Chalezin: Rašeńnie Babaryki pajści ŭ prezidenty — heta pošuk sensu žyćcia paśla śmierci žonki
U novym vypusku TOKu viadomy režysior Mikałaj Chalezin raskazaŭ pra svajo staŭleńnie da Viktara Babaryki.
«Ja lohka moh bačyć Babaryku prezidentam. (…) Ja z mnohimi vielmi blizkimi da jaho ludźmi pahavaryŭ. Ja jaho zrazumieŭ jak piersonu, zrazumieŭ, pra što jon.
Pa-pieršaje, heta čałaviek dobry pieršapačatkova. Heta prosta vidavočna. Druhoje, heta čałaviek sa stratehijaj. To-bok, u jaho stratehija była na ŭsich fazach. Što b jon ni ŭznačalvaŭ, u jaho była stratehija»,
— razvažaje režysior Mikałaj Chalezin.
«Kali kazali, što jon ruski, kali Paźniak nios hetuju ŭsiu bielibierdu pra toje, što heta maskal, Hazprom i hetak dalej… Paźniak prosta historyju zabyŭsia. Jon prosta nie pamiataje,
— zaŭvažaje režysior i tłumačyć:
Babaryka ŭznačalvaŭ Bank Alimp u toj čas, kali ŭ Biełarusi była dyktatura, a ŭ Rasii była nibyta demakratyja. I chto chacieŭ by abjadnacca z «Hazpramam»? Usie banki — kožny vaźmi! I kožny b skazaŭ: «Dy my chočam, viadoma».
Ale hety [Bank Alimp] zmoh prapanavać kancept. Zdoleŭ pravieści pieramovy. Zmoh damovicca i ŭvajšoŭ u hety puł. Naturalna, jon jaho nie moh potym užo adkinuć. (…) Užo pamianiałasia situacyja ŭ Rasii, ale ty ŭžo nie možaš vyjści z hetaha. Choć, moža być, jon i chacieŭ by».
Rašeńnie Babaryki pajści ŭ prezidenty Chalezin nazyvaje samazabojstvam. Ale jon padkreślivaje, što heta było rašeńnie, pryniataje ź imknieńnia znajści novy sens u žyćci paśla trahičnaj śmierci žonki. Nahadajem, Maryna Babaryka zahinuła ŭ 2017 hodzie padčas zaniatkaŭ dajvinham na adpačynku na partuhalskim vostravie Madejra.
«Jon na heta rašyŭsia, tamu što pačaŭ vybirać misiju. (…) Kali ŭ ciabie niedarečna sychodzić z žyćcia samy blizki tabie čałaviek, ty chočaš niešta zrabić, kab sabie prydumać novy sens.
I jon voś tak i znajšoŭ hety sens. Paraiŭsia z synam, paraiŭsia z dačkoj — i pajšoŭ. I voś dzie jon apynuŭsia. I zaraz jon prachodzić toj pieryjad, jaki mała kamu vypadaje. Kali ty byŭ kandydatam u prezidenty, a staŭ źniavolenym. I pry hetym ty nie ździejśniŭ ničoha».
Chalezin upeŭnieny, što ŭ Babaryki była stratehija adnosna praviadzieńnia pieradvybarčaj kampanii, i jon spadziavaŭsia na jaje paśpiachovaść. U tym liku na toje, što zmoža damovicca z Maskvoj.
Chalezin źviartaje ŭvahu, na toje, što Viktar Babaryka lohka moža intehravacca ŭ lubuju temu. U jakaści prykładu jon pryvodzić kalekcyju karcin «Biełhazprambanka»:
«Nie kožny nabor navat darahich artefaktaŭ možna nazvać kalekcyjaj. Kalekcyja — heta ŭ pieršuju čarhu kancept. Hetyja rečy mohuć być niedarahimi, ale kali ŭ ich dakładna vytrymana kanceptualnaja linija, to heta budzie dobraje.
Nie budučy kurataram, nie budučy mastactvaznaŭcam, jon stvaryŭ dobruju kalekcyju. Bo jon uziaŭ vielmi vuzki siehmient, vielmi pravilny, i sam adsočvaŭ źjaŭleńnie na aŭkcyjonach artefaktaŭ. A značyć, jon moža intehravacca ŭ lubuju temu. Jon moža vyvučyć i pryniać pravilnaje rašeńnie. Dla mianie jon byŭ takim čałaviekam. Napeŭna, kali b hałasavaŭ, pieršapačatkova ja b za jaho hałasavaŭ».
Hladzicie całkam:
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary