Tramp źbirajecca ŭvieści nadzvyčajnaje stanovišča, kab departavać usich nielehałaŭ z ZŠA
Ab hetym novaabrany prezident Złučanych Štataŭ zajaviŭ u svajoj sacsietcy Truth Social.
Prezident prarespublikanskaj kansiervatyŭnaj niekamiercyjnaj arhanizacyi Judicial Watch Tom Fitan napisaŭ u sacsietcy Truth Social, što pryznačanaja Donaldam Trampam novaja administracyja ZŠA hatova zadziejničać «vajskovyja srodki i ŭvieści nadzvyčajnaje stanovišča pa ŭsich Złučanych Štatach, kab pravieści masavuju departacyju nielehalnych mihrantaŭ z krainy».
Sam Tramp prakamientavaŭ dadzienaje śćviardžeńnie, nazvaŭšy jaho praŭdzivym.
Nahadajem, što padčas pieradvybarčaj kampanii Donald Tramp daŭ prychilnikam abiacańnie, što paśla pieramohi zładzić «najbujniejšuju departacyju nielehalnych mihrantaŭ u historyi ZŠA».
Pavodle Ministerstva ŭnutranaj biaśpieki ZŠA, tolki za apošnija try z pałovaj hoda ŭ ZŠA nielehalna prybyli rekordnyja 10,1 miljona čałaviek.
Pavodle viadučych amierykanskich ekanamistaŭ, jakich niadaŭna apytała ahienctva Bloomberg, ideja Trampa pazbavić ZŠA niekalkich sotniaŭ miljardaŭ, a to i tryljonaŭ dalaraŭ.
Ahienctva zmadelavała try scenaryi baraćby ź mihrantami, da jakich moža źviarnucca Tramp:
- Zakryć miažu i bolš nikoha nie puskać.
- Zaadno departavać niadaŭna prybyłych nielehałaŭ.
- Departavać usich mihrantaŭ, jakija kaliści pryjechali biez dazvołu, navat kali jany z tych časoŭ užo atrymali dakumienty.
«Čym mienš pracaŭnikoŭ, tym mienš VUP, — pišuć ekanamisty. — U druhim scenary, pry departacyi niadaŭna prybyłych mihrantaŭ, da 2028 hoda ahulny pamier ekanomiki, pa našych padlikach, akažacca prykładna na 3% mienšym, čym byŭ by biez departacyi. Pry hetym nasielnictva budzie skaračacca nie tak chutka, tamu siaredni dachod na dušu nasielnictva pamienšycca».
Pakul ža imihracyja idzie krainie na karyść i dazvoliła ZŠA raści chutčej za Jeŭropu i inšyja raźvityja krainy, niahledziačy na inflacyju i rost koštu kredytaŭ paśla kavidnaj pandemii, adznačaje Bloomberg.
Niadaŭni rekordny prytok mihrantaŭ pavialičyć VUP ZŠA na 7 trłn dalaraŭ da 2034 hoda i pryniasie dadatkovy 1 trłn dalaraŭ dachodaŭ amierykanskaj kaźnie, padličyŭ Biudžetny ofis Kanhresa ZŠA.
Kamientary