28‑hadovaj biełaruscy paśla žudasnaj avaryi ŭ Tajłandzie nie mohuć akazać dapamohu — niama patrebnaj kryvi
U Tajłandzie paśla pieravarotu ekskursijnaha aŭtobusa ŭ reanimacyi apynułasia 28‑hadovaja biełaruska Nastaśsia Jasiukievič. Jon terminova patrebny donary z redkaj dla Tajłanda hrupaj kryvi — treciaja admoŭnaja, piša «Maskoŭski kamsamolec».
Avaryja zdaryłasia 6 listapada ŭ pravincyi Kančanabury na maršrucie da raki Kvaj, ekskursijny aŭtobus z turystami pierakuliŭsia i zvaliŭsia z uzvyšša. Paciarpieli hramadzianie Rasii i Biełarusi, dva čałavieki trapili ŭ reanimacyju (usiaho ŭ śpisie tych, chto trapiŭ u balnicu, było 12 čałaviek — tak možna mierkavać z fota śpisu, jakoje vykłali ŭ internet).
Pa słovach vałancioraŭ, ciapier praca chirurhaŭ u špitali spyniłasia. U banku kryvi špitala pusta.
U 28‑hadovaj biełaruski šmatlikija pierałomy — rebry, skuła, pazvanočnik. Žančynie vydalili sielazionku i žoŭcievy puzyr.
«Samy mocny ŭdar pryjšoŭsia na levy bok — ludzi, jakija tam siadzieli, paciarpieli macniej za astatnich. Naścia, naša siabroŭka, znachodziłasia ź levaha boku…», — raskazvaŭ pra jaje «Anłajnieru» mužčyna, jaki znachodziŭsia ŭ tym aŭtobusie.
«Chutkaja, darečy, pryjechała vielmi chutka, ciaham troch chvilin. My z Naściaj pajechali ŭ najbližejšuju balnicu. Jana znachodziłasia, miakka skažam, u niejkaj hłuchmieni, MRT tam nie było. Tady Naściu pieranakiravali ŭ najbližejšy «rajcentr». Ja pajechaŭ ź joj, bo trochi viedaju anhlijskuju.
Balnica akazałasia dziaržaŭnaj, tam Naściu pryniali, zrabili KT, MRT i hetak dalej. Vyjaviłasia, što ŭ jaje złamanyja niekalki rebraŭ i z adnaho, i z druhoha boku. Taksama razryŭ sielazionki, niejkija paškodžańni piečani, a jašče złamany dziasiaty pazvanok ŭ hrudnym adździele.
Naści terminova patrebnaja była apieracyja pa vydaleńni sielazionki. Pakolki ja byŭ adzinym, chto viedaje Naściu, ź mianie ŭziali zhodu na praviadzieńnie apieracyi. Paśla apieracyi jaje pakłali ŭ intensiŭnuju terapiju, i tam jana dahetul. My naviedvajem jaje kožny dzień. Joj robicca lepš. Lekary kažuć, što stan stabilny, bolš apieracyja nie patrebnaja. Ale pačynajecca doŭhaje adnaŭleńnie», — kazaŭ raniej jaje znajomy.
Paśla avaryi Nastaśsia straciła šmat kryvi, piša «Maskoŭski kamsamolec». Pa słovach Śviatłany Šarstabojavaj, jakaja dapamahaje ruskamoŭnym u Tajłandzie, u banku kryvi balnicy pusta, zapasy vyčarpany, praca chirurhaŭ faktyčna spynienaja. Tym časam dziaŭčynie patrabujecca ekstrannaja apieracyja i pieralivańnie kryvi.
Śviatłana prosić adhuknucca donaraŭ z treciaj admoŭnaj hrupaj kryvi, jakaja redka sustrakajecca ŭ Tajładzie.
U fejsbuku možna pabačyć abjavy ab tym, što dla Nastaśsi šukajuć donaraŭ kryvi.
U Nastaśsi piacihadovy syn. Baćki paciarpiełaj taksama šukajuć čałavieka, jaki zmoh by akazvać dohlad u pałacie, i hatovy apłacić jaho pracu.
Raniej u MZS paviedamlali, što paciarpiełaja biełaruska znachodzicca pad nahladam daktaroŭ u stabilnym stanie i atrymlivaje nieabchodnuju miedycynskuju dapamohu.
Ciapier čytajuć
Siarhiej uziaŭ hrošy za kantrakt i pajšoŭ zdavacca ŭ pałon pry pieršaj mahčymaści. Pakručasty los biełarusa, jaki padpisaŭsia vajavać za Rasiju1
Kamientary