Analityk vykazaŭ svajoj mierkavańnie, u čym razyšlisia pohlady Pucina i Łukašenki.
U novym vypusku svajoj prahramy analityk Siarhiej Čały źviarnuŭ uvahu na toje, što Łukašenka asabista nie prakamientavaŭ ni pieramovy ŭ Stambule, ni telefonnuju razmovu Pucina i Trampa. Na dumku Čałaha, heta zusim nie śviedčańnie abyjakavaści.
«Naadvarot, vidać, nakolki heta tema dla jaho adčuvalnaja»,
— śćviardžaje Čały i zhadvaje incydent z zahałoŭkam ahienctva TASS z kamientarom pres-sakratara Łukašenki Natalli Ejsmant, jaki dvojčy mianiaŭsia za karotki pramiežak času. «Pres-sakratar Łukašenki: vyniki pieramoŭ u Stambule — pośpiech kiraŭnictva RF» — heta byŭ pieršy varyjant zahałoŭka, jaki nieŭzabavie źmianili, bo, možna mierkavać, puł Łukašenki taki akcent nie zadavoliŭ.
«Čamu biełaruskim uładam tak nie chočacca pryznavać ni stratehičny, ni taktyčny pośpiech Rasii?» — zadaje pytańnie Čały.
Pryčyna, na jaho dumku, u žadańni Łukašenki spynić vajnu.
Čały nahadvaje: «Łukašenka nieadnojčy z nahody i biez nahody na praciahu niekalkich hadoŭ zajaŭlaŭ ab tym, što spačatku treba spynić vajnu, a potym užo raźbiracca ŭ pryčynach».
«My potym znojdziem, chto vinavaty. Nichto ad adkaznaści nie sydzie. My padrabiazna abmiarkujem i raźbiaremsia ŭ pryčynach hetaha», — kazaŭ Łukašenki błohieru Naŭfału ŭ sakaviku hetaha hoda.
Anałahičnym čynam jon vykazvaŭsia jašče ŭ mai 2022 hoda ŭ intervju ahienctvu Asociated Press:
«Pytańnie nie ŭ tym, chto maje racyju, a chto vinavaty. Treba vajnu spynić. Potym my raźbiaromsia, chto maje racyju, chto vinavaty. Treba spynić hibiel ludziej».
Analityk padkreślivaje: mienavita takoha varyjantu — spynieńnia ahniu biez papiarednich umoŭ — kateharyčna nie prymaje Kreml, jaki «prapanuje spačatku pahavaryć ab chazarach, piečaniehach, Uładzimiry Vialikim i NATA».
Pa mierkavańni Čałaha, Łukašenka nie padzialaje žadańnie Maskvy vieści vajnu biaskonca. Kali Pucin za «My možam paŭtaryć!», to Łukašenka — za «Nikoli znoŭ», pierakanany analityk.
«Rasija ŭpieršyniu adkryta zajaviła ab žadańni vajavać biaskonca. A Łukašenka, niahledziačy na ŭvieś sajuźnicki abaviazak abaviazkova abaraniać śpinu rasijskamu sałdatu, usio čaściej staŭ zajaŭlać ab tym, što jon choča spynić vajnu i jak maha chutčej».
Čały dadaje: «Łukašenku daviałosia publična admovicca ad svajho žadańnia ŭdzielničać u mirnym pracesie i paprasić Pucina ŭličvać intaresy Biełarusi».
Ale Pucin, padobna, nie ŭličyŭ, raz Ejsmant daviałosia namiakać, što Minsk nie naprošvaŭsia na rolu pasiarednika, ale hatovy, kali paprosiać.
«Heta hłyboka asabistaja kryŭda Łukašenki», — śćviardžaje Čały.
Kamientary