«Bajsoł» pačaŭ rabić pieršyja vypłaty niadaŭna vyzvalenym palitviaźniam
11 vieraśnia na volu vyjšła vialikaja hrupa biełaruskich palitviaźniaŭ. Adrazu paśla hetaha pačała pracavać sistema padtrymki, jakaja vytrymała vialiki cisk dziakujučy akazanaj ludźmi salidarnaj dapamozie, paviedamiŭ Fond salidarnaści «Bajsoł».
Na siońniašni momant udałosia naźbirać amal 110 tysiač jeŭra na ekstranyja patreby tych, chto vyzvaliŭsia. Da pracesu dałučylisia i biełaruskija, i mižnarodnyja partniory, što dazvoliła arhanizavać hodny pryjom pieršaj vialikaj chvali vyzvalenych palitviaźniaŭ i ŭzhadnić dalejšyja kroki.
Usie vyzvalenyja mohuć atrymać pa 1000 jeŭra ad Mižnarodnaha humanitarnaha fondu. Vypłaty pačalisia adrazu paśla taho, jak pastupili pieršyja zajaŭki.
Hety praces nie zaŭsiody prosty: mnohich vysłali biez pašpartoŭ, tamu ŭźnikajuć ciažkaści z afarmleńniem dakumientaŭ i atrymańniem srodkaŭ. Arhanizacyi aktyŭna šukajuć rašeńni, kab u vyniku nichto nie zastaŭsia biez dapamohi. Dla zvarotu treba kantaktavać z fondam «Bajsoł» praz telehram-kanał @bysol_pzk.
Na miažy vyzvalenyja atrymali karotkaterminovyja litoŭskija vizy. Ale kab zastavacca ŭ krainie dalej, im patrebnyja dakumienty doŭhaterminovaha znachodžańnia. Hety praces patrabuje vydatkaŭ (konsulskija zbory, afarmleńnie strachoŭki i inš.). Hrošy na heta ŭžo pačynajuć vydzialacca z ekstrannaha fondu. Z hetych ža srodkaŭ buduć finansavacca i inšyja nieadkładnyja patreby ludziej.
Humanitarnyja arhanizacyi ciapier vypracoŭvajuć praktyčny miechanizm padtrymki: vyvučajuć realnyja patreby vyzvalenych, testujuć pakiety dapamohi i novyja mietady pracy. Razam z partniorami prymajucca rašeńni ŭklučyć u hety praces finansavyja instrumienty «Bajsoła», u tym liku vykarystoŭvajučy ekstranny zbor.
Pa miery taho, jak buduć rabicca viadomymi novyja abstaviny, śpiektr dapamohi budzie pašyracca. Meta — nie tolki dapamahčy tym, chto vyzvaliŭsia ciapier, ale i stvaryć hnutkuju, efiektyŭnuju sistemu, jakaja zmoža chutka reahavać na novyja chvali vyzvaleńniaŭ.
Za pieršaj vialikaj hrupaj mohuć pajści inšyja, prytym režym budzie praciahvać vydvarać ludziej z krainy biez mahčymaści zastacca ŭ Biełarusi. Tamu sistema dapamohi budzie pracavać z pavyšanaj nahruzkaj i nadalej. Tamu joj patrebnyja ŭžo sabranyja srodki i dalejšaja padtrymka biełarusaŭ, bo mienavita salidarnaść daje mahčymaść vytrymlivać takija vyprabavańni.
Abjaŭleny zbor na padtrymku vyzvalenych palitviaźniaŭ
Daviedki vyzvalenych palitviaźniaŭ śviedčać, što ich śpis składaŭsia nie ŭ apošni momant
Cichanoŭskaja: Heta było nie vyzvaleńnie, a departacyja
«Pastupiŭ ukaz vyniščyć maralna kančatkova». Pieršaje vialikaje intervju Mikoły Dziadka paśla vyzvaleńnia
Ciapier čytajuć
Cichanoŭski adkazaŭ Cichanoŭskaj: Čamuści nie zhadvajecca, što reabilitacyja syna adbyvałasia ŭ kvaterach i damach, jakija ja kupiŭ93
Kamientary