Efiektny na toj čas minski šmatpaviarchovik zdali sa skandałami i vialikim spaźnieńniem.
Žyły kompleks na Niomanskaj, 45 (mikrarajon Kamiennaja Horka) pačali budavać u 2010 hodzie. Dom-vołat atrymaŭ nazvu «Akcent». Šmatpaviarchovik pavinny byli ŭźvieści za dva hady, adnak budoŭla raściahnułasia na ŭsie čatyry. Kolki ciapier tam kaštuje žyllo, piša Realt.
U «Akcencie» — 6 padjezdaŭ, 14-16 pavierchaŭ i 260 kvater. Žyllo ŭ domie prapanoŭvali ŭsim achvotnym. Pieršapačatkova (jašče na katłavanie) nabyć adnapakajoŭki, dvuški i trochpakajoŭki možna było pa 950-1050 dalaraŭ za mietr. Dalej pa miery ŭźviadzieńnia pavierchaŭ košt kvadratnaha mietra ros. Tak, na finišy budoŭli cana dasiahała ŭžo 1300-1400 dalaraŭ.
Budavała šmatpaviarchovik «Uschodniaja budaŭničaja kampanija». Jak paźniej vyśvietliłasia, jana na 99% naležała rasijskamu biznesu. Zdača doma supravadžałasia skandałam. Navasielcy znajšli ŭ budynku masu niedarobak: ad niebiaśpiečnych parenčaŭ da niepracujučych liftaŭ. Na ščaście, usio heta ŭžo daŭno vypraŭlena.
Zaraz unutry padjezdaŭ — jakasnaje sučasnaje azdableńnie, simpatyčnyja choły i akuratnyja leśvičnyja kletki. U domie stajać datčyki tempieratury i rehulatary padačy haračaj vady. Vakoł šmatpaviarchovika i ŭ liftach jość kamiery videanazirańnia. Kiruje majomaściu ŽK tavarystva ŭłaśnikaŭ.
A voś dvor zusim zvyčajny, dy jašče i ahulny z susiednimi damami. Tut raźmiaściłasia naziemnaja parkoŭka i dziciačaja placoŭka.
Darečy, u samyja pieršyja hady nijakaj asablivaj infrastruktury pobač z novabudoŭlaj nie było. Ciapier ža pobač handlovy kompleks z kramaj «Marcin», kruhłasutačny vielizarny hipiermarkiet «Jeŭraopt», a nasuprać dabudoŭvajuć fizkulturna-azdaraŭlenčy kompleks z basiejnam. Akramia taho, niepadalok u 2026 hodzie pavinien adkrycca šmatpakutny handlova-zabaŭlalny centr «Mieha Park», jaki ŭ minułym hodzie narešcie zajmieŭ novaha ŭładalnika.
Što tyčycca mietro, to da stancyi «Kamiennaja horka» adsiul — 2 prypynki na hramadskim transparcie, abo 15 chvilin chady.
Pobač z domam znachodzicca park imia Uha Čaviesa.
Ciapier u domie, piša Realt, pradajucca dźvie kvatery. Adna ź ich — dvuchpakajovaja na 60 kvadrataŭ biez azdableńnia. Cana — 100 tysiač dalaraŭ (1642 dalary za mietr).
Druhaja — adnapakajovaja kvatera na 40 kvadratnych mietraŭ, z dobrym ramontam. Cana — 89,9 tysiačy dalaraŭ (2228 dalaraŭ za mietr).
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary