Joj nie dva z pałovaj stahodździ, jak mnohija ličyli dahetul, a trochi bolš za try dziesiacihodździ.
Cikavaj znachodkaj padzialiŭsia telehram-kanał «Spadčyna».
Vyjava karaleŭskaha pałaca ŭ Hrodnie, jakuju časta vydajuć za malunak XVIII stahodździa i vykarystoŭvajuć pry ilustravańni publikacyj pra hety pomnik i ŭvohule horad časoŭ Vialikaha Kniastva Litoŭskaha, u tym liku ŭ surjoznych vydańniach, stvorana zusim niadaŭna.
Vydańnie Hrodna.life zaŭvažaje, što vyjava šyroka tyražujecca na paštoŭkach, jaje možna znajści na staronkach histaryčnaha časopisa Arche jak byccam redkuju, a taksama ŭ aficyjnym vydańni pra polski Krakaŭ, dzie paznačana, što aŭtar nieviadomy.
Jak tłumačyć telehram-kanał «Spadčyna», nasamreč malunak «Karaleŭski pałac u Hrodnie» byŭ stvorany ŭ 1994 hodzie hrodzienskim mastakom Česłavam Rojem (1942-2004). Miarkujučy pa tym, što akvarelny malunak zachoŭvajecca ŭ Hrodzienskim dziaržaŭnym historyka-archieałahičnym muziei, dzie pracavaŭ i sam Roj, mastak stvaryŭ jaho śpiecyjalna dla muziejnaj ekspazicyi.
Česłaŭ Roj stvaryŭ i inšyja tvory dla ekspazicyi muzieja, naprykład, sieryju malunkaŭ z vyjavami strojaŭ haradžan XVII stahodździa.
Infarmacyja pra aŭtarstva malunka ŭžo źjaŭlałasia ŭ druku raniej. U 12-m numary Biełaruskaha histaryčnaha časopisa za 2022 hod, całkam pryśviečanym Hrodna, byŭ apublikavany artykuł dyrektara muzieja Juryja Kiturki pra historyju stvareńnia najbolš viadomaha malunka karaleŭskaha Novaha zamka ŭ Hrodnie. Ale, mahčyma, praz mały nakład vydańnia artykuł zastaŭsia niezaŭvažany šyrokimi kołami.
Novy pałac u Hrodnie zbudavali ŭ 1737—1742 hadach u časy vaładarańnia karala Aŭhusta Saksonskaha, jak letniuju karaleŭskuju rezidencyju pavodle prajekta Karala Piopielmana. U 1789 hodzie rekanstrukcyju pałaca pravodziŭ Džuzepe Saka. U 1793 hodzie tut adbyŭsia apošni sojm Rečy Paspalitaj, dzie ratyfikavali druhi padzieł krainy.
Dobra viadomyja čarciažy siaredziny i kanca XVIII stahodździa, heta značyć pieryjadaŭ pabudovy i pierabudovy, u tym liku płany, fasady i razrezy, jakija dajuć dobraje ŭjaŭleńnie pra toje, jakim zadumvaŭsia pałac. Ale dziŭnym čynam całkam adsutničaje choć jakaja mastackaja hrafika pałaca taho času.
Pieršyja vyjavy pałaca — zvyčajna nierazborlivyja namioki ŭ ahulnych panaramach vysokaha bieraha Niomana, — datujucca XIX stahodździem, kali rasijskija ŭłady pierarabili karaleŭskuju rezidencyju ŭ vajskovy špital.
U samym pačatku XIX stahodździa Juzaf Pieška zrabiŭ malunak mosta, jaki złučaŭ pahorki Staroha i Novaha zamkaŭ, zachapiŭšy, ale tolki častkova, karaleŭskuju rezidencyju. Na malunku Pieški pałac jašče maje vysoki łamany dach, jak na prajektnych čarciažach, ale inšyja detali nie bačnyja.
Nastupny malunak pałaca zblizku zrobić Napaleon Orda ŭžo ŭ druhoj pałovie XIX stahodździa. Na im taksama amal ničoha nielha razhledzieć praz pyšnuju raślinnaść, za vyniatkam taho, što zamiest vysokaha łamanaha dachu zrabili kazionny pakacisty.
Niahledziačy na toje, što vyjava akazałasia niesapraŭdnaj, jak piša kanał, treba addać naležnaje majsterstvu mastaka, kali amal nichto za doŭhija hady nie zaŭvažyŭ padvochu.
«Naša Niva» — bastyjon biełaruščyny
PADTRYMAĆCiapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi47
Kamientary