Jak siabie pavodziać elektramabili ŭ luty maroz? Spytali va ŭłaśnikaŭ
Nizkija tempieratury dadajuć prablem nie tolki ŭłaśnikam dyzielnych aŭto, jakija ryzykujuć nie zapuścić ruchavik.
«Zaradžaju kožny dzień»
Ułaśnik elektryčnaj Volvo kaža, što z nadychodam marazoŭ zaradžaje aŭtamabil kožny dzień.
«Maksimalny zapas chodu, zajaŭleny vytvorcam, — 420 kiłamietraŭ. Pa fakcie — 360. Kali na vulicy da 0, to ŭ źmiešanym režymie mašyna spažyvaje kala 21 kVt·h na 100 km. Z nadychodam marazoŭ spažyvańnie ŭzrastaje da 45—50 kVt·h. Kali budzie pad -30 hradusaŭ, to moža i da 55 kVt·h vyraście. Atrymlivajecca, što na poŭnaj zaradcy ŭ taki maroz možna prajechać tolki kala 150 km».
Pry hetym aŭtamabilist adznačaje, što, niahledziačy na mocnaje skaračeńnie zapasu chodu, jon nie ekanomić enierhiju i praciahvaje paŭnavartasna karystacca piečkaj, padahrevam siadzieńniaŭ i styrna.
«Ale kab być upeŭnienym, što mašyna nie razradzicca niedzie pa darozie, to zaradžaju jaje ciapier kožny dzień. Pakolki zaradžaju doma, to jeździć na elektryčcy dla mianie ŭsio adno tanna. Ale kali padličyć, kolki kaštuje zaradka, asabliva chutkaja, u horadzie, to ŭ mocnyja marazy vychodzić daražej, čym jechać na dyzieli abo bienzinie», — kaža aŭtamabilist.
Minus 50—60% zapasu
Mužčyna, jaki jeździć na Tesla Model S, kaža, što z prychodam mocnych marazoŭ hetaj zimoj zapas chodu skaraciŭsia pryblizna na 50%. Na poŭnaj zaradcy jon ciapier moža prajechać nie bolš za 200 kiłamietraŭ.
Inšy surazmoŭca na Tesla Model Y taksama kaža, što ŭ taki mocny maroz, jak ciapier, mašyna stracić da 60% ad zapasu chodu.
«Kali letam jeździć kajfova i vielmi tanna, to ŭ pieryjad mocnych marazoŭ elektramabil — heta nie samy lepšy vybar. Praŭda, heta, chiba, pieršaja zima, kali mieć elektramabil mnie nie daspadoby. U minułyja hady, kali mocnych marazoŭ amal nie było, uražańni byli bolš pazityŭnyja», — pryznajecca ŭłaśnik Model Y.
Jak i ŭłaśnik elektryčnaj Volvo, abodva aŭtamabilisty na Tesla žyvuć u pryvatnym siektary i zaradžajuć mašyny doma. A ŭ dvuch z troch surazmoŭcaŭ, aproč elektryčki, u siamji jość druhaja mašyna z ruchavikom unutranaha zharańnia.
«Pa viaśnie płanuju pradavać aŭto»
Dziaŭčyna, jakaja vałodaje elektryčnym Fiat 500, kaža, što praz mocny maroz była vymušana admovicca ad pajezdak na aŭto.
«U majho aŭto navat u ciopły pieryjad maksimalny zapas — kiłamietraŭ 130—140. Z prychodam marazoŭ jon prasieŭ niedzie ŭ dva razy. To-bok zaradžać davodziłasia kožny dzień, bo na druhi dzień chopić tolki dajechać da pracy», — pryznajecca jana.
Dziaŭčyna žyvie ŭ šmatkvaternym domie, tamu zaradka aŭto ŭzimku dla jaje — sapraŭdny kvest.
«Pakul było ciopła, to mnie na tydzień chapała dźviuch, časam troch zaradak. Troški niazručna, ale žyć možna. Ale štodzionnaja zaradka — heta prablematyčna, bo to ŭsie miescy zaniatyja, to stancyja nie pracuje. Atrymlivajecca, što ŭsio tvajo žyćcio krucicca vakoł zaradki aŭto. Tamu tydzień tak pamučyłasia i vyrašyła admovicca ad pajezdak na aŭto, pakul marazy nie spaduć», — pryznajecca surazmoŭca.
Ułaśnica Fiat 500 kaža, što viasnoj płanuje vystavić mašynu na prodaž.
«Heta mašyna chutčej dla žyćcia va ŭłasnym domie, bo inakš ty pastajanna dumaješ pra zaradku. Mahčyma, kuplu sabie taki ž Fiat, ale bienzinavy», — kaža jana.
Kamientary