U Litvie viertalot budzie supravadžać ciahniki ź Biełarusi ŭ Kalininhrad
U paniadziełak litoŭskija pamiežniki pakazali novy viertalot, pryznačany dla supravadžeńnia ciahnikoŭ, što iduć u miežach Śpiecyjalnaj tranzitnaj schiemy (u rasijski Kalininhrad), a taksama dla chutkaha reahavańnia na mahčymyja incydenty, paviedamlaje LRT.
«Hety viertalot dapamoža ŭzmacnić nazirańnie za ciahnikami, što iduć u i z Kalininhradskaj vobłaści», — havorycca ŭ zajavie ministra ŭnutranych spraŭ Uładzisłava Kandratoviča. Pavodle jaho słoŭ, za apošnija hady źmianiłasia situacyja ź biaśpiekaj u rehijonie pryviała da novych pahroz i vyklikaŭ.
«Pamiežniki zachoŭvajuć pilnaść i nadziejna achoŭvajuć dziaržaŭnuju miažu, tamu adnoj z našych pryjarytetnych zadač źjaŭlajecca poŭnaje zabieśpiačeńnie słužby i supracoŭnikaŭ nieabchodnymi srodkami», — adznačyŭ ministr.
Cyrymonija prezientacyi viertalota prajšła na avijacyjnaj bazie Słužby achovy dziaržaŭnaj miažy ŭ Pałuknie. U joj uziała ŭdzieł kiraŭnica Hałoŭnaha ŭpraŭleńnia pa pytańniach mihracyi i ŭnutranych spraŭ Jeŭrakamisii Bieate Hminder.
Śpiecyjalnaja tranzitnaja schiema pryznačana dla zabieśpiačeńnia naziemnaha tranzitu asob pamiž Kalininhradskaj vobłaściu i astatniaj častkaj Rasijskaj Fiederacyi. Novyja viertaloty abstalavany sistemami videanazirańnia, abstalavańniem dla padvieski hruzaŭ, pošukava-vyratavalnym abstalavańniem, supraćpažarnym abstalavańniem i miedycynskimi srodkami.
«Druhi i treci viertaloty buduć ažyćciaŭlać pahraničny kantrol, achovu miežaŭ, a taksama ŭdzielničać u apieracyjach u vypadku nadzvyčajnaj situacyi abo avaryi na BiełAES, šukać ludziej, transpartavać orhany. Pa sutnaści, uvieś śpiektr funkcyj, što vykonvajucca SAHM», — kaža kiraŭnik pamiežnaj słužby Rustam Lubajeŭ.
Kamientary