Na abvinavačańni ŭ chłuśni Atlantic apublikavaŭ novyja skrynšoty z uradavaha čata ŭ Signal. Tramp adkazaŭ novymi abrazami ŭ adras hałoŭnaha redaktara

Na novych skrynšotach možna, u pryvatnaści, ubačyć paviedamleńnie ad ministra abarony ZŠA Pita Chehseta ranicaj 15 sakavika (za 31 chvilinu da taho, jak amierykanskija vajskovyja samaloty padnialisia ŭ pavietra), jakoje ŭklučaje padrabiaznaje apisańnie taho, u jaki mienavita čas i jakija ataki (źniščalniki F-18, drony i rakiety «Tamahaŭk») zapłanavanyja pa pazicyjach chusitaŭ u Jemienie.

Jak adznačajecca ŭ artykule, Atlantic «jak praviła» nie publikuje infarmacyju ab amierykanskich vajennych apieracyjach, kab nie pastavić pad pahrozu amierykanskich vajennych, tamu ŭ papiaredniaj publikacyi raspaviadałasia «ab charaktary pieradavajemaj infarmacyi, a nie kankretnyja padrabiaznaści ab atakach».

«[Adnak] zajavy Chehseta, [kiraŭnika Nacyjanalnaj raźviedki Tułsi] Habard, [dyrektara CRU Džona] Retklifa i Trampa ŭ spałučeńni sa śćviardžeńniami šmatlikich čynoŭnikaŭ administracyi ab tym, što my chłusim ab źmieście paviedamleńniaŭ u Signal, pierakanali nas u tym, što ludzi pavinny aznajomicca z tekstami, kab pryjści da ŭłasnych vysnoŭ», — rastłumačyli žurnalisty.

Paśla taho, jak prezident ZŠA Donald Tramp zajaviŭ, što infarmacyja ŭ čacie nie była sakretnaj, u Atlantic vyrašyli ŭdakładnić u Biełaha doma, ci nie majuć čynoŭniki piarečańniaŭ suprać publikacyi poŭnaj pierapiski.

Pres-sakratar Biełaha doma Kerałajn Levit adkazała, što ŭ čacie nie było sakretnaj infarmacyi, ale «heta nie aznačaje, što my ŭchvalajem publikacyju razmovy». Jana dadała, što administracyja prezidenta suprać publikacyi, tamu što ŭ čacie abmiarkoŭvałasia «adčuvalnaja infarmacyja».

Kamientujučy novuju publikacyju, Levit źviarnuła ŭvahu na toje, što ŭ zahałoŭku novaha artykuła paviedamleńni z čata nazvanyja «płanami napadu», a nie «vajennymi płanami», što, na jaje dumku, aznačaje, što Atlantic «zdaŭsia» i pryznaŭ svaju pamyłku (pieršy artykuł nazyvałasia «Administracyja Trampa vypadkova dasłała mnie paviedamleńni pra svaje vajennyja płany»).

«Usia hetaja historyja była čarhovaj mistyfikacyjaj, prydumanaj nienaviśnikam Trampa, jaki dobra viadomy svaimi siensacyjnymi zajavami», — zajaviła Levit.

Tramp adkazvaje asabistymi vypadami

Donald Tramp, adkazvajučy na ​​pytańnie ab novaj publikacyi Atlantic, znoŭ «pierajšoŭ na asoby»:

publikacyi ab čacie jon nazvaŭ palavańniem na viedźmaŭ, samo vydańnie — «pravalnym časopisam», a asabista Džefry Hołdbierha — «całkam miarzotnym typam» (a total sleazebag).

U toj ža čas, kali žurnalisty spytali ŭ jaho, chto vinavaty ŭ tym, što ich kalehu ŭklučyli ŭ sakretny čat, Tramp nazvaŭ imia svajho daradcy pa nacyjanalnaj biaśpiecy.

«Majk Uołtc, ja tak razumieju, uziaŭ na siabie adkaznaść. Mnie skazali, što heta Majk», — skazaŭ prezident.

Majk Uołtc, sapraŭdy, u aŭtorak zajaviŭ, što całkam biare adkaznaść na siabie, a inšyja ŭdzielniki čata, dziaržsakratar Marka Rubia i kiraŭnik CRU Tułsi Habard, nazvali ŭklučeńnie žurnalista ŭ čat «surjoznaj pamyłkaj».

Asudžać Pita Chehseta, jaki vyviesiŭ u čacie padrabiazny hrafik udaraŭ pa chusitach, Tramp admoviŭsia.

«Chehset vydatna pracuje. Jon nie maje da hetaha dačynieńnia», — skazaŭ Tramp, dadaŭšy, što naohuł hetaja ŭciečka praz Signal jaho nie turbuje.

Čat vyšejšaha ŭzroŭniu

24 sakavika hałoŭny redaktar ​​Atlantic Džefry Hołdberh raspavioŭ, što jaho vypadkova dadali ŭ zakryty čat vysokapastaŭlenych pradstaŭnikoŭ administracyi ZŠA, u jakim abmiarkoŭvalisia detali apieracyi suprać chusitaŭ u Jemienie, raspačataj 15 sakavika.

U hrupavym čacie, pa słovach Hołdbierha, byli ludzi ź imionami Pit Chehsiet (ministr abarony ZŠA), Marka Rubia (dziaržsakratar), Džej Dy Vens (vice-prezident) i inšyja, a dadaŭ jaho čałaviek pa imieni Majkł Uołc (tak kličuć daradcu prezidenta ZŠA pa nacbiaśpiecy).

U Biełym domie paźniej paćvierdzili sapraŭdnaść pierapiski ŭ čacie, ale zajavili, što situacyja z uklučeńniem u hrupu starońniaha čałavieka nie stvaryła pahrozu nacyjanalnaj biaśpiecy.

U toj ža čas ekśpierty i apanienty administracyi Trampa ličać toje, što adbyłosia aburalnym parušeńniem praviłaŭ biaśpieki i patencyjnym parušeńniem zakona ab špijanažy.

Mnohija palityki i žurnalisty ŭspomnili ab abvinavačvańniach u adras Chiłary Klintan, jakaja, budučy dziaržsakratarom, viała rabočuju pierapisku sa svajoj chatniaj elektronnaj pošty z chostynham na pryvatnym sierviery. Adnym z tych, chto luta patrabavaŭ pakarać Klintan za heta, byŭ Donald Tramp.

• 1
• 1
• 4
• 9
• 0
• 0
• 0
• 0