Zakliki da bajkotu amierykanskaj pradukcyi raspaŭsiudžvajucca ŭ Paŭnočnaj Jeŭropie

Jak piša Le Monde, u apošnija tydni na Facebook žychary Danii i Šviecyi stvaryli niekalki hrup, udzielniki jakich składajuć śpisy amierykanskich tavaraŭ i pasłuh, ad jakich varta admovicca.

U toj ža čas narviežskaja kampanija Haltbakk Bunkers, jakaja zabiaśpiečvaje sudny, što zachodziać u party krainy, zajaviła ab spynieńni absłuhoŭvańnia amierykanskich vajennych karabloŭ palivam.

U paviedamleńni, apublikavanym 1 sakavika, kampanija adznačyła, što spyniaje pastaŭki «nieadkładna», spasyłajučysia na «biesprecedentny skandał u žyvym efiry», źviazany z sustrečaj prezidenta Ukrainy Uładzimira Zialenskaha i Donalda Trampa.

Haltbakk Bunkers nazvała pavodziny ZŠA «ŭdaram nažom u śpinu» Ukrainie i zaviaršyła svaju zajavu łozunham «Słava Ukrainie!». Kampanija zaklikała narviežcaŭ i ŭsich jeŭrapiejcaŭ dziejničać hetaksama.

Kiraŭnik Haltbakk Bunkers Hunar Hran padkreśliŭ, što rašeńnie «maralnaje», i adznačyŭ, što jaho kampanija spyniła pastaŭki paliva dla rasijskich karabloŭ u pačatku poŭnamaštabnaha ŭvarvańnia va Ukrainu.

Ciapier, pavodle jaho słoŭ, ZŠA taksama trapili ŭ hety śpis z-za svajho staŭleńnia da Ukrainy. Hran zajaviŭ, što «ni kropli paliva» amierykanskija karabli nie atrymajuć, pakul Tramp zastajecca pry ŭładzie.

Uładam Narviehii padobnyja miery stvarajuć składanaści. Ministr abarony krainy Tory Sandvik zajaviŭ 2 sakavika, što rašeńnie kampanii «nie adpaviadaje palitycy ŭrada», i zapeŭniŭ, što amierykanskija siły «praciahnuć atrymlivać patrebnyja pastaŭki i padtrymku» ad Narviehii.

Reakcyja Haltbakk Bunkers upisvajecca ŭ bolš šyroki kantekst: u Danii i Šviecyi na Facebook aktyŭna źjaŭlajucca i rastuć hrupy, jakija zaklikajuć bajkatavać amierykanskija tavary. U Danii, naprykład, hrupa «Boycott varer fra USA» naličvaje zvyš 50 tysiač udzielnikaŭ. Jana źjaviłasia 3 lutaha, na nastupny dzień paśla taho, jak vice-prezident ZŠA Džej Dzi Vens nazvaŭ Daniju «drennym sajuźnikam», a premjer-ministr Miete Frederyksien admoviłasia pieradać ZŠA Hrenłandyju.

Anałahičnyja hrupy źjavilisia i ŭ Šviecyi. Ich udzielniki dzielacca śpisami amierykanskich tavaraŭ i pasłuh, ad jakich jany chočuć admovicca: ad praduktaŭ bujnych charčovych kampanij nakštałt Heinz i Kellogg's da servisaŭ typu Google, Netflix i amierykanskich finansavych arhanizacyj. Mnohija pierachodziać na alternatyŭnyja miascovyja rašeńni, naprykład Viaplay zamiest Netflix i Ecosia zamiest Google. Niekatoryja navat adklikajuć inviestycyi z šviedskaha dziaržaŭnaha piensijnaha fondu AP7, u jakoha 69% inviestycyj źviazanyja z amierykanskim rynkam.

Vydańnie adznačaje, što bajkot — hłyboka ŭkaranionaja tradycyja ŭ Šviecyi. U 1990-ch šviedy ŭžo bajkatavali francuzskija tavary na znak pratestu suprać jadziernych vyprabavańniaŭ u Cichim akijanie. Siońnia, jany ličać, što kuplać amierykanskija tavary — značyć padtrymlivać sproby Rasii źniščyć svajho jeŭrapiejskaha susieda.

Pakul ciažka acanić ekanamičny efiekt, ale niekatoryja kampanii ŭžo reahujuć. U Danii bujnaja handlovaja sietka Salling (jakoj naležać, naprykład, kramy Netto) pačała paznačać jeŭrapiejskija tavary čornaj zorkaj, kab kupcy mahli adroźnivać ich ad amierykanskich.

Asabliva mocna bajkot udaryŭ pa Tesla. U Šviecyi, dzie madel Tesla Y była samaj papularnaj mašynaj u 2024 hodzie, jaje prodažy ŭ studzieni ŭpali na 44% u paraŭnańni z papiarednim hodam. U Narviehii padzieńnie skłała 38% u studzieni i 70% u lutym.

Niekatoryja ŭdzielniki ruchu ličać, što ekanamičny ŭdar moža paŭpłyvać na palityku ZŠA. «Kali my zmožam abvalić biržu na niekalki dzion, Tramp zrazumieje, što hulać z Pucinym jamu niavyhadna», — skazaŭ vydańniu adzin z aktyvistaŭ.

• 74
• 1
• 3
• 3
• 1
• 0
• 0
• 2