Prezidenta Indaniezii mahło pryvieści ŭ Biełaruś žadańnie nabyć zbroju
Pavodle francuzskaha vydańnia Intelligence Online, prezident Indaniezii Prabova Subijanta niečakana zavitaŭ u Minsk paśla vizitu ŭ Francyju mahčyma, dla taho, kab damovicca pra zakupki zbroi, piša Reform.news.
Pierad hetym Prabova Subijanta ŭdzielničaŭ u śviatkavańni 14 lipienia ŭ Paryžy jak hanarovy hość, ale paśla admoviŭsia ad zapłanavanaj viačery z pradstaŭnikami francuzskich abaronnych kampanij, spasłaŭšysia na «adsutnaść novych kantraktaŭ». Takoje rašeńnie ździviła francuzski bok, choć aficyjna jano było nazvana «źmienaj farmatu».
Asobnym razdražalnikam u adnosinach z Francyjaj staŭ cisk z boku Paryža z metaj prymusić Indanieziju pryznać Izrail — heta vyklikała niezadavolenaść u indaniezijskaha lidara. U vyniku jahony vizit u Francyju prajšoŭ u ścipłym farmacie — z karotkaj sustrečaj z Emanuelem Makronam.
Na fonie astyvańnia suviaziaŭ z Francyjaj Indaniezija aktyŭna dyviersifikuje svaich abaronnych partnioraŭ. Zamiest francuzskich samalotaŭ-źniščalnikaŭ Rafale kraina zakuplaje kitajskija J-10 i rychtuje svaich piłotaŭ da navučańnia ŭ Kitai. Abmiarkoŭvajucca i zakupki kitajskich padvodnych łodak.
Taksama adbyvajecca zamiena francuzskich rakiet Exocet na tureckija anałahi ad kampanii Roketsan, viadziecca supracoŭnictva z AAE i Italijaj.
Asablivuju ŭvahu francuzskija žurnalisty źviartajuć na toje, što paśla Paryža Prabova Subijanta adrazu nakiravaŭsia ŭ Minsk. Pavodle Intelligence Online, jon moža raźličvać na chutkuju kuplu biełaruskich uzbrajeńniaŭ.
A ŭličvajučy, što Biełaruś nie pradaje zbroju biez uzhadnieńnia z Rasijaj, hety vizit vyhladaje vielmi adčuvalnym dla Francyi, jakaja ŭ svajoj novaj stratehii adkryta nazvała Rasiju doŭhaterminovaj pahrozaj.
Sam Prabova Subijanta aficyjna patłumačyŭ vizit u Biełaruś nibyta pieramovami pa ŭhnajeńniach.
Kamientary
[Zredahavana]