Staŭ viadomy prysud pinskamu žurnalistu Jaŭhienu Mikałajeviču, jaki viarnuŭsia ŭ Biełaruś
U pačatku kastryčnika sud u Pinsku pryznaŭ Jaŭhiena Mikałajeviča vinavatym pavodle častki 1 artykuła 342 KK «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». Jamu pryznačyli pakarańnie ŭ vyhladzie paŭtara hoda kałonii ahulnaha režymu, piša «Miedyja-Paleśsie».
U 2020 hodzie Jaŭhien Mikałajevič u jakaści videakarespandenta «Miedyja-Paleśsia» aśviatlaŭ pratesty ŭ Pinsku suprać falsifikacyi vynikaŭ prezidenckich vybaraŭ. Žurnalist nie prymaŭ niepasrednaha ŭdziełu ŭ pratestach: jon vioŭ fota– i videazdymku pa redakcyjnym zadańni.
10 žniŭnia 2020 hoda pry vykanańni słužbovych abaviazkaŭ Jaŭhien Mikałajevič byŭ zatrymany i źbity. Paźniej stała viadoma, što Mikałajeviča spačatku adpravili ŭ SIZA, a zatym pieraviali ŭ papraŭčuju kałoniju ŭ Ivacevičach. Kali žurnalista vyzvalili, jon praciahnuŭ svaju prafiesijnuju dziejnaść na sajcie.
30 žniŭnia Jaŭhiena Mikałajeviča znoŭ zatrymali. Tady jon znachodziŭsia voddal płoščy, dzie prachodziła mirnaja akcyja pratestu, nie paśpieŭ navat dastać techniku. Jaŭhiena prysudzili da administracyjnaha aryštu, ale prysud byŭ apratestavany i žurnalist zastaŭsia na voli.
U listapadzie 2020 hoda Jaŭhiena Mikałajeviča znoŭ vyklikali ŭ milicyju Pinska pa nadumanaj pryčynie. Jak jon paźniej raspavioŭ, paśla razmovy sa śledčym, jaki nie znajšoŭ dačynieńnia žurnalista da złačynstva, jaho zatrymali dla adbyćcia pryznačanaha raniej administracyjnaha aryštu.
Adbyŭšy aryšt, Jaŭhien Mikałajevič pakinuŭ Biełaruś. Jon pracavaŭ za miažoj u śfiery, nie źviazanaj z žurnalistykaj. U pačatku 2024 hoda jon vyrašyŭ viarnucca dadomu i byŭ zatrymany. Nieviadoma, kali mienavita heta adbyłosia.
Imia Jaŭhiena Mikałajeviča źjaviłasia ŭ śpisie asob, jakija majuć dačynieńnie da ekstremisckaj dziejnaści.
Ciapier čytajuć
Zališniaje budaŭnictva: ci moža luboŭ biełarusaŭ inviestavać hrošy ŭ kvatery pryvieści da kryzisu na rynku nieruchomaści?10
Kamientary
Zato NIECHTA nabirajet na rabotu ukrainciev, kak budto biełarusy zakončiliś...