«Zmahu viarnuć daŭhi». Kolki ciulpanaŭ pradaŭ biznesoviec sa zharełaj ciaplicy?
Pamiatajecie Dźmitryja, u jakoha prosta pierad hałoŭnym viasnovym śviatam zhareła ciaplica ź ciulpanami na 400 tysiač rubloŭ? Jon nie zdaŭsia i pasprabavaŭ pradać uratavanyja kvietki na vulicach Minska 8 Sakavika. Ci zdoleŭ biznesoviec raspradać usie bukiety i zarabić, kab raźličycca z daŭhami? Onliner.by daviedaŭsia padrabiaznaści.
— 8 sakavika ludzi pryjazdžali z usiaho horada. Navat ź Piakalina znajomyja prymčalisia, kab padtrymać. Byli siarod pakupnikoŭ i maładyja chłopcy, jakija taksama zajmajucca biznesam i razumiejuć, što značyć stracić usio ŭ samym pačatku šlachu, — dzielicca ŭražańniami Dźmitryj.
Pavodle jaho słoŭ, takomu ažyjatažu paspryjała i publikacyja.
— Naprykład, u namiot zazirnuŭ mužčyna, jaki žyvie ŭ domie nasuprać. Kaža, viarnuŭsia z pracy, sieŭ pić kavu, adkryŭ vaš sajt, pračytaŭ artykuł… Nie palenavaŭsia, apranuŭsia i vyjšaŭ kupić vialiki bukiet.
Biznesmien padličyŭ: usiaho ŭdałosia ŭratavać kala 100 000 ciulpanaŭ, a voś pradać — 70 000—80 000 štuk.
— Reštki ŭ bližejšy čas adpraviacca na śmietnik. Kaniečnie, jość jašče ludzi, jakija cikaviacca bukietami, — my prapanujem im vialikuju źnižku, — kaža Dźmitryj. — Viadoma, škada pracy, ale ničoha nie zrobiš. Pavodle našych źviestak, i ŭ inšych pryvatnikaŭ nie ŭsie kvietki byli raspradadzienyja. Horad byŭ pusty na vychodnych. Napeŭna, haradžanie zasumavali pa soncy, źjechali na šašłyki…
Tym nie mienš atrymanych srodkaŭ Dźmitryju chopić, kab viarnuć daŭhi pastaŭščyku.
— Z ułasnych hrošaj daviadziecca zapłacić nie takuju vialikuju sumu. Dla mianie vielmi važna raźličycca z čałaviekam, nie kinuć jaho, inakš u nas nie budzie davieru, a ja płanuju i dalej nabyvać u jaho cybuliny.
U płanach mužčyny — krychu adpačyć ad śviatočnaj mituśni i prystupić da adnaŭleńnia ciaplicy.
— Treba razabrać anhar, adbudavać jaho nanova, adramantavać sam parnik… Na nastupnym tydni budziem raźbirać uvieś mietałałom, jaki sabraŭsia paśla pažaru. Viedaju, što mnohija ludzi hatovyja pryjechać i dapamahčy, ja budu rady luboj dapamozie, — nie chavaje emocyj biełarus.
— Jašče raz chaču padziakavać usim za padtrymku i ciopłyja słovy!
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach14
Kamientary