Biełaruski taksist, jakoha ŭ Varšavie źbiŭ pasažyr, damohsia zaviadzieńnia spravy za ksienafobski napad
Biełaruski taksist Vasil (imia źmieniena), jakoha pasažyry abrazili i źbili ŭ Varšavie, pryniaŭšy za ŭkrainca, damohsia zaviadzieńnia kryminalnaj spravy pa fakcie hvałtu na hlebie ksienafobii. Pra heta raskazaŭ juryst David Dechniert, a biełarus paćvierdziŭ vydańniu Most, što atrymaŭ z prakuratury adpaviedny list.
U liście paviedamlajecca, što prakuratura Varšavy pačała rasśledavańnie pa artykule 119 §1 Kryminalnaha kodeksa (hvałt pa matyvach nacyjanalnaj prynaležnaści). Za takoje złačynstva praduhledžana pakarańnie da 5 hadoŭ pazbaŭleńnia voli.
Akramia taho, tyja, chto napadaŭ, vierahodna, paniasuć adkaznaść za paškodžańnie majomaści — aŭtamabila — i naniasieńnie škody zdaroŭju, raskazaŭ biełaruski taksist.
Ahresiŭnych pasažyraŭ Vasil padvoziŭ 3 studzienia 2025 hoda. Jany źviarnuli ŭvahu na akcent mužčyny i vyrašyli, što toj z Ukrainy. Vasil adkazaŭ, što heta nie tak, ale tyja nie pavieryli — stali pytacca, čamu jon nie na vajnie. Situacyja napaliłasia, i Vasil vyrašyŭ vysadzić klijentaŭ raniej, nie zaviaršyŭšy pajezdku. Kali jon spyniŭ mašynu, kab vysadzić pasažyraŭ, adna ź dziaŭčat aplavała jaho i nazvała «ukrainskaj śvińnioj», a adzin z chłopcaŭ, vychodziačy, udaryŭ u arku za zadnimi dźviercami — tam zastałasia ŭvahnutaść.
Paśla klijenty, jakija ŭžo byccam by pajšli, vyrašyli viarnucca. Adzin ź ich da taho momantu namataŭ na hałavu šalik. Da Vasila prymianili haz, jon adčuŭ udary pa hałavie. Niekalki razoŭ napadnik pry hetym kryknuŭ: «Sp**dalaj» («Pravalvaj»).
Źbićcio spynili sihnały mašyny: pobač prajazdžaŭ patrul, ale palicyjanty byli ŭ cyvilnym. Ubačyŭšy, što z mašyny vychodziać mužčyny, napadniki stali sychodzić. Ale palicyjanty spynili ich i zahadali zastavacca na svaich miescach, a Vasila paprasili nabrać 112 — heta adziny numar słužbaŭ vyratavańnia.
U mužčyny ŭ vyniku padniaŭsia cisk, jaki źbiła chutkaja. Ale paśla ŭ balnicy MRT pakazała, što surjoznych traŭmaŭ jon nie atrymaŭ.
Paśla taho biełarus źviarnuŭsia ŭ fond Ponad podziałami, dzie jamu dapamahli skłaści zajavu ŭ palicyju i chadajnictva ab pryciahnieńni tych, chto napadaŭ da adkaznaści. U kančatkovym vyniku dziejańni pasažyraŭ kłasifikavali jak hvałt pa matyvach nacyjanalnaj prynaležnaści. Pa słovach jurysta Davida Dechnierta, asoby napadnikaŭ užo ŭstanavili. Ciapier ich los vyznačać prakuratura i sud.
«Dzieci rastuć z adčuvańniem, što być biełarusam pačesna, jak vypusknikom Harvarda». U Batumi dziejničaje biełaruskamoŭnaja škoła — voś jak heta pracuje88
Kamientary