«Za što ja płaču hrošy?» Biełarus paskardziŭsia na chutkaść internetu ad «Biełtelekama», i jon taki nie adzin

U roliku mužčyna kaža, što płacić za adzin z samych darahich internet-pakietaŭ kampanii — kala 65 rubloŭ u miesiac. Pry hetym, pavodle infarmacyi na sajcie apieratara, taryf pavinien zabiaśpiečvać chutkaść da 500 Mbit/s na spampoŭvańnie i da 250 Mbit/s na zahruzku.

Na kadrach ź videa bačna, što pry praviercy praz Wi-Fi chutkaść internetu była značna nižejšaja za zajaŭlenuju.

Na adnoj z pryład test pakazaŭ kala 94 Mbit/s na spampoŭvańnie i 88 Mbit/s na zahruzku. Na inšaj — prykładna 66 Mbit/s i 25 Mbit/s adpaviedna.

Voś, jak u roliku mužčyna kamientuje situacyju:

«Biełtelekam, za što ja płaču hrošy? Samy mahutny taryf, jak vy pišacie na sajcie, ahniavy internet. Mnie strašna ŭjavić, što budzie, kali b taryf byŭ «Jasna 200».

@latysiz Nu čto? Hdie skorosť? #biełaruś #biełtielekom #intierniet #vopros #obsuždienije ♬ orihinalnyj zvuk - Valery life

Videa zavirusiłasia ŭ TikTok usiaho za try dni: pa stanie na 28 maja 2026 hoda jano naličvaje amal 500 tysiač prahladaŭ i amal 10000 padabajek.

Heta nie pieršy vypadak, kali biełarusy publična skardziacca na jakaść pasłuh «Biełtelekama». Čaściej za ŭsio ludzi zhadvajuć niestabilnuju pracu internetu, prablemy z telebačańniem, pierapynki ŭ suviazi i chutkaść, jakaja nie adpaviadaje čakańniam.

Raniej šyroka abmiarkoŭvałasia historyja žychara Słucka, jaki paśla sproby zamianić madem na niekalki dzion zastaŭsia bieź internetu i suviazi.

Inšy rezanansny vypadak adbyŭsia ź minčankaj Palinaj, jakaja taksama raskazała ŭ tyktoku pra prablemy paśla padklučeńnia novaha taryfu ad «Biełtelekama». Pavodle jaje słoŭ, kampanija abiacała bolš vysokuju chutkaść internetu, adnak na praktycy sietka pracavała nastolki pavolna, što ŭviečary nie zahružaŭsia navat film.

Paśla publikacyi rolika ź joj źviazalisia pradstaŭniki apieratara. U vyniku joj zamianili roŭter, i jakaść suviazi palepšyłasia. Adnak žančyna adznačyła, što biez ahałoski ŭ TikTok vyrašyć prablemu nie atrymlivałasia.

U Biełarusi ciapier płanujuć uzmacnić adkaznaść dla internet-pravajdaraŭ za drennuju jakaść suviazi. Užo pryniaty zakonaprajekt, jaki praduhledžvaje značnaje pavieličeńnie štrafaŭ.

Pavodle novych pravił, maksimalny štraf dla jurydyčnych asob moža dasiahać 1000 bazavych vieličyń, a dla indyvidualnych pradprymalnikaŭ — da 200 bazavych. Ułady ličać, što heta prymusić kampanii bolš układacca ŭ raźvićcio i madernizacyju sietak, kab palepšyć jakaść internetu.

Razam z hetym u krainie ŭžo źmianilisia praviły karystańnia internetam. Ciapier apieratary abaviazanyja zabiaśpiečvać maksimalnuju chutkaść tolki ŭ miežach pieršych 30 hihabajtaŭ trafiku za miesiac.

Paśla vykarystańnia hetaha abjomu chutkaść moža źnižacca da 1 Mbit/s. Kab znoŭ karystacca chutkim internetam, abanientam treba dakuplać dadatkovy trafik abo śpiecyjalnyja pasłuhi.

U Ministerstvie suviazi tłumačać, što takija miery nibyta patrebnyja dla raŭnamiernaha raźmierkavańnia nahruzki na sietki. Adnak mnohija karystalniki ŭspryniali hetyja źmieny niehatyŭna i ličać, što heta abmiažoŭvaje ich mahčymaści ŭ internecie.

• 0
• 0
• 1
• 0
• 0
• 0
• 0
• 0