyja baćkoŭskich pravoŭ.
«Siońnia ja chaču dać start prajektu, jaki mianie kranuŭ da hłybini dušy. U chodzie majho vizitu ŭ Maskvu my damovilisia sa staršynioj Savieta Fiederacyi Valancinaj Ivanaŭnaj Maćvijenka, što naviedajem Pakroŭski manastyr. Matuška Fieafanija nam pakazała prytułak dla dziaciej, čyje baćki pazbaŭlenyja baćkoŭskich pravoŭ. U Rasii dazvolena pry manastyrach stvarać prytułki. U pryvatnaści, u Pakroŭskim manastyry ŭžo dosyć vialiki dośvied pracy ź dziećmi. Nastupnaja sacyjalizacyja vychavancaŭ prytułku pakazvaje paśpiachovyja vyniki», — adznačyła Natalla Kačanava.
Uličvajučy toje, što ciapier pytańnie ź dziećmi palityčna adčuvalnaje z-za situacyi ich masavaj departacyi z Ukrainy ŭ Rasiju, a taksama, mahčyma, i ŭ Biełaruś, teołah nie vyklučaje, što takaja zajava moža być padrychtoŭkaj da ŭładkavańnia takim čynam hetych dziaciej z metaj źmieny ich identyčnaści.
«Ź inšaha boku, heta moža być čysta papuliscki krok. Typu dziaržava z carkvoj kłapociacca pra kaho-niebudź», — kaža Natalla.
Ale naŭrad ci takija prytułki pry manastyrach źjaviacca, ličyć jana. Dla taho, kab naładzić takuju sistemu, treba stvaryć cełuju infrastrukturu, patrebna šmat resursaŭ, jakich ciapier niama.
«Pradstaŭniki režymu vielmi časta vystupajuć z roznymi prajektami. Jany ž ciapier u situacyi, kali hramadstva im ničoha nie skaža (bo chto skaža, toj siadzie), tamu jany tranślujuć svaje dziŭnyja idei», — raskazvaje jana.
Uvohule praktyka najaŭnaści takich prytułkaŭ pry manastyrach była doŭhi čas abumoŭlena histaryčna.
«Tolki ŭ manastyroŭ, jak jačejek hramadzianskaj supolnaści, byli resursy, kab heta rabić. Raniej dziaržaŭnych takich ustanoŭ nie było. Usio rabiłasia namahannymi carkoŭnaj supolnaści i supołak miłasernaści».
U Jeŭropie takich prytułkaŭ šmat. Ale pytańnie ŭ tym, što kali takija ŭstanovy stvarajucca ŭ zakrytym hramadstvie, jak pry biełaruskaj uładzie, isnuje niebiaśpieka złoŭžyvańnia siłaj.
«Viedajem vypadki, kali ŭ padobnych manastyrskich prytułkach byvajuć seksualnyja złoŭžyvańni. Takija zakrytyja sistemy, jak dziciačyja prytułki, relihijnyja škoły staroha ŭzoru padviarhajucca krytycy. Šmat skandałaŭ z hetym źviazana ŭ toj ža Rasii. Pryčym skandały, jakija vyjšli na dziaržaŭny ŭzrovień.
Naprykład, zasnavalnik Siarednieŭralskaha žanočaha manastyra ihumien Sierhij Ramanaŭ ździekavaŭsia ź dziaciej (ihumiena Sierhija (Mikałaja Ramanava) sud pryhavaryŭ da troch z pałovaj hadoŭ kałonii ahulnaha režymu pa abvinavačańni ŭ samaŭpraŭstvie, parušeńni prava na svabodu vieravyznańnia i schileńni da samahubstva. — NN). U vyniku hety manastyr sami rasijskija ŭłady razahnali. Isnuje niebiaśpieka takich relihijnych ustanoŭ».
Ź inšaha boku, lubaja relihijnaja arhanizacyja chacieła b mieć mahčymaść realizoŭvać roznyja sacyjalnyja prajekty, adznačaje Natalla.
«U hramadstvie, dzie isnuje prazrystaść i peŭnyja standarty, — heta pazityŭny momant. Takaja niebiaśpieka zdymajecca. U toj ža Niamiečynie niama paniaćcia «dziciačy prytułak», tam jość roznyja sacyjalnyja prajekty, ź jakimi pracujuć cerkvy.
My viedajem stan našaj dziaržavy, cerkvaŭ i toje, u jakim stanoviščy ciapier naša hramadzianskaja supolnaść. Što ni rabi — atrymlivajecca KPSS, jaki kampjutar ni stvaraj — atrymlivajecca aŭtamat. Takaja łohika hetaj sistemy, usio pabudavana na chłuśni, hvałcie, biezzakońni. U takoj sistemie lubaja prapanova pieratvorycca ŭ niešta sa znakam minus», — miarkuje Natalla Vasilevič.
Čytajcie taksama:
Kačanava prapanavała arhanizoŭvać prytułki dla dziaciej pry manastyrach
U Mahilovie padčas nabaženstva hraŭ na arhanie sam miascovy biskup VIDEA
Abychodzić sankcyi «kašalku Łukašenki» Zajcavu dapamahaje staŭbcoŭski ksiondz Łašuk — BRC
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary