Łukašenka abmierkavaŭ z Ryžankovym «kroki pa adnaŭleńni davieru z zachodnimi krainami»

Alaksandr Łukašenka 18 sakavika abmierkavaŭ ź ministram zamiežnych spraŭ Maksimam Ryžankovym kroki pa adnaŭleńni davieru ŭ adnosinach z partniorami, u tym liku z šeraham zachodnich dziaržaŭ. Pra heta kiraŭnik zamiežnapalityčnaha viedamstva raskazaŭ žurnalistam pa vynikach rabočaj sustrečy z Łukašenkam, piša BiełTA.

Alaksandr Łukašenka va ŭstupnym słovie akreśliŭ šerah pytańniaŭ dla abmierkavańnia. Heta prapracoŭka vizitaŭ, realizacyja płanaŭ pa raźvićci supracoŭnictva, u tym liku z Kitajem. Siarod tem taksama praca na placoŭcy Jeŭrazijskaha ekanamičnaha sajuza i padrychtoŭka da praviadzieńnia samitu z ulikam staršynstva Biełarusi ŭ hetym intehracyjnym abjadnańni ŭ biahučym hodzie. Akramia taho, jon płanuje pravieści naradu ź biełaruskimi pasłami.

«Taksama byŭ abmierkavany šerah pytańniaŭ, źviazanych z realizacyjaj peŭnych našych krokaŭ i krokaŭ našych partnioraŭ pa adnaŭleńni davieru ŭ adnosinach. Heta datyčyła, u tym liku, i šerahu zachodnich dziaržaŭ», — adznačyŭ Maksim Ryžankoŭ.

Jakija mienavita pytańni abmiarkoŭvalisia ŭ hetym kantekście, ministr nie ŭdakładniŭ. Adnak jašče ŭ kancy minułaha hoda Łukašenka, naprykład, raskazvaŭ pra prośby ZŠA pašyryć dypłamatyčnuju prysutnaść u Biełarusi.

Adnosiny Minska z zachodnimi susiedziami, Jeŭrasajuzam i ZŠA pahoršali ŭ 2021—2022 hadach.

Spačatku ŭ Biełarusi pačalisia masavyja represii, u vyniku jakich niekalki socień tysiač biełarusaŭ vymušanyja byli šukać prytułku ŭ susiednich krainach. Adnačasova z hetym razharnułasia kampanii ačarnieńnia Zachadu i raspalvańnia varožaści da susiednich krain. U mai 2021 hoda Minsk prymusova pasadziŭ samalot avijakampanii «Rajanejr», što Polšča i Litva nazvali aktam pavietranaha piractva. Pry kancy 2021 hoda ź biełaruskaj terytoryi pačalisia arhanizavanyja ataki mihrantaŭ na susiednija krainy, jakija supravadžalisia prapahandysckimi śpiecapieracyjami. Narešcie, saŭdzieł Biełarusi ŭ napadzie na Ukrainu ŭ lutym 2022 hoda pryvioŭ adnosiny z susiedziami da punktu zamiarzańnia. 

Sustreča Łukašenki z Ryžankovym adbyłasia paśla viartańnia pieršaha z Maskvy, dzie jon sustrakaŭsia z Uładzimiram Pucinym i na fonie vyčarpańnia Rasijaj mahčymaściej nastupu va Ukrainie, dzie vajna zajšła ŭ tupik. Źviartaje ŭvahu, što zajava ab «krokach pa adnaŭleńni davieru z zachodnimi krainami» prahučała ŭ dzień, kali maje adbycca telefonnaja razmova prezidentaŭ ZŠA i Rasii, padčas jakoj, jak možna čakać, Maskva pahodzicca na prapanovu Ukrainy i ZŠA ab prypynieńni ahniu na 30 dzion.

• 3
• 0
• 8
• 2
• 0
• 0
• 1
• 0