U Tałačynskim rajonie znoŭ vystavili na prodaž siadzibu Ciundziavickich
Na elektronny aŭkcyjon užo nie pieršy raz vystavili zakinutuju staradaŭniuju siadzibu Ciundziavickich u vioscy Hałošava Tałačynskaha rajona. Pačatkovy košt histaryčnaha abjekta składaje ŭsiaho adnu bazavuju vieličyniu — 45 rubloŭ.
Dvuchpaviarchovy cahlany budynak płoščaj 621 kvadratny mietr pabudavali ŭ kłasičnym styli ŭ 1897 hodzie. Prajekt raspracavaŭ sam uładalnik siadziby, jaki byŭ inžynieram. Budynak raźmieščany na bierazie voziera i maje status historyka-kulturnaj kaštoŭnaści.
Z hetym miescam źviazana lehienda pra znakamity «maskoŭski skarb». Pavodle padańnia, padčas adstupleńnia francuzskaj armii ŭ 1812 hodzie mienavita tut mahli schavać nahrablenaje zołata Napaleona.
U saviecki čas u siadzibnym domie pracavała sielskaja škoła. Adnak z kanca 1990‑ch hadoŭ budynak pustuje i pastupova razburajecca.
Niahledziačy na simvaličnuju pačatkovuju canu, budučamu ŭładalniku daviadziecca adrazu kampiensavać amal 4,8 tysiačy rubloŭ spadarožnych vydatkaŭ, źviazanych z arhanizacyjaj aŭkcyjonu i padrychtoŭkaj dakumientaŭ.
Na praciahu 30 dzion paśla nabyćcia nieabchodna budzie padpisać achoŭnaje abaviazacielstva. Novy ŭładalnik pavinien budzie całkam adrestaŭravać histaryčny abjekt nie paźniej čym za try hady.
Ziamielny nadzieł płoščaj 0,77 hiektara pieradajecca ŭ biaspłatnuju arendu na 50 hadoŭ. Vykarystoŭvać kompleks dazvolena tolki dla kulturna-aśvietnickaj dziejnaści abo ahraekaturyzmu.
Zajaŭki na ŭdzieł u aŭkcyjonie prymajucca da 18 vieraśnia. Elektronnyja tarhi na placoŭcy «BUTB-Majomaść» pryznačanyja na 23 vieraśnia.
Heta ŭžo nie pieršy raz, kali hetaja siadziba vystaŭlajecca na prodaž z aŭkcyjonu. Raniej jaje biespaśpiachova sprabavali pradać u studzieni hetaha hoda. A ŭ 2021 hodzie jana fihuravała ŭ śpisie abjektaŭ, pryznačanych pad znos.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach22
Kamientary