Błakitnaje śviatło smartfonaŭ vyklikaje zaŭčasnaje pałavoje daśpiavańnie dziaciej — vučonyja

Jak piša Science Alert, tureckija navukoŭcy pasprabavali znajści razhadku pašyreńnia vypadkaŭ ideapatyčnaha zaŭčasnaha pałavoha paśpiavańnia, jakoje ŭ apošnija hady nazirajecca ŭ roznych krainach śvietu. Źjaŭleńnie druhasnych pałavych prykmiet u dziaŭčynak da 8 hadoŭ i chłopčykaŭ da 9 hadoŭ źjaŭlajecca aktualnaj prablemaj dla dziciačaj endakrynałohii.

U bolšaści vypadkaŭ pryčynu pačatku zaŭčasnaha pałavoha paśpiavańnia vyznačyć niemahčyma. Jano moža być vyklikana šeraham roznych faktaraŭ, siarod jakich jak parušeńnie raboty ŭnutranych sistem i orhanaŭ, tak i niehatyŭnaje ŭździejańnie vonkavych faktaraŭ. Daśledavańni tureckich vučonych, mahčyma, vyznačyli adzin ź ich.

Vučonyja źviarnuli ŭvahu na toj fakt, što dzieci pravodziać značny pieryjad času za ekranami svaich smartfonaŭ i płanšetaŭ. Błakitnaje śviatło, jakoje vypramieńvajecca ekranami ličbavych pryład, akazvaje značny ŭpłyŭ na ŭzrovień miełataninu — harmonu, jaki rehuluje našy sutačnyja bijarytmy, uklučajučy cykł snu i niaspańnia. Hety efiekt tłumačycca tym, što błakitny śpiektr śviatła blizki pa charaktarystykach da naturalnaha dzionnaha aśviatleńnia.

Akramia rehulavańnia cyrkadnych rytmaŭ, u pieryjad aktyŭnaha rostu miełatanin adyhryvaje istotnuju rolu ŭ rehulacyi harmonaŭ, źviazanych z pałavym raźvićciom. Jaho deficyt zdolny parušyć hety bałans, pryvodziačy da zaŭčasnaha vykidu pałavych harmonaŭ. Na vopytach z pacukami tureckija vučonyja zmahli pravieryć svaju hipotezu.

Vyniki dvuch daśledavańniaŭ, apublikavanyja ŭ časopisach Journal of Clinical Research in Pediatric Endocrinology i Frontiers in Endocrinology, pakazali, što niepałavaśpiełyja samki i samcy pacukoŭ, jakija padviarhalisia praciahłamu ŭździejańniu błakitnaha śviatła ad śviatłodyjodnych ekranaŭ, demanstravali bolš rańniaje vyśpiavańnie, čym ich adnahodki z kantrolnaj hrupy.

U pacukoŭ nazirałasia źnižeńnie ŭzroŭniu miełataninu i pavyšeńnie repradukcyjnych harmonaŭ, takich jak estradyjoł i luteinizujučy harmon. Pryčym, jak padkreślivajuć aŭtary, čym daŭžejšym było ŭździejańnie, tym raniej pačynałasia pałavoje paśpiavańnie.

asnoŭny i najbolš aktyŭny dla čałavieka žanočy pałavy harmon z hrupy estrahienaŭ

harmon hipofiza, jaki ŭ žančyn zapuskaje avulacyju i padtrymlivaje vypracoŭku prohiesteronu, u mužčyn stymuluju vytvorčaść testasteronu ŭ jaječkach

Vučonyja adznačajuć, što ich vyniki byli atrymany pry praviadzieńni daśledavańnia na pacukach, što nie daje harantyj, što padobnyja efiekty buduć naziracca ŭ ludziej. Adnak jany dazvalajuć vykazać zdahadku, što praciahłaje ŭździejańnie błakitnaha śviatła možna razhladać jak faktar ryzyki bolš rańniaha pałavoha paśpiavańnia.

• 0
• 1
• 0
• 2
• 8
• 1
• 0
• 0