Štučny intelekt budzie vyjaŭlać patencyjnych zabojcaŭ u Vialikabrytanii. Krytyki nazyvajuć heta antyŭtopijaj
Ministerstva justycyi Vialikabrytanii pracuje nad prahramaj pa «pradkazańni zabojstvaŭ». Ałharytmy štučnaha intelektu buduć vyjaŭlać patencyjnych zabojcaŭ siarod užo asudžanych złačyncaŭ. Krytyki nazvali prajekt žudasnym i antyŭtapičnym, piša Bi-bi-si.
Brytanskaj niekamiercyjnaj arhanizacyi pa abaronie hramadzianskich svabod Statewatch udałosia daviedacca padrabiaznaści prajekta z dakumientaŭ, atrymanych praz zapyty pavodle Zakonu ab svabodzie infarmacyi. Prajekt byŭ zakazany ofisam byłoha premjer-ministra Ryšy Sunaka. Pieršapačatkova jon nazyvaŭsia «prajektam prahnazavańnia zabojstvaŭ», ale jaho nazvu źmianili na «abmien danymi dla palapšeńnia acenki ryzykaŭ».
Ałharytmy buduć analizavać zakanamiernaści ŭ danych pra złačynstvy, učynienyja da 2015 hoda, na padstavie aficyjnych krynic, siarod jakich Słužba prabacyi i palicyja horada-hrafstva Vialiki Mančester na paŭnočnym zachadzie Anhlii.
Zhodna z aficyjnaj infarmacyjaj, buduć vykarystoŭvacca piersanalnyja danyja tych, u kaho była chacia b adna sudzimaść. Adnak hrupa Statewatch śćviardžaje, što analizavanyja danyja ŭklučajuć infarmacyju i pra ludziej, jakija nikoli nie byli asudžanyja, naprykład, achviary chatniaha hvałtu i ludzi, što sprabavali ździejśnić suicyd abo zajmalisia siełfcharmam (samapaškodžańniem).
Jak piša Telegraph, apracoŭvanaja infarmacyja ŭklučaje imiony, daty naradžeńnia, poł, etničnuju prynaležnaść i identyfikacyjnyja numary ludziej u nacyjanalnaj palicejskaj bazie danych. Padazreńni Statewatch, adznačaje vydańnie, zasnavanyja na pahadnieńni ab abmienie danymi pamiž Ministerstvam justycyi i palicyjaj Vialikaha Mančestera. Raździeł pra typy piersanalnych danych, jakija palicyja pieradaje ŭradu, uklučaje nie tolki infarmacyju pra kryminalnyja złačynstvy, ale i, naprykład, uzrost, kali čałaviek upieršyniu staŭ achviaraj (u tym liku siamiejnaha hvałtu), i kali ŭpieršyniu mieŭ kantakt z palicyjaj. Pieradajucca i takija adčuvalnyja danyja, jak infarmacyja pra psichičnaje zdaroŭje, zaležnaści, siełfcharm, sproby suicydu, invalidnaść i inšyja «markiery zdaroŭja, jakija mierkavana majuć istotnuju vartaść dla prahnazavańnia».
Safija Lijał, daśledčyca Statewatch, nazvała prajekt žudasnym i antyŭtapičnym.
«Znoŭ i znoŭ daśledavańni pakazvajuć, što ałharytmičnyja sistemy dla prahnazavańnia złačynstvaŭ spačatku pamyłkovyja, — zajaviła jana Guardian. — Hetaja apošniaja madel, jakaja vykarystoŭvaje danyja našaj instytucyjna rasisckaj palicyi i Ministerstva ŭnutranych spraŭ, umacuje i ŭzmocnić strukturalnuju dyskryminacyju, što lažyć u asnovie kryminalnaj justycyi».
Na jaje dumku, heta tolki ŭzmocnić pieraduziataść u dačynieńni da rasavych i małazabiaśpiečanych supolnaściaŭ, a vykarystańnie adčuvalnych danych vyklikaje tryvohu.
U Ministerstvie justycyi Vialikabrytanii, tym nie mienš, zajaŭlajuć, što prajekt nosić vyklučna daśledčycki charaktar.
«Jon byŭ raspracavany z vykarystańniem isnych danych, jakija znachodziacca ŭ rasparadžeńni Słužby prabacyi i turmaŭ, a taksama danych palicyi pra asudžanych złačyncaŭ», — zapeŭniŭ aficyjny pradstaŭnik Miniusta. Pavodle jaho słoŭ, prajekt pavinien dapamahčy lepš zrazumieć ryzyku hvałtoŭnych złačynstvaŭ siarod tych, chto znachodzicca na prabacyi.
Ministerstva zajaviła, što Słužba prabacyi i turmaŭ užo vykarystoŭvaje instrumienty acenki ryzyki, i hety prajekt pravieryć, ci palepšycca acenka ryzyki z dabaŭleńniem novych krynic danych, uklučajučy palicejskija.
Spravazdača pra heta budzie apublikavanaja ŭ bližejšy čas, abiacaje Miniust Vialikabrytanii.
Kamientary