Sankcyjnaja palityka administracyi Trampa dazvalaje Rasii papaŭniać vajskovy biudžet
Z pačatku 2025 hoda, kali Donald Tramp viarnuŭsia na pasadu prezidenta ZŠA, jahonaja administracyja nie ŭvodziła novych sankcyj suprać Rasii ŭ suviazi z vajnoj va Ukrainie. Navat častku najaŭnych abmiežavańniaŭ admianili. U vyniku Maskva atrymała mahčymaść nabyvać zabaronienyja technałohii i finansavańnie, piša The New York Times.
Analityki vydańnia adznačajuć, što heta asłabiła efiektyŭnaść raniejšych sankcyj. Rasija atrymlivaje mikračypy i kampanienty dla zbroi praz padstaŭnyja kampanii, zarehistravanyja ŭ inšych krainach, jakija nie traplajuć pad sankcyi. Naprykład, kampanija HK GST Limited u Hankonhu pradaje mikračypy, jakija vykarystoŭvajucca ŭ kryłatych rakietach Ch-101, što vykarystoŭvajucca ŭ atakach na Kijeŭ.
Kampanija źviazanaja z čatyrma anałahičnymi dystrybjutarami elektroniki, stvoranymi za apošnija try hady. Siarod ich — sinhapurskaja ChipsX i kitajskaja Carbon Fiber Global, jakaja vyrablaje detali dla BPŁA. Žurnalisty adznačajuć, što krytyčna važnaje abstalavańnie nie było b dastupnaje Rasii ŭ vypadku svoječasovaha abnaŭleńnia sankcyjnaj palityki.
«Treba praciahvać biehčy, kab prosta zastavacca na miescy», — zaŭvažaje ŭ razmovie ź imi ekanamistka Instytuta mižnarodnaj ekanomiki Pietersana Elina Rybakova.
Za časami prezidenctva Džo Bajdena ZŠA pastajanna ŭvodzili sotni novych sankcyj suprać Rasii, ale ciapier heta spyniłasia. Bolš za toje, u krasaviku 2025 hoda Minfin ZŠA źniaŭ sankcyi z žonki rasijskaha aliharcha Barysa Ratenbierha, a ŭ lutym raspuściŭ kamandu, jakaja zajmałasia pošukam aktyvaŭ rasijskich aliharchaŭ, pieraaryjentoŭvajučysia na baraćbu z CHAMAS.
Rasija taksama nie była ŭklučanaja ŭ sankcyi, nakiravanyja na abmiežavańnie handlu z aŭtarytarnymi režymami. Pry hetym ZŠA impartavali z Rasii tavaraŭ na bolš za $3 miljardy ŭ 2024 hodzie.
Amierykanskija palityki z abodvuch asnoŭnych partyj krytykujuć palityku Trampa jak zanadta miakkuju da Kramla. U Kanhresie navat prapanavali novy zakon, jaki ŭmacoŭvaje sankcyi suprać krain, što kuplajuć rasijskuju enierhiju. Ale Tramp pakul nie ŭvioŭ novych sankcyj, bo žadaje zachavać mahčymaść dla pieramoŭ pamiž Maskvoj i Kijevam.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud28
Kamientary
Jeŭropa “ŭvodzić” kuču sankcyj, nakštałt pa naftapraduktam, ale ŭ 2024 kuplaje naftapraduktaŭ u Rasiei jea 21,3 miljarda, pry hetym finansujučy Ŭkrainu na 16.
Rasiei 21, Ukrainie 16. Ale na heta akcenta niama, akcent na Trampa