U biełaruskaj himnazii ŭ Vilni źjaviacca dadatkovyja miescy. Ale zajaŭki treba pakidać zaraz
Dobraja navina dla biełaruskich baćkoŭ u Vilni, čyje dzieci ŭ nastupnym navučalnym hodzie pojduć vučycca ŭ piaty kłas.
Raniej «Naša Niva» raspaviadała ab tym, što trapić u himnaziju imia Francyska Skaryny davoli składana. Heta adzinaja navučalnaja ŭstanova ŭ Litvie, dzie dzieci mohuć vučycca na biełaruskaj movie. Miescaŭ tam značna mienš, čym achvotnych atrymlivać adukacyju tam.
Himnazija imknułasia pavialičvać kolkaść miescaŭ: kali ŭ 2019 hodzie na 1 vieraśnia było 234 vučni, u 2023-m amal udvaja bolej: 408. Ale ž hetaha ŭsio roŭna było niedastatkova. Letaś baćki kazali, što kala 50 dziaciej, jakija padali zajaŭki ŭ Skarynaŭskuju himnaziju, atrymali admovu.
Inicyjatyŭnaja hrupa baćkoŭ sprabavała znajści varyjanty pavialičyć nabor, ale biez asablivaha pośpiechu. Narešcie źjavilisia dobryja naviny. U biełaruskich čatach pačała raspaŭsiudžvacca infarmacyja, što ŭ nastupnym navučalnym hodzie płanujecca dva 5 kłasy i źjavicca 10—15 miescaŭ dadatkova.
U himnazii imia Francyska Skaryny heta paćvierdzili, a taksama źviarnuli ŭvahu na toje, što jakraz ciapier treba padavać zajaŭki na novy navučalny hod praz śpiecyjalnuju sistemu.
Kamientary