Žančyna, jakaja vyjhrała ŭ łatareju i ŭsio spuściła, zamoviła zabojstva muža
Žycharka Hiermanii piać hadoŭ tamu sarvała džekpot u łatarei, vyjhraŭšy bolš za miljon jeŭra. Kali hrošy skončylisia, jana vyrašyła zavałodać majomaściu muža, naniaŭšy dla hetaha kilera.
Jak paviedamlaje Süddeutsche Zeitung, na minułym tydni ŭ adnym z sudoŭ Miunchiena pačali razhlad spravy suprać 58-hadovaj Patrycyi S. i jaje 29-hadovaj dački Sindzi V. pa abvinavačvańniu ŭ zamachu na zakaznoje zabojstva. Razam ź imi na łavie padsudnych znachodziacca chłopiec dački Mikałaj B. i niepasredny vykanaŭca — 33-hadovy hramadzianin Bałharyi Radzi S.
Zhodna z materyjałami spravy, u 2018 hodzie chatniaja haspadynia z prestyžnaha pryharada Miunchiena Patrycyja vyjhrała ŭ łatareju 1,2 miljona jeŭra. Jana stała zvać siabie «hrafiniaj fon S.» i pačała tracić hrošy naprava i naleva.
Da 2023 hoda, usiaho praź piać hadoŭ, ad vyjhryšu ničoha nie zastałosia.
Imknučysia zachavać papiaredni ŭzrovień žyćcia, Patrycyja i jaje dačka ad pieršaha šlubu zanialisia internet-machlarstvam. Adnym z epizodaŭ, zafiksavanym śledčymi, staŭ prodaž padroblenaj sumki Dior na eBay za 3500 jeŭra. Udzielnik tarhoŭ, jaki nibyta nabyŭ Apple Watch Series 8 za 420 jeŭra zamiest hadzińnika ŭ pasyłcy atrymaŭ «źmiaty kavałak papiery i papiarovy ručnik».
Paviedamlajecca, što Patrycyja i Sindzi zarabili dziasiatki tysiač jeŭra na mierkavanym machlarstvie. Adnak, vidać, hetaha było niedastatkova. Pa viersii śledstva, Patrycyja vyrašyła pazbavicca ad muža, ad jakoha i tak chacieła syści, arhanizavaŭšy jaho zabojstva.
Ale vykanać «zakaz» pavinien byŭ inšy čałaviek. Pavodle abvinavačańnia, žančyny ŭhavaryli sužyciela dački — Mikałaja B. — źviazacca z adnym ź jaho znajomych z Bałharyi Radzi S.
Jak śćviardžaje śledstva, Radzi pracavaŭ u śfiery finansaŭ i byŭ viadomy tym, što dla vybivańnia daŭhoŭ nie curaŭsia hvałtu.
Mikałaj i Sindzi adpravilisia ŭ Bałharyju z 20 tysiačami jeŭra ŭ jakaści zadatku. Kileru abiacali 50 tysiač jeŭra za vykananuju pracu.
Śledstva śćviardžaje, što ŭ dzień zabojstva Mikałaj B. padvioz Radzi da doma Patrycyi i jaje muža. Kali jany pryjechali, Patrycyja ŭžo čakała bałharyna i pakazała jamu, dzie jana schavała siakieru, jakoj jon pavinien byŭ zabić jaje muža.
Žančyna taksama nibyta pakazała Radzi, dzie jamu treba schavacca. U hetym miescy na terytoryi ŭčastka byŭ ustalavany datčyk ruchu. Adnak Patrycyja za niekalki dzion da płanavanaha zabojstva ŭhavaryła muža deaktyvavać pryładu.
27 lutaha 2024 hoda kala 21.50 55-hadovy muž vyjšaŭ z doma prajścisia. Mužčyna tolki paśpieŭ začynić dźviery doma, jak kiler napaŭ na jaho. Pavodle abvinavačańnia, jon trojčy ŭdaryŭ achviaru siakieraj pa hałavie i nanios udar nažom. Adnak haspadaru ŭdałosia vyžyć, niahledziačy na ciažkija traŭmy hałavy. Momant napadu zaŭvažyŭ susied.
Admietna, što sama Patrycyja pazvaniła ŭ palicyju i paviedamiła ab napadzie. Muža viertalotam dastavili ŭ balnicu.
Palicyja raspačała rasśledavańnie i ŭ chutkim časie akazałasia, što złačyncy «častkova ŭvachodziać u asabistaje asiarodździe achviary».
Na pracesie Patrycyja i troje jaje saŭdzielnikaŭ zachoŭvajuć maŭčańnie. Nieŭzabavie musić dać pakazańni jaje ŭžo były muž, a prysud čakajecca ŭ pačatku lipienia. Byłoj łatarejnaj miljaniercy pahražaje pažyćciovaje źniavoleńnie.
Ciapier čytajuć
Učora Minsk znoŭ zatapiła. Čamu stalica nie hatovaja da daždžoŭ?2
Kamientary
[Zredahavana]