«Prystroić hrošy, kab pracavali». Sumnaja historyja kaviarni, jakaja «nie ŭźlacieła»

«Heta ž ramantyčna — mieć ułasnuju kaviarniu»

Pačynałasia ŭsio dastatkova prazaična. Niedzie ŭ 2023 hodzie ja ŭbačyła ŭ Instagram tarhietavanuju rekłamu kursaŭ pa adkryćci kavavaha biznesu. Mnie tady było 29 hadoŭ. Usio pa kłasicy žanru: spačatku prapanoŭvaŭsia biaspłatny vebinar, na jakim raskryvałasia bazavaja infarmacyja. Tam raskazvałasia, što ŭsio heta dastatkova prosta, abmaloŭvałasia ahulnaja schiema dziejańniaŭ. A dla bolš detalovaj infarmacyi prapanoŭvałasia nabyć kurs.

Ja pasłuchała i zaharełasia. Heta ž dastatkova ramantyčna — mieć ułasnuju kaviarniu. Akramia taho, u hetym biznesie dastatkova časta sustrakajucca ŭładalnicy-žančyny. Da taho ž pryvablivaŭ dastatkova nizki paroh uvachodu, asabliva dla farmatu, abranaha mnoj. Navat u vypadku nie nadta ŭdałaha vyniku z-za takich strat možna było nie nadta zasmučacca.

Da taho času ŭ mianie skłalisia peŭnyja pieradumovy dla takoha kroku. Mieŭsia niekatory biudžet sa svabodnych hrošaj, i ja razhladała roznyja varyjanty, kudy ich prystroić, kab jany pracavali. Biznes ja razhladała jak patencyjnuju dadatkovuju krynicu dachodu, jakaja ŭ ideale dapamahła b sa źmienaj dziejnaści. Pierśpiektyvy vyhladali dastatkova pryvabnymi.

Akramia taho, miarkujučy pa apisańni ŭ kursie, taki biznes nie patrabavaŭ vialikaha asabistaha ŭdziełu. Dla mianie heta važna: ja pracuju pa najmie, z-za čaho nie mahła b uvieś čas prysutničać u kaviarni i kantralavać jaje pracu. Zrazumieła, što na pieršapačatkovym, arhanizacyjnym etapie moj udzieł mieŭ być vialikim. Ale paśla zapusku ja čakała, što režym ustalujecca ŭ niejkim statyčnym stanie, i ŭžo možna budzie sumiaščać kiravańnie biznesam i pracu pa najmie.

Ja advažyłasia. Dla mianie heta sapraŭdy było dziorzka, bo ŭ maim atačeńni biznesmienaŭ niama ŭvohule, ni siarod svajakoŭ, ni siarod siabroŭ. Dla mianie heta byŭ kruty vyklik.

Navučańnie praciahvałasia niekalki miesiacaŭ. Byli sazvony, było abmierkavańnie roznych tem: kancepcyja, sanitarnyja normy, na što źviartać uvahu pry padbory supracoŭnikaŭ i tamu padobnaje. Kurs byŭ dastatkova cikavym. Ja atrymała ź jaho šmat karysnych kantaktaŭ, pakolki čałaviek, jaki jaho pravodziŭ, sam vałodaŭ paraj kaviarniaŭ u Minsku. I my byli nie pieršym patokam: u jaho ŭžo byli paśpiachovyja kiejsy ludziej, jakija adkryvali pad jaho kiraŭnictvam padobnyja ŭstanovy.

Užo paralelna z navučańniem pačaŭsia etap praktyčnych zaniatkaŭ. U nas byli «chatnija zadańni», pry vykanańni jakich my šukali patencyjnyja miescy dla raźmiaščeńnia svajoj kaviarni.

Ja praviała davoli vialikuju analityčnuju pracu. Naviedała niekalki handlovych centraŭ, razasłała listy mnostvu arendadaŭcaŭ.

Dzieści atrymała admovy, dzieści mianie dadali ŭ śpisy čakańnia, dzieści prosta nie adkazvali. Narešcie, z adnaho handlovaha centra paśla padychodu majoj čarhi ŭ śpisie čakańnia mnie napisali, što pad maje zapyty vyzvaliłasia miesca. I pry žadańni ja mahu jaho razhledzieć.

Ja pačała vyvučać hetuju łakacyju i pryjšła da vysnovy, što tam musili b być niadrennyja pakazčyki. Spojler: jak pakazała praktyka, usio atrymałasia nie zusim tak.

«Dla mianie heta vyhladała jak abjuz čystaj vady»

Moj biznes byŭ kava-kropkaj, kava-pointam u handlovym centry, biez pasadki. Ale z barystam, heta značyć nie kaviarnia z samaabsłuhoŭvańniem. Ahulnyja vydatki na adkryćcio takoha handlovaha punktu skłali kala 3-3,5 tysiač dalaraŭ.

Adkryćcio kaviarni dałosia dastatkova ciažka. Šmat biurakratyčnych kłopataŭ: atrymańnie paśviedčańnia ab rehistracyi, atrymańnie EŁP [elektronnaha ličbavaha podpisu], adkryćcio rachunku ŭ banku, prajektavańnie i stvareńnie z nula mebli dla kaviarni, nabyćcio i ŭziaćcie ŭ arendu techniki. Narešcie, pošuk piersanału, što akazałasia adnoj z samych vialikich prablem. Z-za pošuku piersanału adkryćcio kaviarni ŭ mianie źmiaściłasia na miesiac, bo ja prosta nie mahła znajści ludziej na pazicyju barysty.

Kali kaviarnia pačała pracavać, usio prykmietna ŭskładniła buchhałteryja.

Možna, viadoma, u hetym razabracca. Ale z ulikam astatniaj apieracyjki nakštałt znosin z pastaŭščykami i inšaha maich sił na heta ŭžo nie chapała. Nahadaju, što paralelna ja praciahvała pracavać pa najmie. Tak vyjšła, što na asnoŭnaj pracy ŭ mianie tady byŭ składany pieryjad ź vialikaj nahruzkaj, što zrabiła svoj upłyŭ na dalejšaje raźvićcio padziej.

Adkryćcio prajšło niadrenna, ale nie idealna. Užo na pačatku adna z barystaŭ vyklikała pytańni, i ŭ chutkim časie jana pakinuła naš kalektyŭ. Potym pačalisia pastajannyja pieraźmienki, padmienki niejkija. Navat supracoŭniki, jakija prychodzili niby na pastajanna, pracavali miesiac-dva i sychodzili.

A potym dobraja rabotnica z «bazavaha» štatu nie vytrymała tak doŭha pracavać na akładzie. Zdolnaja jaje zamatyvavać sistema zaachvočvańniaŭ nie pracavała: jak akazałasia, miesca było nie asabliva prybytkovym.

Čamu? Tamu što ŭ HC, u jakim stajała maja kaviarnia, było dastatkova šmat kankurencyi. Sietkavaja kaviarnia Cofix pa źniešnim vyhladzie i pa jakaści praduktu sastupała majoj. Ale dla niedaśviedčanych spažyŭcoŭ kampiensavała hety niedachop praz pazicyjanavańnie siabie jak tannaja kaviarnia z dastupnaj kavaj. I narod heta «chavaje», asabliva ŭ spalnym rajonie, dzie znachodziŭsia moj handlovy punkt. A jašče padčas pracy majoj kaviarni ŭ hetym ža handlovym centry ŭstalavali kavavy aparat, heta značyć kaviarniu samaabsłuhoŭvańnia.

Uvohule, kankurencyi chapała. I hałoŭnaja pryčyna zakryćcia majoj kaviarni była ŭ małoj kolkaści achvotnych pakaštavać naš napoj.

Druhaja pryčyna, z-za jakoj, jak ja liču, biznes nie zadaŭsia — heta pytańni ź piersanałam. Jak akazałasia, składana znajści adkaznych śpiecyjalistaŭ, jakija sapraŭdy raźbirajucca ŭ kavie, umiejuć naładžvać kava-mašynu, pamoł, nie prosta naciskać na knopački. Takich ludziej, jakija razumiejuć, kali kava atrymlivajecca nie asabliva dobraj i viedajuć, što z hetym rabić, vielmi niašmat. A tych, chto paralelna z hetym moža jašče pravodzić dobryja daprodažy, pavialičvać rachunak i pryvablivać naviedvalnikaŭ svajoj charyzmaj i abajalnaściu, jašče mienš.

Bolš za toje, jak ja ŭžo zhadvała, z-za nievialikaha zarobku i śpiecyfiki prafiesii barysty ŭ cełym na hetuju pasadu, jak praviła, prychodzili zusim maładyja dziaŭčaty i chłopcy, krychu starejšyja za 18 hadoŭ. Jakija, na žal, nie vielmi ŭmiejuć pracavać.

Praź sistemu videanazirańnia časta byli bačnyja momanty, kali piersanał padoŭhu adsutničaŭ na pracoŭnym miescy. Byli situacyi, kali piersanał spaŭ.

Supracoŭniki nie pa-haspadarsku stavilisia da pracoŭnaha miesca, pakidali jaho brudnym. Mahli navat pakinuć padčas svajoj adsutnaści arhtechniku na stojcy, što taksama nie vielmi prafiesijna, asabliva ŭ miescy z ažyŭlenym trafikam.

Niekatoryja asoby ŭmudralisia pry hetym pieravodzić na mianie strełki, kryŭdzicca, kazać, kab ja na ich nie złavałasia. Heta moža hučać absurdna, ale dla mianie heta vyhladała jak abjuz čystaj vady ź ich boku. Jon biantežyć, i ty prosta nie viedaješ, što rabić z takim čałaviekam, akramia jak chutčej ad jaho pazbavicca.

Z-za padobnych niepryjemnych momantaŭ nieabchodny byŭ rehularny kantrol. Ale z-za ščylnaj pracy pa najmie kantralavać usio było niemahčyma. Jak potym akazałasia, na pracu kaviarni pryjšło dastatkova šmat niehatyŭnych vodhukaŭ na Jandeks Kartach. A ja z-za maŭčańnia piersanału navat nie viedała pra toje, što niešta adbyłosia.

Byli žachlivyja situacyi, niepryjemnyja i spažyŭcam, i mnie, jak uładalniku biznesu. Naprykład, na staronku kaviarni ŭ Instagram prychodzili stałyja naviedvalniki, jakija raskazvali, što pa 20-40 chvilin čakali barystu, jakaja pierad tym jak pajści nie pakinuła ni infarmacyi pra terminy viartańnia, ni telefona dla suviazi. Vierahodna, ja praviała niedastatkova dobruju pracu pa padbory i padrychtoŭcy piersanału. Adnak kali kaviarnia funkcyjanuje i tabie terminova treba šukać čałavieka, kab jon vyjšaŭ zaŭtra-paślazaŭtra, to vybirać taho, chto budzie pracavać, časam asabliva niama z kaho.

«Faktyčna z ułasnaha zarobku ja płaciła zarobki maim rabotnikam»

Da ŭsiaho hetaha možna dadać, što akramia zarobku supracoŭnikam treba było płacić kuču padatkaŭ, arendnuju płatu i hetak dalej. Uvohule, kožny miesiac u mianie byŭ ź minusam. Ni razu ja navat nie vyjšła ŭ nul. Faktyčna kožny miesiac z ułasnaha zarobku pa asnoŭnym miescy pracy ja płaciła zarobki maim rabotnikam i apłačvała inšyja biahučyja vydatki. U vyniku ja ŭ pazyki da inšych ludiej nie zalezła, ale pierad samoj saboj pytańni majucca.

Ja pratryvała miesiacaŭ ź piać i viasnoj 2024 hoda vyrašyła zakrycca, bo nie bačyła metazhodnaści ŭ praciahu takoj pracy. Ja była źniasilenaja materyjalna, maralna i, napeŭna, navat fizična. Tamu što hetaja ŭstanova znachodziłasia na inšym kancy Minska ad taho miesca, dzie ja žyła, i dabiracca tudy było nie vielmi zručna.

Sa spynieńniem pracy ŭsio taksama akazałasia nie zusim tak prosta. Praz paŭhoda pieryjadyčnaj padačy nulavych dekłaracyj mianie vyklikali ŭ administracyju rajona, dzie vyrazna namiaknuli, što było b niabłaha zakryć moj PUP. Vidać, dla taho, kab u ich na bałansie nie było «miortvych duš».

Pačałasia nastupnaja chvala majho ŭzajemadziejańnia z roznymi instancyjami, što vyklikała šmat ciažkaściaŭ. Jak časavych, tak i finansavych: niekatoryja pytańni było praściej vyrašać sa śpiecyjalistami, jakim treba było płacić. Praź jašče niekalki miesiacaŭ maja jurydyčnaja asoba była zakrytaja aficyjna.

Niahledziačy ni na što, ja liču atrymany dośvied važnym i karysnym. Jak minimum ja dakazała samoj sabie, što mahu adkryć biznes. Ja atrymała vielizarnuju kolkaść infarmacyi, pryblizna razumieju bekhraŭnd małoha biznesu ŭ Biełarusi i dziakuju siabie za toje, što navažyłasia, pieraadoleła svaje strachi i zrabiła toje, na što mnohija nie navažvajucca. Ci budu ja sprabavać adkryvać svaju spravu ŭ budučyni? Nie vyklučaju.

Jašče chaču vykazać padziaku blizkim i nie vielmi ludziam, jakija padtrymali mianie, dapamahli mnie, ciešylisia maim pośpiecham, adkryćciu majoj spravy, supieražyvali mnie. Samastojna spraŭlacca z usim hetym było b našmat ciažej.

• 4
• 0
• 4
• 3
• 1
• 1
• 0
• 1