Biełaruska praz dva hady dabiłasia kampiensacyi ad Wizz Air za zatrymku rejsa

Valeryja lacieła z adpačynku ŭ Francyi ŭ Polšču ŭ žniŭni 2023 hoda.

«Ja časta padarožničaju Wizz Air — u ich tannyja kvitki, samaloty nie takija zabityja, jak u Ryanair, lotajuć jany z aeraportu Šapena, a nie Modlina, i zvyčajna nie spaźniajucca. A tut vylet pačali zatrymlivać — na hadzinu, jašče na hadzinu, dy jašče na hadzinu. U vyniku zatrymka skłała bolš za čatyry hadziny. Uličvajučy, što pryjazdžać u aeraport treba za dźvie hadziny, pasažyry praviali pa šeść hadzin u aeraporcie.

Vakoł płakali i kapryzili dzieci, Wifi pracavaŭ ledź-ledź, navušniki razradzilisia — ja prosta nie viedała, kudy siabie padzieć. Pry hetym usie astatnija rejsy lotali pavodle raskładu. Potym usim pasažyram, jakija spaźniajucca, padaryli vaŭčar na ježu — kala čatyroch jeŭra! Niebyvałaja ščodraść za šeść hadzin čakańnia i nastupny dzień na pracy paśla piaci hadzin snu. Paśla pryjezdu dachaty ja adrazu napisała list u Wizz Air z prośbaj vypłacić kampiensacyju za adkładzieny rejs».

Praz dva dni «dbajnaha rasśledavańnia avijakampanii» Valeryja atrymała admovu Wizz Air ad kampiensacyi.

«Škadujem z-za niepryjemnaj situacyi i paśla starannaha rasśledavańnia vašaha vypadku paćviardžajem, što rejs byŭ zatrymany / admienieny praz techničnyja pryčyny. Vyšejzhadanyja abstaviny, pavodle Jeŭrapiejskaha rehłamientu 261/2004, adnosiacca da katehoryi nadzvyčajnych abstavin, tamu sa škadavańniem paviedamlajem vam, što kampiensacyja nie praduhledžana», — paznačana ŭ liście łaŭkostera.

Dziaŭčynu heta naściarožyła: adkaz byŭ bolš padobny na standartnuju adpisku.

«Ź jakich heta časoŭ techničnyja pryčyny avijakampanii adnosiacca da nadzvyčajnych abstavin? Heta ž nie małanka, jakaja ŭdaryła ŭ samalot, a zvyčajnaja padrychtoŭka samalota da vyletu. Ja b jašče pavieryła, što jany ŭ maroz nie mohuć vylecieć, ale dakładna nie z Francyi ŭ žniŭni!»

Tady dziaŭčyna vyrašyła źviarnucca da pasiarednika AirHelp. Pavodle jaje, u elektronnaj formie na sajcie treba było tolki paznačyć asabistyja danyja, danyja pra rejs i adkaz avijakampanii. Jašče praź niekalki dzion jana atrymała paćviardžeńnie, što jaje zajavu pryniali.

«Tam była paznačana kamisija ŭ pamiery 35% u vypadku vyjhranaj sprečki. Uvohule vybaru ŭ mianie nie było: mnie ŭžo admovili, tak što ja ci ničoha nie atrymaju, abo 65% ad kampiensacyi».

Nastupny hod pasiarednik maŭčaŭ — i Valeryja nakiravała jamu pytańnie ab tym, jak prasoŭvajecca sprava. Toj paviedamiŭ, što «ničoha nie moža zrabić praz zatrymki» i što pryciahnuŭ da spravy jurystaŭ, kab «pieradać spravu niepasredna ŭ sud».

Prajšoŭ jašče hod i dziaŭčyna naohuł zabyłasia na hetuju historyju.

«Ja, kali ščyra, daŭno straciła nadzieju, ale ŭ červieni 2025 hoda, praz amal dva hady, mnie pryjšoŭ list ad pasiarednikaŭ, što Wizz Air prajhraŭ spravu i mnie spłaciać kampiensacyju. Ja vielmi ździviłasia!»

Ź lista AirHelp vynikała, što Wizz Air pavinien budzie vypłacić kampiensacyju za spoźnieny rejs ciaham dvuch miesiacaŭ.

«My źviarnulisia ŭ sud i rady paviedamić, što vyjhrali vašu spravu! WizzAir vypłacić vam kampiensacyju za sarvany rejs», — vynikaje z adkazu AirHelp.

U lipieni dziaŭčyna ŭpieršyniu daviedałasia pra sumu kampiensacyi — jana akazałasia nižejšaj za čakanuju.

«U vyniku prybytak pasiarednika skłaŭ nie 35%, a pałovu sumy kampiensacyi (jašče 15% zabrali za sud). Tak što ja atrymała 125 jeŭra. Z adnaho boku, kryŭdna, što pra heta adrazu nie havorać, a ź inšaha boku, heta lepš, čym naohuł ničoha. Ja b za 125 jeŭra dakładna nie ciahałasia pa sudach dva hady. A pasiaredniku heta vidavočna vyhadna — u ich takija spravy optam iduć».

• 9
• 0
• 0
• 0
• 0
• 0
• 0
• 1