Biełarusy zasnavali ŭ Polščy NDA. Chočuć abjadnoŭvać ludziej praz sport

«Naša Niva» pahutaryła z Maryjaj Žuravaj, hienieralnaj sakratarkaj inicyjatyvy. Žurava — spartovaja jurystka, pracavała ŭ arhkamitecie minskich Jeŭrapiejskich hulniaŭ i supracoŭničała z palitźniavolenym advakatam Alaksandram Danilevičam.

Pavodle Maryi, FreeSPOrT musić stać płatformaj, dzie praz sport mohuć abjadnoŭvacca ludzi z roznymi dumkami i mierkavańniami i znachodzić parazumieńnie. Jaje stvaralniki-biełarusy imknucca supracoŭničać i z pradstaŭnikami inšych krain, meta — mižkulturny abmien i jakasnaja kamunikacyja dziela sacyjalizacyi ludziej i raźvićcia hramadskaj supolnaści. 

U stvareńni arhanizacyi akramia Žuravaj udzielničaŭ były hiendyrektar FK BATE Michaił Zaleŭski, znakamity biełaruski sambist Ściapan Papoŭ i Vieranika Bialaŭskaja, ekśpiertka z dośviedam niefarmalnaj adukacyi. 

Adzin z kirunkaŭ pracy arhanizacyi — abarona spartoŭcaŭ, Justice for SPOrT. Maryja jak spartovaja jurystka i Michaił jak spartovy mieniedžar majuć dośvied padtrymki spartoŭcaŭ, jakija sutykajucca z dyskryminacyjaj u roznych formach, i kantakty, jakija dapamahajuć heta rabić. Ale arhanizacyja nie prysvojvaje sabie rolu pradstaŭnictva biełaruskaha prafiesijnaha sportu, takuju dziejnaść tut płanujuć ładzić tolki na zapyt kankretnych spartoŭcaŭ. Žurava tłumačyć, što zajmajecca abaronaj pravoŭ spartoŭcaŭ z 2016 hoda. Raskazvaje, što pačynała karjeru z udziełu ŭ dopinhavych spravach u dačynieńni da biełaruskich spartoŭcaŭ u hrebli na kanoe i nie tolki. 

Ciapier Maryja zajmajecca pytańniem dopusku biełaruskich spartoŭcaŭ, jakija vystupili suprać režymu, da mižnarodnych spabornictvaŭ.

Ale chodu hetych pracesaŭ nie kamientuje — prosić pačakać vynikaŭ. Dzielicca tolki, što na hety kont FreeSPOrT pracuje ŭ tym liku i ź mižnarodnymi arhanizacyjami. Heta i polskaje Minsportu, i mižnarodnyja fiederacyi roznych vidaŭ sportu, i hramadskija abjadnańni, jakija zajmajucca amatarskimi turnirami i marafonami. Jurystka padkreślivaje: prava na ŭdzieł spartoŭcaŭ u spabornictvach nie musić być zasnavanaje vyklučna na hramadzianstvie spartoŭca.

Taksama, raskazvaje Žurava, arhanizacyja budzie zajmacca niefarmalnaj adukacyjaj: «Adna z našych zasnavalnic, Vieranika Bialaŭskaja, maje dośvied jeŭrapiejskaj adukacyi, u tym liku praz prahramu Erasmus. Naša meta — abmiarkoŭvać prablemy supolnaści, znachodzić rašeńni. Miarkujem, što da novych viedaŭ možna imknucca praz praktyku».

FreeSPOrT płanuje arhanizoŭvać amatarskija turniry, siabroŭskija matčy, siamiejnyja vychadnyja i inšyja spartovyja mierapryjemstvy pa roznych vidach sportu — nie tolki pa raspaŭsiudžanych futbole, baskietbole, valejbole, ale i pa bolš ekzatyčnych vidach nakštałt siorfinhu na sapach.

Pieršyja mierapryjemstvy adbuducca ŭžo chutka. 19 žniŭnia ŭ Varšavie projdzie futbolny Kubak Ivulina, na jaki zarehistravanyja 30 kamand, razhladajecca ŭdzieł kamand z Polščy i Ukrainy. 

A 29 lipienia FreeSPOrT arhanizujuć u polskim Sopacie turnir pa plažnym valejbole. Siarod udzielnikaŭ — televiadoŭca Dzianis Dudzinski, baskietbalist Mikita Mieščarakoŭ i eks-płyŭčycha Alaksandra Hierasimienia, jakaja raniej kiravała Fondam spartovaj salidarnaści. Žurava ŭdakładniaje, što na siońnia Hierasimienia tolki hulaje za FreeSPOrT na valejbolnaj placoŭcy, pra niešta bolšaje havorki nie idzie.

Maryja dzielicca, što FreeSPOrT imkniecca ŭzmacniać suviazi pamiž biełarusami, kab na adnoj płatformie abjadnać ludziej z roznymi cikavaściami i mierkavańniami. Biudžet arhanizacyi jašče raspracoŭvajecca, i ź ciaham času NDA płanuje zajmieć raznastajnyja krynicy finansavańnia dla bolšaj ustojlivaści. Pavodle Maryi, FreeSPOrT płanuje i kamiercyjnuju aktyŭnaść.

«Bali i abdymanki z Łukašenkam — nie palityka?» Spytali ŭ sumlennych spartsmienaŭ, ci varta źniać spartovy ban z Rasii i Biełarusi

Papoŭ: Naš vorah — nie taki vialiki, heta ŭsio tyja ž 3%, i jano vylezie

Ad Šviejcaryi da Novaj Ziełandyi. Piać krutych futbalistak z žanočaha čempijanatu śvietu

• 6
• 0
• 1
• 0
• 0
• 0
• 1
• 0