Uviečary 8 maja z bałkona sabora Śviatoha Piatra ŭ Vatykanie novaabrany Papa Robiert Frensis Prevo, jaki pryniaŭ imia Leŭ XIV, nadaŭ viernikam pieršaje dabrasłavieńnie. U svajoj pieršaj pramovie jon padkreśliŭ, što śviet maje patrebu ŭ śviatle Chrysta, i zaklikaŭ navodzić masty praz dyjałoh, piša Katolik.life.
«Mir vam! Darahija braty i siostry, heta pieršaje pryvitańnie ŭvaskrosłaha Chrysta, dobraha pastyra, jaki addaŭ žyćcio za Božy statak. Taksama i ja chacieŭ by, kab hetaje pryvitańnie śvietu ŭvajšło ŭ vašyja sercy, dasiahnuła vašych siemjaŭ, usich ludziej, dzie b jany ni byli, usich narodaŭ, usioj ziamli. Mir vam!» — skazaŭ novaabrany pantyfik.
Vitajučy viernikaŭ usioj płaniety, jon zaklikaŭ da adzinstva, miru i adradžeńnia viery, padkreśliŭšy, što śviet maje patrebu ŭ śviatle Isusa Chrysta.
Novy pantyfik ušanavaŭ pamiać svajho papiarednika, Papy Franciška, adznačyŭšy, što naviadzieńnie mastoŭ, dyjałoh i inkluziŭnaść byli asnoŭnymi pryncypami jaho papstva. Jon nahadaŭ pra cichi, ale mocny hołas Papy Franciška, jaki raspaŭsiudziŭ svajo dabrasłavieńnie na ŭvieś śviet.
«Dazvolcie mnie praciahnuć heta dabrasłavieńnie: Boh vielmi lubić nas. Boh lubić nas usich. Zło nie pieramoža. My ŭsie ŭ rukach Božych. Tamu, nieadčuvajučy strachu i abjadnaŭšysia, ruka ab ruku z Boham i adzin z adnym, davajcie razam ruchacca napierad».
Novy Papa padkreśliŭ, što «my vučni Chrysta, i Chrystos idzie napieradzie nas»:
«Śviet maje patrebu ŭ jaho śviatle. Čałaviectva maje patrebu ŭ im jak u moście da Boha i jaho biaźmiežnaj lubovi. Davajcie pracavać razam, kab navodzić masty praz dyjałoh i sustrečy, kab my mahli stać adzinym narodam, jaki žyvie zaŭsiody ŭ miry».
Źviartajučysia da ŭsioj Carkvy z asablivym pryvitańniem, pantyfik skazaŭ:
«My pavinny imknucca być misijanierskaj carkvoj, jakaja navodzić masty, padtrymlivaje dyjałoh i prymaje ŭsich z raskrytymi abdymkami. Niachaj naša prysutnaść budzie napoŭnienaja miłasernaściu i adnosinami, zasnavanymi na lubovi».
Papa padkreśliŭ, što
«my pavinny być sinadalnaj carkvoj — carkvoj, jakaja idzie ruka ab ruku, jakaja imkniecca da miru, miłasernaści i zbližajecca z tymi, chto pakutuje».
Kamientary