Padčas pratestaŭ u Pinsku milicyju pierakidvali tudy viertalotam MNS. Rachunak vystavili Pratasieviču
7 maja sud Minskaha rajona razhledzieŭ hramadzianski pazoŭ prakurora ŭ dačynieńni da Ramana Pratasieviča, Jana Rudzika i Ściapana Puciły. Vynikam stała nakładańnie hihanckaha štrafu pamieram 24 559 261 rubloŭ (kala 7 miljonaŭ dalaraŭ). Pra toje, jak naličyli takuju sumu, Pratasievič raskazaŭ u svaim jutub-kanale.
Premii i dapamohi supracoŭnikam MUS
Najbolš paciahnuła «Achova hramadskaha paradku i zabieśpiačeńnie hramadskaj biaśpieki» — jana kaštavała 18 564 100 rubloŭ.
Pieradusim heta premii milicyjantam. 11 537 300 rubloŭ było vypłačana pa rasparadžeńni Łukašenki, jašče 7 026 800 rubloŭ zhodna z pastanovaj Savieta Ministraŭ.
Transpartnyja vydatki MUS acaniła ŭ 1 404 816 rubloŭ. Heta ličba — košt paliva, patračanaha na pieramiaščeńnie siłavikoŭ. Na kamandzirovačnyja vydatki supracoŭnikam syšło 286 756 rubloŭ.
Kolki kaštavali hranaty i zarady?
Cikavym źjaŭlajecca punkt «zatraty orhanaŭ unutranych spravaŭ i ŭnutranych vojskaŭ na srodki ŭzbrajeńnia — zarady, hranaty, bojeprypasy i inšaje, što byli zraschodavany ŭ časie praviadzieńnia mierapryjemstvaŭ».
Na heta syšło 328 566 rubloŭ (kala $133 tysiač pa kursie na žnivień 2020 hoda).
Paškodžańnie techniki i supracoŭnikaŭ
Paškodžańnie majomaści (aŭtatranspartu, śpiectechniki, śpiecsrodkaŭ, naručnikaŭ, hazavych bałončykaŭ i hetak dalej) sud acaniŭ na 93 875 rubloŭ.
Strachavoje pakryćcio supracoŭnikam orhanaŭ unutranych spraŭ i ŭnutranych vojskaŭ, jakija atrymali cialesnyja paškodžańni pry niasieńni słužby, paciahnuła sumu ŭ 141 514 rubloŭ.
Vydatki, źviazanyja ź lačeńniem supracoŭnikaŭ, jakija paciarpieli padčas pratestaŭ, acenienyja ŭ sumu 24 649 rubloŭ.
Kolki hrošaj prajeli kursanty i kantraktniki?
Charčavańnie kursantaŭ i vajennasłužačych terminovaj, kantraktnaj słužby pry ŭzmocnienym varyjancie niasieńnia słužby razam z arendaj hukaŭzmacnialnaha abstalavańnia abyšłosia ŭ 313 890 rubloŭ.
Premii i kampiensacyja škody Ministerstvu abarony
Zhodna z rašeńniem suda, škoda Ministerstvu abarony aceniena ŭ 2 151 712 rubloŭ.
1 443 648 rubloŭ z hetaj sumy — vypłata premij pa rasparadžeńni Łukašenki.
194 400 rubloŭ było zatračana na ramont transpartu z ustalavańniem dadatkovaha abstalavańnia (u asnoŭnym hukaŭzmacnialnaj aparatury).
Vydatki vajskovaha špitala
U 87 668 rubloŭ acanili vydatki vajskovaha špitala ŭ žniŭni 2020 hoda na akazańnie miedycynskaj dapamohi i lačeńnie. Pryčym heta nie tolki lačeńnie paciarpiełych vajennych, ale i hramadzianskich. Bo, jak patłumačyli Pratasieviču, tolki vajskovy špital u niekatorych vypadkach moh akazać prafiesijnuju dapamohu.
6 803 rubli kaštavała apłata pracy miedykaŭ za ŭzmacnieńnie dziažurnych źmienaŭ.
Charčavańnie i zakupka humovych pałak
101 413 rubloŭ syšło na arhanizacyju charčavańnia (u tym liku dadatkovaha) vajskoŭcaŭ.
U kalkulacyju taksama ŭniesienyja niejkija kamandzirovačnyja vydatki ŭ 352 rubli.
4 954 rubli było zatračana na nabyćcio PR-73 humovych pałak) dla adnoj z vajskovych čaściej u Barysavie. Usiaho było zakuplena 800 štuk. Takim čynam, adna humovaja pałka kaštavała 6 rubloŭ 19 kapiejek.
Dziŭnym vyhladaje nieabchodnaść kampiensavać Ministerstvu abarony košt transpartu, jaki byli pieradadzieny MUS Biełarusi ŭ časovaje karystańnie. Suma skłała 312 475 rubloŭ.
Kolki kaštavaŭ viertalot u Pinsk i inšyja vydatki MNS
Ministerstva pa nadzvyčajnych situacyjach vystaviła rachunak u 79 987 rubloŭ. Z sumy 9740 rubloŭ (amal 3 960 dołaraŭ) syšli na «zabieśpiačeńnie dastaŭki apieratyŭnaj hrupy MUS u horad Pinsk» viertalotam Ministerstva pa nadzvyčajnych situacyjach.
173 rubli kaštavała zabieśpiačeńnie dastaŭki asabistaha składu MUS i inšych dziaržaŭnych struktur aŭtatranspartam MNS.
«Pieradysłakacyja padraździaleńniaŭ dla zabieśpiačeńnia apieratyŭnaha reahavańnia na mahčymyja ŭskładnieńni apieratyŭnaj abstanoŭki» kaštavała MNS 4 513 rubloŭ.
Kolki kaštavała likvidacyja pratesnaj simvoliki
«Supraćdziejańnie raspaŭsiudžańniu ekstremisckaj simvoliki» (u tym liku nabyćcio dadatkovaha abstalavańnia i raschodnych materyjałaŭ) abyšłosia MNS u sumu 65 562 rubli.
***
Pratasievič adznačaje, što kala 90% z naličanaj sumy vyrašana spahnać u salidarnym paradku razam z Cichanoŭskim, Statkievičam, Sakavym, Papovym, Cyhanovičam, Łosikam.
Akramia hetaha Pratasievič, Puciła i Rudzik u salidarnym paradku» pavinny spłacić 1 169 493 rubli dziaržaŭnaj pošliny.
Što značyć «salidarny paradak»? Z kaho zmohuć spahnać hrošy, z tych i buduć spahaniać. Aryštujuć i pradaduć majomaść, zabłakujuć rachunki. Zrešty, u hrupy Cichanoŭskaha i tak daŭno ŭžo zabrali ŭsio, što mahli. Kali ž u čałavieka ničoha nie zastałosia, a jon znachodzicca za kratami, to buduć śpisvać častku turemnaha zarobku.
Pakolki z usich pieraličanych asobaŭ u Biełarusi i na svabodzie znachodzicca tolki Pratasievič, to ź luboha jaho lehalnaha zarobku častka budzie zabiracca na karyść dziaržavy.
Kamientary