Pratesty paśla vybaraŭ u Sierbii: demanstranty błakujuć vulicy ŭ Białhradzie

Pratesty nasili mirny charaktar ​​da niadzieli 24 śniežnia, kali lidary apazicyi pasprabavali ŭvajści ŭ budynak haradskoj asamblei Białhrada, što vyklikała sutyknieńni pamiž demanstrantami i palicyjaj.

Paciarpieła niekalki ŭdzielnikaŭ pratestaŭ i palicyjantaŭ, było aryštavana 38 čałaviek.

U paniadziełak pierad budynkam Ministerstva samakiravańnia sabralisia sotni studentaŭ, jakija zapatrabavali rasśledavać parušeńni ŭ śpisach vybarščykaŭ i padazreńni ŭ kradziažy hałasoŭ.

Jany zabłakavali skryžavańnie vulic, dzie raźmieščany ŭradavyja budynki. 

U ministerstvie śćviardžajuć, što nijakich parušeńniaŭ padčas vybaraŭ nie było, a ŭsie zajavy ab tak zvanych «fantomnych vybarščykach» — vydumka.

«U nas jość dva varyjanty: siadzieć doma i čakać, pakul chto-niebudź vyrašyć našu prablemu — jak žyć u krainie, dzie niama pravoŭ i spraviadlivaści, ci my možam pasprabavać niešta zrabić», — zajaviŭ Sierbskaj słužbie Bi-bi-si adzin sa studentaŭ.

«Nas abrabavali jak nacyju, heta vialikaja niespraviadlivaść, pra jakuju ludzi vielmi doŭha maŭčali», — kaža studentka Kaciaryna Kavačova.

Ułady, u svaju čarhu, pahražajuć pryciahnuć da adkaznaści ŭsich vinavatych u biesparadkach.

«Luby vid hvałtu, pierakryćcie ruchu transpartu, mastoŭ, usio, što parušaje narmalnaje žyćcio hramadzian, niedapuščalna», — zajaviŭ kiraŭnik upraŭleńnia palicyi Ivica Iŭkovič.

Apazicyja abvinavačvaje prezidenta Sierbii Alaksandra Vučyča i jaho kirujučuju Sierbskuju prahresiŭnuju partyju (SPP) u padtasoŭcy vynikaŭ vybaraŭ šlacham ukidu biuleteniaŭ, podkupu vybarščykaŭ i inšymi sposabami. 

SPP, pavodle aficyjnych źviestak, sabrała na parłamienckich vybarach bolš za 47% hałasoŭ i zastałasia va ŭładzie. U Białhradzie jana taksama nabrała bolš za ŭsich hałasoŭ, adnak nie zmoža samastojna sfarmiravać kirujučuju kaalicyju.

Asabliva aburyli apazicyju vybary ŭ haradskuju radu Białhrada: na jaje dumku, ułady masava zavieźli z pravincyi tych vybarščykaŭ, jakija ščyra ci z karyści padtrymlivajuć kirujučuju partyju.

Miascovyja i mižnarodnyja naziralniki taksama paviedamlali ab parušeńniach padčas vybaraŭ, adnak urad abviarhaje ŭsie abvinavačańni i nazyvaje vybary «samymi spraviadlivymi na siońniašni dzień u Sierbii». 

Čaho damahajucca pratestoŭcy

Adzin z udzielnikaŭ demanstracyi, student Ivan Bielič zajaviŭ, što ŭ śpisach vybarščykaŭ jość parušeńni i jość padazreńni ŭ kradziažy hałasoŭ.

Ad imia prysutnych jon zapatrabavaŭ ad Ministerstva dziaržaŭnaha kiravańnia i miascovaha samakiravańnia pravieryć i abnavić śpisy vybarščykaŭ i rasśledavać abvinavačańni ŭ kradziažy hałasoŭ.

Aficyjna abvieščanyja vyniki pryvitali takija palityki, jak Uładzimir Pucin i Viktar Orban.

Uviečary ŭ niadzielu Vučyč vystupiŭ z ekstranym zvarotam da nacyi, zajaviŭšy, što chvalavańni spravakavanyja źniešnim umiašańniem. Jon nie staŭ udakładniać krynicu «ŭmiašańnia».

«Tyja, chto klalisia zmahacca suprać hvałtu, tolki što paćvierdzili, što jany i jość sapraŭdnyja bandyty», — skazaŭ prezident Sierbii.

• 8
• 0
• 3
• 2
• 5
• 1
• 1
• 0