U Minsku źjaviłasia aleja aŭtarskich łavak, stvoranaja pa eskizach školnikaŭ ŠMAT FOTAŬ
Dniami ŭ Minsku źjaviłasia novaja aleja aŭtarskich łavak. Ich pastavili ŭ ramkach konkursu na najlepšuju łaŭku Pieršamajskaha rajona. Admietnaja asablivaść: prynamsi niekatoryja łaŭki vykananyja pa eskizach dziaciej. Ich adpraviŭsia hladzieć žurnalist vydańnia Blizko.by.
Dzie źjaviłasia novaja aleja łavak?
Łaŭki vystrailisia ŭzdoŭž levaha bieraha Ślapianskaha kanała na ŭčastku ad vulicy Kiedyški da praśpiekta Niezaležnaści, praktyčna praz darohu ad Nacyjanalnaj biblijateki. Raniej tut była zvyčajnaja ściežka, absypanaja kroškaj, ź niekalkimi zvyčajnymi łaŭkami.
Ź minułaha hoda ŭzdoŭž kanała idzie ramont, ściežku vyraŭniali i zamaścili plitkaj.
Mabyć, nie ŭsie raboty vykananyja pa eskizach školnikaŭ, ale takich usio ž niamała. «Školnyja» łavački pieramiažoŭvajucca łaŭkami ad pradpryjemstvaŭ stalicy. Udzieł u spabornictvach u hetym hodzie pryniali 19 arhanizacyj.
Voś łaŭka, u jakoj śpinka vykananaja ŭ vyhladzie takoha skajłajnu — siłuetu viadomych budynkaŭ horada. Choć jany i stylizavanyja, ale možna adhadać «Varoty Minska», Čyrvony kaścioł, Usichśviackuju carkvu, Śviataduchaŭ sabor, ratušu, Nacyjanalnuju biblijateku, Pałac kultury prafsajuzaŭ, hadzińnikavy zavod, manumient Pieramohi, 15-y korpus BNTU. Łaŭku zrabiła pradpryjemstva «Minskkamunciepłasietka», na łaŭcy jość i ich deviz: «My adkaznyja za ciapło i kamfort».
Šachmatnuju łaŭku pad nazvaj «Šach i mat» pradstaviła kamunalnaje ramontna-ekspłuatacyjnaje ŭnitarnaje pradpryjemstva «DomEnierhaServis». Na joj, praŭda, nie raźmiaścili samu šachmatnuju došku. Zrešty, na cyrymoniju adkryćcia alei łavak došku ŭsio ž prynieśli, i sudziejskaja kalehija navat pasprabavała razyhrać partyju.
Voś łavačka ad «Minhaza». Tut siedakoŭ zatulaje ad sonca vialiki zialony list. Hetaja łaŭka stvoranaja pa eskizie Anastasii Alšeŭskaj sa škoły №137. Jana raskazvaje: «U maim prajekcie prysutničaje elemient u vyhladzie litary «Ŭ» — simvała biełaruskaj movy i identyčnaści našaha naroda». Znojdziecie hetuju litaru? Mahčyma, na «Ŭ» abapirajecca stolik.
Minski marharynavy zavod brendavaŭ łavačku svaim tavarnym znakam «Załataja kropla» ŭ firmovaj rasfarboŭcy. Słova «Kapla» tonieńka vypilili — i tamu zdajecca, što mienavita pa hetaj pryčynie davoli chutka jano adłamajecca pad ciskam čyjoj-niebudź śpiny.
Nastupnaja łaŭka zroblenaja pa matyvach kazki Puškina pra rybaka i rybku. Łaŭku vyrabiła pradpryjemstva «Biełenierharamnaładka» pa eskizie 12-hadovaj Ksienii Sakałovaj sa škoły №63. Łaŭka nazyvajecca «Śviatočnaja». Kali pahladzieć na jaje ŭ tarec, to možna ŭbačyć, što łaŭka padobnaja da razhornutaj knihi.
Łaŭku z kłavišami na śpincy pad nazvaj «Rajal» vyrabiŭ Ekśpierymientalny zavod pa eskizie 17-hadovaj Vidany Šlender z 137-j škoły.
Niekalki łavak nie adroźnivajucca admysłovymi štukarstvami: možna navat i nie zrazumieć, što jany konkursnyja. Choć kožnaja adroźnivajecca ad inšaj. Łaŭka z zavituškami i padstaŭkami pad kvietkavyja kašpo nazyvajecca «Natchnieńnie». Chto natchniŭ ŽEU № 6 Pieršamajskaha rajona na taki tvor, nieviadoma.
Voś hetu zrabiła ŽEU №2 Pieršamajskaha rajona.
A hetu — ŽEU №3.
A ŽEU №4 pradstaviła «Łaŭku prymireńnia» sa skošanymi adzin da adnaho siadzieńniami. Vuhał «sychodžańnia», zrešty, zusim nievialiki.
Trynaccacihadovaja Anhielina Tupikina sa škoły №225 zajmajecca ŭ studyi vyjaŭlenčaha mastactva «Juny mastak». Na eskiz łaŭki Anhielina vydatkavała kala dvuch tydniaŭ.
«Pry napisańni hetaj karciny mianie natchniała pryhažość rodnaha kraju. Tamu atrymałasia nie prostaja łaŭka, a łaŭka, hledziačy na jakuju ty paznaješ svaju krainu. Usie my viedajem, što busieł — heta hałoŭny simvał Biełarusi, simvał miralubnaści i mudraści, tamu jon znachodzicca ŭ centralnaj častcy łaŭki. Naš rodny kraj znakamity svaimi zialonymi palami. Ja adlustravała kałasy i vasilki — kvietki, jakija časta sustrakajucca na našych prastorach», — cytuje jaje BiełTA.
Łaŭku ŭ formie ryby pad nazvaj «Miesca klovu» vyrabiŭ Zielanbud Pieršamajskaha rajona. Tut sapraŭdy časta siadziać rybaki, choć tablički i papiaredžvajuć, što łavić rybu zabaroniena.
«Minskija kabielnyja sietki» pradstavili łaŭku, stvoranuju pa matyvach dziciačaha malunka.
«Hety art-abjekt nie tolki ciešyć voka, ale i simvalizuje tvorčy padychod dy suviaź pamiž pakaleńniami, unosiačy jarkija farby ŭ haradski łandšaft», — śćviardžaje pradpryjemstva.
Aŭtarstva hetych łavak vyśvietlić nie ŭdałosia.
Ramaŭtadar Pieršamajskaha rajona vyrabiŭ voś takuju łaŭku pad nazvaj «Pamiać minułaha — naša sučasnaść, budučynia». Pra jaki-niebudź eskiz školnika ŭ asnovie hetaj łaŭki nie paviedamlajecca — vierahodna, heta tvorčaść samich ramaŭtadaraŭcaŭ.
«Łaŭka syščyka» zroblenaja pa malunku vučnia škoły №115 Arcioma Mitara. Lohka zrazumieć, što chłopiec zmaloŭvaŭ svajho piersanaža z hieroja multfilma «Pa śladach bremienskich muzykaŭ». Možna zaŭvažyć, što kaścium hieroja i nožki łaŭki značna sproščanyja ŭ paraŭnańni z eskizam. Zatoje adnoj z nožak łaŭki faktyčna źjaŭlajecca naha samaha syščyka!
Kampanija MTS, jakaja pradstaviła łaŭku, śćviardžaje, što postać syščyka dapamahaŭ rabić viadomy skulptar, ale imia jaho vydavać nie choča. Tak što viercie na słova: heta vielmi viadomy skulptar, jaki pažadaŭ zastacca vielmi nieviadomym.
Novyja łaŭki aceńvalisia žury pa niekalkich kryteryjach. Uličvalisia ŭnikalnaść idei, aryhinalnaść dyzajnu, niestandartnyja tvorčyja i techničnyja rašeńni, składanaść vykanańnia i, viadoma, ustojlivaść kampazicyi da atmaśfiernaha i antrapahiennaha ŭździejańnia. Vyniki konkursu buduć ahučany da Dnia horada, a pradpryjemstvy-pieramožcy i junyja aŭtary idej atrymajuć pamiatnyja padarunki.
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada8
Kamientary
Na žal, bolšaść "tvoraŭ" na hetaj alei vyklikajuć sumnyja emocyi. Vielmi šmat niaŭdałych rašieńniaŭ.