U Kupałaŭskim teatry adbyłasia pieršaja premjera siezona. Heta trahikamiedyja Dastajeŭskaha ź Niafiodavaj u hałoŭnaj roli

Pieršaj premjeraj 105-ha teatralnaha siezona ŭ Kupałaŭskim teatry staŭ śpiektakl «Dziadziečkaŭ son» pavodle Dastajeŭskaha. Pracavać nad im znoŭ zaprasili rasijskaha režysiora Dźmitryja Akimava — raniej jon staviŭ u Kupałaŭskim «A zory tut cichija».

«Dziadziečkaŭ son» idzie na biełaruskaj movie. Rasijski režysior navat pachvaliŭsia, što padčas pracy nad druhim śpiektaklem dla Kupałaŭskaha teatra ŭ jaho ŭžo nie ŭźnikała składanaściej praz movu:

— Ja spakojna ŭvachodžu ŭ materyjał, časam biez padradkovaha pierakładu na rasijskuju movu ŭsio zrazumieła.

Jon taksama padkreśliŭ:

— Ja nie pieravodžu historyju ŭ sučasnaść. Kłasika aktualnaja pa-za časam, u joj zakranajucca temy, što chvalujuć nas zaŭsiody, naprykład zahany hramadstva, jakija daśleduje Dastajeŭski.

Pavialičyć

«Dziadziečkaŭ son» — heta historyja pra enierhičnuju damu Maryju Maskalovu, jakaja hatovaja na ŭsio, aby ŭdała vydać zamuž adzinuju dačku. Mabyć simvalična, što rolu biespryncypnaj hieraini hraje mastackaja kiraŭnica teatra Volha Niafiodava. Treba adznačyć, što jaje zorny čas nastaŭ paśla padziej 2020 hoda, kali z Kupałaŭskaha syšli artysty, jakija byli suprać falsifikacyi vybaraŭ i hvałtu.

Tady Niafiodava, jakoj amal usio tvorčaje žyćcio prychodziłasia zdavolvacca rolami druhoha płana, asudziła svaich pryncypovych kaleh. Ale była ŭ jaje i adna vielmi ŭdałaja scena, vykananaja dla adnaho hledača. Na sustrečy z Łukašenkam u lutym 2021-ha Volha navat vycisnuła ślazu, kažučy pra jaho niahiehły vychad z aŭtamatam padčas pratestaŭ.

Pavialičyć

Hladač toj zastaŭsia zadavoleny: u chutkim časie Niafiodavu pryznačyli mastackaj kiraŭnicaj teatra, a potym jašče i dali zvańnie Zasłužanaj artystki Biełarusi.

U repiertuary artystki było i vystupleńnie na adkryćci kramy ałkaholu «Biełmytniaservis» u Maładziečnie.

Raspaviadajučy pra pastanoŭku śpiektaklu «Dziadziečkaŭ son», Niafiodava adznačyła, što heta pastanoŭka «ab asabistym čałaviečym pytańni, ab adnosinach, ab blizkich, ab skvapnaści, ab tym, što ŭsio ž kiruje śvietam — duša ci hrošy».

Na premjery ŭ zali apynulisia siostry Hruździevy, jakija vyrašyli prarekłamavać śpiektakl u svaim instahramie.

Pavialičyć

— My išli i nie čakali, što takoha vysokaha ŭzroŭniu budzie śpiektakl. Vala kaža, što heta jaje śpiektakl, — adznačyła Alaksandra Hruździeva, jakaja čamuści vyrašyła ŭ teatry chavać vočy za soniečnymi akularami.

— Viedajecie, tut taki śpiektr pačućciaŭ… Ty adčuvaješ kožnaje imhnieńnie. Ad kamiedyi, niejkaha žachu…, — paćvierdziła Valancina.

Zdajecca, što bolš za ŭsio siaścior uraziŭ fakt, što režysior z Rasii — bo ab hetym jany kažuć z zachapleńniem.

Pavialičyć

Ale i kamplimient kalezie pa prapahandzie vyrašyli adviesić. Atrymałasia krychu dziŭna:

— Ja kožny raz ździŭlajusia šmathrannaści talentu Volhi Niafiodavaj, — pačała pasypać miod cukram Alaksandra Hruździeva. — Voś jaje dykcyja plus emocyi… Viedajecie, časam byvajuć aktrysy, jakija pakazvajuć emocyju, a tekst źjadajuć. U jaje voś dobraja dykcyja, čuješ kožnaje słova. Pry hetym emacyjanalnaja častka na vyšyni.

Nastupny pakaz «Dziadziečkava snu» adbudziecca ŭžo 7 śniežnia. Kvitki kaštujuć ad 10 da 35 rubloŭ. Ale, miarkujučy pa sajcie teatra, pakul što bolš za pałovu miescaŭ volnyja. Jak tut nie zhadać časy, kali ŭ Kupałaŭski było składana znajści kvitok za miesiac da śpiektaklu. Tym bolš kali havorka išła pra premjeru.

Pavialičyć

• 0
• 1
• 0
• 25
• 1
• 0
• 0
• 1