Na Vałaamie, dzie niadaŭna byli Łukašenka z Pucinym, paviesili fresku, jak rasijski vajskoviec z Z pieraviazvaje paranienaha ŭkrainskaha sałdata
«U hetym chramie paminajuć rasijskich sałdat usich časoŭ, i, viadoma, u ich liku ŭdzielniki śpiecyjalnaj vajennaj apieracyi».
U carkvie Smalenskaj ikony Božaj Maci na terytoryi Smalenskaha skita Vałaamskoho manastyra źjaviłasia pryśviečanaja vajnie freska. Na joj rasijski vajskoviec ź litaraj Z na rukavie pieraviazvaje hałavu vajennamu USU, źviartaje ŭvahu «Ahientstvo».
Fresku pakazali ŭ siužecie telekanała «Rasija 1». «U hetym chramie paminajuć rasijskich sałdat usich časoŭ, i, viadoma, u ich liku ŭdzielniki śpiecyjalnaj vajennaj apieracyi», — skazali ŭ siužecie.
«Jość navat freska, na jakoj naš voin pierad abliččam Spasa Nierukatvornaha pieraviazvaje rany sałdatu USU. Pravasłaŭnaja carkva, jak i stahodździe tamu, duchoŭna padtrymlivaje vojska Rasii», — paviedamiŭ rasijski dziaržaŭny kanał.
Freska źjaviłasia na terytoryi Smalenskaha skita nie paźniej za žnivień 2023 hoda, śviedčyć publikacyja vajennaha adździeła Maskoŭskaha patryjarchatu. Adnak tady na hety fakt nie źviarnuli vialikaj uvahi.
Na frescy na ruce rasijskaha vajskoŭca namalavanaja litara Z u kolerach hieorhijeŭskaj stužki, na ruce vajskoŭca USU — paviazka sa ściaham Ukrainy.
Kiraŭnik Ruskaj Pravasłaŭnaj Carkvy patryjarch Kirył nieadnarazova apraŭdvaŭ uvarvańnie Rasii va Ukrainu. Paśla abviaščeńnia mabilizacyi jon faktyčna paabiacaŭ adkupleńnie hrachoŭ tym, chto pajšoŭ vajavać. U 2023 hodzie patryjarch zajaviŭ, što vajnoj va Ukrainie Rasija adstojvaje duchoŭnyja kaštoŭnaści, a taksama zaklikaŭ pravasłaŭnych rasiejcaŭ dapamahać vajskoŭcam. U sakaviku 2024 hoda RPC na suśvietnym ruskim narodnym sabory pad staršynstvam Patryjarcha Kiryła nazvała vajnu z Ukrainaj śviaščennaj.
Kamientary