Hierainia Biełarusi ci zvyčajnaja kaśmičnaja turystka? Niuansy palotu ŭ kosmas Maryny Vasileŭskaj
Ci moža luby achvotny paŭtaryć šlach Maryny Vasileŭskaj i źlatać na Mižnarodnuju kaśmičnuju stancyju?
U filmie «Ciažki šlach u kosmas», jaki Biełteleradyjokampanija pryśviaciła palotu pieršaj biełaruski ŭ kosmas, ahučvajecca cikavy fakt: zvyčajna na padrychtoŭku kasmanaŭta treba 5-7 hadoŭ, ale pry hetym Marynu Vasileŭskuju padrychtavali ŭsiaho za 6 miesiacaŭ. Jak ža tak atrymałasia?
Kali dziaŭčyna biez profilnaj adukacyi sapraŭdy zasvoiła prahramu ŭ 10-14 razoŭ chutčej, čym tyja, chto zaraz na MKS, dyk, moža, jaje varta było pakinuć pracavać u kaśmičnaj śfiery?
Ale, zdajecca, usio tłumačycca prosta: Marynu rychtavali nie jak sapraŭdnuju kasmanaŭtku, a jak kaśmičnuju turystku. Na sajcie «Hałoŭkosmasa» (kamiercyjny apieratar «Raskosmasa») možna znajści rekłamu kamiercyjnych palotaŭ na MKS.
Jość dva varyjanty prahramy: bazavaja i dadatkovaja. Bazavaja ŭklučaje ŭ siabie miedycynskaje abśledavańnie, kurs padrychtoŭki na asnovie indyvidualna raspracavanaj prahramy na bazie «Centra padrychtoŭki kasmanataŭ imia Haharyna», palot na MKS na borcie kaśmičnaha karabla «Sajuz MS», znachodžańnie na MKS (adznačana, što standartny termin znachodžańnia tam 10 dzion, ale jon moža być pavialičany, kali zakazčyk zachoča), pryziamleńnie ŭ Karahandzie (praca pošukava-vyratavalnych słužbaŭ uklučanaja ŭ košt) i paślapalotnaja reabilitacyja.
Kab kaśmičny turyst nie zasumavaŭ na MKS, śpiecyjalisty zahadzia raspracoŭvajuć dla jaho indyvidualnuju prahramu. Rekłama abiacaje, što turyst stanie častkaj kamandy i zmoža paŭdzielničać u sapraŭdnych navukovych ekśpierymientach — a potym, vidać, raskazvać pa telebačańni, što dapamahaŭ stvarać kiefir dla kasmanaŭtaŭ.
U jakaści pryjemnych bonusaŭ zhadanaja mahčymaść zajmacca sportam u biazvažkaści, a taksama rabić pryhožyja fota i dzialicca imi anłajn.
U dadatkovuju prahramu ŭvachodzić treniroŭka va ŭmovach biazvažkaści pierad palotam, raspracoŭka «haściavoha naboru» kaśmičnaha charčavańnia, znachodžańnie na MKS da 30 dzion, vychad u adkryty kosmas, raspracoŭka i ŭkaranieńnie navukovaj prahramy dla vykanańnia na borcie MKS.
Darečy, dla kaśmičnych turystaŭ patrabavańni pa zdaroŭi značna nižejšyja, čym dla kasmanaŭtaŭ. Bo raźličvajecca, što kasmanaŭt pavinien budzie adpracavać u kosmasie praciahły pieryjad času, płanujecca da 6 palotaŭ. Turyst ža, chutčej za ŭsio, źlataje ŭsiaho adzin raz, dyj na nievialiki pramiežak času. Chacia, naprykład, kiraŭnik i zasnavalnik kampanii Intentional Software Čarlz Simoni dvojčy źlataŭ u kosmas za svoj košt.
Dyk kolki ž kaštuje paŭtaryć šlach Maryny Vasileŭskaj? Na sajcie «Hałoŭkosmasa» prejskurantu niama. Ale ŭ 2021 hodzie rasijski sajt RBK pryvodziŭ słovy Siarhieja Kaścienki, jaki na toj momant byŭ kiraŭnikom pradstaŭnictva kampanii Space Adventures u Rasii (śpiecyjalizujecca na pryvatnych palotach u kosmas i supracoŭničaje z «Raskosmasam»):
«Košt taki ž, jak usiudy — u rajonie 50 miljonaŭ dalaraŭ, plus-minus taki košt».
Jon taksama adznačyŭ, što kankurencyja z kampanijaj Iłona Maska SpaceX nijak nie adbiłasia na kolkaści achvotnych palacieć u kosmas na rasijskich karablach «Sajuz»: «Mask apieryruje ŭ tych ža cenavych dyjapazonach, tamu prykładna ŭsio kaštuje adnolkava i ŭ Maska, i ŭ nas».
Pieršym kaśmičnym turystam «Raskosmasa» staŭ amierykanski multymiljanier Denis Cita. Jon ździejśniŭ palot da MKS na rasijskim «Sajuzie», ekśpiedycyja doŭžyłasia z 28 krasavika pa 6 maja 2001 hoda. Padarožža kaštavała jamu $20 miljonaŭ. A Hi Łalibierte, zasnavalnik Cirque du Soleil, u 2009 hodzie za svaje kaśmičnyja pryhody zapłaciŭ rasijskaj kampanii ŭžo $35 miljonaŭ.
U 2023 hodzie BBC pisała ab tym, što 10-dzionny kaśmičny adpačynak na arbicie abychodzicca achvotnym u 60 miljonaŭ dołaraŭ.
Ale treba adznačyć, što nivodnaha z kaśmičnych turystaŭ na radzimie nie pryznavali hierojem. I navat nie vazili da Pucina, kab pasłuchać, jak toj pa telefonie razmaŭlaje ź siamjoj aleniavodaŭ.
Sudzimaść baćki, dzivosy z adukacyjaj, prahały ŭ bijahrafii — tajamnicy žyćcia pieršaj biełaruskaj kasmanaŭtki
Marynu Vasileŭskuju ŭžo rychtujucca adlić u bronzie i hranicie
Praviaduć telefon i adpraviać u sanatoryj. Jakija lhoty atrymaje kasmanaŭtka Vasileŭskaja jak Hieroj Biełarusi
Łukašenka prysvoiŭ Vasileŭskaj zvańnie Hieroja Biełarusi i razdaŭ inšyja ŭznaharody
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku20
Kamientary