Aryšt, SIZA i try hady «chimii» za 4 fota rasijskaj vajskovaj techniki. Mikita Łosik raskazaŭ svaju historyju
Fond BySol 22 lipienia paviedamiŭ pra evakuacyju Mikity Łosika, jakoha asudzili na 3 hady «chimii» pa spravie «Biełaruskaha Hajuna». Mikita ciapier u biaśpiecy ŭ adnoj ź jeŭrapiejskich krain. U razmovie z «Radyjo Svaboda» jon raskazaŭ, čamu vyrašyŭ adpravić fota rasijskaj vajskovaj techniki «Biełaruskamu Hajunu».
Inžynier-prahramist na instrumientalnym zavodzie
25-hadovy Mikita Łosik pracavaŭ inžynieram-prahramistam na Aršanskim instrumientalnym zavodzie. Rodam z Baranavič, skončyŭ himnaziju z vysokim bałam — 9,3. Chacieŭ pastupać u Minsk, u BNTU, ale vyrašyŭ vučycca ŭ rodnym horadzie — pastupiŭ u Baranavicki dziaržaŭny ŭniviersitet na inžynierny fakultet, śpiecyjalnaść «infarmacyjnyja sistemy i technałohii». Vučyŭsia na biudžecie, tamu pajechaŭ pracavać u Oršu pa raźmierkavańni. Praca i kalektyŭ jamu padabalisia, tamu paśla abaviazkovych 2 hadoŭ Mikita zastaŭsia na zavodzie.
Jon raskazvaje, što ŭ pačatku lutaha 2023 hoda išoŭ z pracy — zavod znachodzicca kala čyhunki — i ŭbačyŭ ešałon z rasijskaj vajskovaj technikaj.
«U aficyjnych navinach i ŚMI kažuć, što Biełaruś nie ŭdzielničaje ŭ vajnie, što heta mirnaja kraina. Nas ź dziacinstva vučyli, što vajna — heta strašna, «nie vajnie». A tut pa biełaruskaj terytoryi viazuć rasijskuju techniku na vajnu! Heta mianie vielmi razzłavała. Vieźli jaje adkryta, nie nočču, a siarod biełaha dnia — ceły ešałon tankaŭ, zienitnych ustanovak ź litarami Z i V, u vahonach z abrevijaturaj RŽD. Ja zrabiŭ niekalki zdymkaŭ i adpraviŭ u «Biełaruski Hajun», — tłumačyć Mikita.
«Stać na kaleni, ruki ŭ kajdanki»
Bolš čym praz dva hady, 9 krasavika 2025 hoda, a 6-j ranicy niechta pačaŭ mocna stukać u dźviery internata, dzie žyŭ Mikita. Jon padumaŭ, što heta pjany susied zabyŭsia klučy. Susied adkryŭ dźviery — na parozie byli siłaviki ŭ poŭnaj ekipiroŭcy. Jaho pakłali tvaram u padłohu. Potym toje ž samaje zrabili ź Mikitam. Apieratyŭnik biez maski pakazaŭ pierapisku z «Biełaruskim Hajunom».
«Heta była pierapiska za luty 2023-ha. Ja jaje daŭno vydaliŭ. Adkul jana ŭ ich — niezrazumieła. Spačatku ŭsio admaŭlaŭ. Mnie zahadali sabracca, paviali ŭ busik, zahadali stać na kaleni, ruki zakavali u kajdanki. Pakul čakaŭ, praviali pieratrus, znajšli stary telefon, ź jakoha ja ŭsio rabiŭ. Pavieźli ŭ Viciebsk. Pa darozie pahražali: «Chočaš da brata ŭ susiedniuju kamieru?» Ja pažartavaŭ: «Było b dobra, daŭno nie bačylisia». Žart nie zrazumieli», — kaža Mikita.
IČU biez matracaŭ i bializny
U śledčaha ŭžo čakała advakatka. Jana paraiła nie pryznavacca i ničoha nie kamientavać. Na pieršym dopycie pytali pra pracu, susiedziaŭ, kaleh. Uviečary advieźli ŭ izalatar časovaha ŭtrymańnia.
«Umovy tam — jak u 2020 hodzie. Palityčnych trymajuć u kajdankach, časta mianiajuć kamiery, nie dajuć ni matracaŭ, ni bializny. Śpiš na hołym mietale abo padłozie. Śviatło nie vyklučajuć, pravierki 2—3 razy za noč. Psichałahičny cisk, pravakacyi. Mianie nie bili, tolki abražali», — raskazvaje Mikita.
U IČU jon pravioŭ 3 dni. KDB ničoha nie znajšoŭ, akramia chešteha «Nie vajnie» i staroha statusu ŭ «Vkontaktie» ź bieł-čyrvona-biełym i ŭkrainskim ściahami — za heta zaviali administracyjnuju spravu.
«Pytali, ci «było b lepš, kali b pieramahła Cichanoŭskaja?» Ja nie paddavaŭsia. Opier kazaŭ: «Ty dumaješ, što ničoha nie zrabiŭ, ciabie heta vyratuje? Chacieŭ vajny i razvału krainy?» — kaža Łosik.
Pavodle jaho, palityčnych u Viciebskim IČU i SIZA šmat. U kožnaj kamiery 2—3 «palityčnyja». Spravy «Hajuna» staralisia zaviaršyć za 3 miesiacy. Mikita apošnija 1,5 miesiaca pravioŭ bieź śledčych dziejańniaŭ. U kancy traŭnia pačaŭ znajomicca sa spravaj — 4 tamy. Abvinavačańnie: č. 1 art. 361-4 (sadziejničańnie ekstremisckaj dziejnaści). Prakuror źniaŭ abciažarvajučyja abstaviny.
Sud i prysud
2 lipienia pačaŭsia sud — vioŭ Raman Dehoda. Viadoma było, što praces doŭžycca 2 dni — 2 i 8 lipienia.
«Mikita Łosik u niapeŭny pieryjad času, ale nie paźniej za 16:50 10 lutaha, znachodziačysia ŭ Oršy, z namieram sadziejničańnia ekstremisckaj dziejnaści…» — začytaŭ prakuror.
Abvinavaŭca pytańniaŭ nie zadavaŭ. Sudździa dziejničaŭ aktyŭna: cytavaŭ sacsietki, staryja padpiski na telehram-kanały, 4 fota techniki. Mikita kazaŭ, što chacieŭ dasłać fota Antonu Matolku, ale adpraviŭ u «Hajun». Sudździa kazaŭ: «Jak heta nie viedali, kamu dasyłajecie?» Potym dazvoliŭ uzhadnić pazicyju z advakatam.
8 lipienia — apošni dzień. Prakuror spačatku prasiŭ 4 hady «chimii». Prysud — 3 hady «chimii» z nakiravańniem u papraŭčuju ŭstanovu adkrytaha typu. Mikitu vyzvalili z zały suda.
Pakul Mikita byŭ u SIZA, jaho zavočna aštrafavali pa administracyjnaj spravie — za avatarku sa ściahami i chešteham «nie vajnie». Štraf — 80 bazavych (3360 rubloŭ).
Emihracyja
Praź niekalki dzion paśla suda Mikita vyrašyŭ źjechać z krainy.
«Ja, viadoma, radavaŭsia, što nie turma, a «chimija». Ale šmat čuŭ, što ŭmovy tam ciažkija, lubaja drobiaź — parušeńnie. Try parušeńni — i «chimiju» mohuć zamianić na kałoniju. Plus proźvišča moža pieraškadžać. Tamu vyrašyŭ źjechać, chacia heta było niaprosta», — kaža jon.
Fond BySol abviaściŭ zbor, kab dapamahčy Mikitu adaptavacca i pačać novaje žyćcio. Padtrymać jaho možna pa spasyłcy.
Ciapier čytajuć
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada7
Kamientary
(z poŭnaha artykuła, tut skaročanaja viersija)
Heta vyciahvajuć ekspartam danych z akaŭnta telehram. I hetaja infarmacyja nie vydalajecca ŭ telehram.
Chto dahetul karystajecca starym akaŭntam, jaki byŭ aktyŭny da 2022 h. (abo paźniej, kali vy mieli pratesnyja padpiski i čaty), vydalajcie i stvarajcie novy.